Lagin merkeena, denetan hoberenetako bat
Tinta-zurrusteko inprimagailuak nagusi dira aspalditik etxean: beren aurrekoak baino askozaz isilagoak izaki, mota guztietako papera erabil dezakete (baita argazkitakoa ere) eta ertzik gabe ere inprimatzeko gauza dira, kolore bizi-bizietan eta argazkiari zor zaion kalitatearekin. Hori bai, dirudien baino askoz ere garestiagoak gertatzen dira, aparatuaren prezioagatik (izan ere gaur sekula baino merkeagoak daude) bainoago, jatorrizko kartutxoak kostatzen direnagatik. Horiek aintzat hartuta, azterketa honetan nabarmendu dena ez da ekipoak zenbat balio duen, etxean orri bat inprimatzea kostatzen dena baino.
Lan honetan azterturiko sei inprimagailuek, irudi eta testuak inprimatzeaz gainera, noski, beste zeregin batzuk ere betetzen dituzte: eskaneatzea (paperetik ordenagailura irudiak edo testuak igarotzea) eta fotokopiak egitea, alegia: horregatik derizte “zeregin anitzekoak”. Laginen prezioetan ez dago alde handirik: 83 eurotik (Olivetti) 99 euroraino (Canon) doaz. Kostu horrek, ordea, ez du egia osoa aitortzen: tinta-ordezko bakar bat, batez beste, aparatu osoaren %63 kostatzen da. Horrenbestez, ekiporik merkeena zein den jakiteko, aparatu bakoitzarekin hamar orri inprimatzea zenbat kostatzen den ere neurtu zen. Brother lagina (2,33 euroko tinta-kostua hamar orriko) izan zen denetan merkeena, ondoren Olivetti (2,58 euro hamar orriko) zetorkiola. Denetan garestienak Epson (5,76 euro) eta HP (5,40 euro) gertatu ziren.
Kalitatea eta prezioaren arteko erlazio egokiena Olivetti Any Way laginak ematen du: denetan merkeena da, wifi (haririk gabeko konexioa) duen bakarra, koloretako inprimatze-kalitaterik hoberenekoa eta tinta-kartutxorik errentagarrienetako batez hornitua dago (gehien irauten duten ontziak ditu). Hori bai, ekiporik handiena da berau.
Ezaugarri teknikoak
Inprimagailurik txikienak Lexmark (375x279x153 mm) eta Brother (373x345x135 mm) dira; bolumen handienekoa, aldiz, Olivetti eta Canon (txikienen halako bi, ia). Ekipo horiek, martxan, bonbilla tradizional baten erdia kontsumitzen dute. HP da denetan gutxien gastatzen duena: 12,4 W; Olivetti eta Epson laginek, berriz, 22 W.
Sei aparatuek dauzkate inprimatzea, eskaneatzea eta kopiatzea kudeatzeko programa informatikoak. HP, Epson eta Olivetti laginek, ordea, irudien tratamendu digitala egiteko softwarea dakar eta Brother-ek hizkuntza-itzultzailea. Kopiak denek egiten dituzte, dela tamaina berean, dela kopia handitu edo txikituta. Ekipook ordenagailuarekin konektatzeko USB (sistemarik hedatuena) baliatzen dute baina Olivetti wifi (hari gabe) bidez ere konektatzen da. Canon, Lexmark eta Brother laginek multimedia txartelen irakurgailua (kamera digitalek baliatzen dutena) ere bertan daukatenez, argazkiak inprima ditzakete ordenagailutik igaro gabe. Kamerak wifi badauka (hori ez dago oso hedatua) Olivetti-n zuzenean ere inprima daiteke.
Bereizmena: ez da hil edo biziko kontua
Bereizmenak adierazten du irudia osatzen duten kolore-puntuen gehieneko kopurua. Bereizmen handiagoa ez da beti aukera hoberena, puntu horiek zehatzak izan behar baitute (toki egokian “suertatu” behar dira), gehiegi izan gabe, orria ez blaitzeko. Inprimagailu hauen kalitatea ezin egokiagoa da, inprimatze domestikoez ari garela. Eskaneatzeko bereizmen hoberena (argazki bat osa dezaketen puntu kopurua: hau determinantea da, berez) HP laginarena da (1200×2400 ph edo puntu hazbeteko); ondotik Canon eta Olivetti datozkio (biak ere, 1200×1200 ph). Lexmark laginak ez du datu garrantzitsu hori eman.
Epson da koloretako lau kartutxo bereiz saltzen dituen bakarra. Gainerako inprimagailuetan aritzeko, beltza ez den kolore-kartutxoetako bat agortzen denean gainerako hiru koloreak (zian, magenta eta horia) dauzkan kartutxoa osorik erosi behar da. Lexmark laginarekin probetako asko ezin izan ziren egin, tintarik erostea ezinezkoa gertatu zelako, estatu espainiar osoko informatika-establezimendu nagusiak hainbat astetan bisitatu diren arren. Horrek argi uzten du nolako zailtasunak izango dituen erabiltzaileak lagin horretako tinta amaitutakoan.
Inprimatzearen karrera
Zein da denetan azkarrena? Zuri-beltzean eta koloretan hogeita bost orriko bi multzo inprimatu ondoren lagin azkarrenak Canon (5 orri minutuko ?om? zuri-beltzean eta 1,5 orri minutuko koloretan) eta HP (4,5 orri minutuko zuri-beltzean eta 1,5 orri minutuko koloretan). Gainerakoak, minutuko, lau orri inguruan dabil zuri-beltzean eta batetik gertu, koloretan. Lehen orriari inprimatzen hastea gehiago kostatzen zaio: Epson-ek martxan jartzeko 12 segundo baizik ez zuen eman; beste muturrean, Brother ikaragarri geroratzen da: 72 segundoraino.
Tinta-kartutxo batekin zenbat ori inprima zitekeen ere kalkulatu zen: Olivetti eta Brother dira errentagarrienak, 210 orri. HP laginaren kartutxoa, denetan txarrena, ez da gauza 75 orri zuri-beltzean edo 90 koloretan egiteko. Epson eta Canon laginen tintek ere erdipurdiko emaitzak erakutsi zituzten, zuri-beltzean, batik bat. Dena dela, horrenbeste ori inprimatzeko gauza badira ere, zuri-beltzeko inprimatzeak kalitatetik galtzen du 60. orritik aurrera HP laginean, eta 85.etik aurrera, Canon laginean.
Azterturiko ekipoak antzinako inprimagailu haien zarata jasanezinera iritsi gabe ere, higuingarriak dira eta, noski, horrek gaueko ordu batzuetan inprimatzea galarazi edo eragotzi egiten du: Lexmark 68 dezibelio (dB) inguruan eta bi isilenak (Epson eta Brother) 61dB dabiltza.
Erabiltzaileen iritzia
Jarduera anitzeko inprimagailu hauek ohituak dauden sei erabiltzailek probatu dituzte eta, ondoren, inprimatzeko, eskaneatzeko eta fotokopiatzeko gaitasunaren hainbat alderdi balioztatu dituzte. Inprimatze-probak zuri-beltzeko testuekin, logotipo ugariz josiriko dokumentuekin eta, paper fotografiko gaineko argazkiekin egin dira, kalitate handienean.
Ekipoak, oro har, erabiltzeko errazak dira eta hiru eginkizunetan ere asetzeko moduko kalitatea ematen dute. Denetan nabarmendu dira HP, bera baita hiru probetan hoberena, eta Olivetti (koloretako inprimatze-lanean kalitate hoberenekoa da: 10 punturik, 8,6). Lexmark laginak, berriz, 5 puntu baizik ez zuen erdietsi: aparatu honetan kartutxo bakarra sartzen denez (zuri-beltzekoa edo koloretakoa; ezin dira biak batera erabili), koloretakoa instalatua dagoenean kolore beltza tinta-nahaste bat eginez lortu behar da, baina beltzera inondik ere hurreratu gabe. Canon, Olivetti, Lexmark eta Brother laginek daukaten LCD pantaila baliagarritzat jo zuten erabiltzaileek.
Epson ekipoak daukan programa informatikoa izan da kalifikazio txarrena jaso duena: 5,2 puntu, 10etik. Gida-liburuak ere ez zuen puntuazio egokia jaso (4,8 puntu); Canon laginekoak, aldiz, 7 puntu eskuratu zituen. Brother laginaren USB konektorea karkasaren atzealdean ezkutaturik egotearren erabilera korapilatu egiten da.
Programa informatikoak kartutxoa agortu dela iragartzen duenean ?ez, ordea, tinta benetan agortu denean? Oliveti eta Brother inprimagailuek inprimatzeari uzten diote. Gainerakoek likidoa erabat ahitzeko aukera ematen dute (kalitatearen kaltean bada ere). Eskanerrak eta fotokopiak egiten txarrena Brother da: bi eginkizunetan 6,6 puntu lortu ditu, 10etik. Erabiltzaileen balorazio hoberena HP (7,4 puntu) eta Canon (7,3 puntu) laginek eraman dituzte; apalena, aldiz, Epson-ek (6,4 puntu).
Seguruak dira
Inprimagailu hauek seguruak dira, eginiko proba ugari zorrotzek frogatu duten legez: barneko parte mekanikoetara iristerik ez dago, elektrizitate-korronteetatik behar bezain ongi isolatuak daude, gehiegizko berotze-proba plastikoa urtu gabe gainditu dute eta, elikatze-iturriaren irteeran zirkuitulaburrik edo inprimagailuko motorraren blokeatzerik gertatzen bada, ez dute kalterik eragiten. Eskuliburuei dagokiela, denak ongi osatuak daude, beharrezko informazio guztiarekin. Berme-agiriekin, ostera, ez da beste horrenbeste gertatzen: legez eman beharreko bi urteak Brother laginarenak bakarrik jaso ditu. Olivetti laginak ezinbesteko agiri hori ere ez dauka eta gainerakoek urtebeteko bermea eskaintzen dute. Nolanahi ere, erabiltzaileak erosketa-txartela baldin badauka, bi urteko berme-aldia du.
Kontua argazkiak inprimatzea denean ez du merezi laborategiekin lehian aritzea: inprimagailua, paper fotografikoa eta tinta erosteko eta, nola ez, esfortzu pertsonal sekulakoak izaki, zaleturik porrokatuenak ere etsi egingo luke. Etxean inprimatzea bidezkoa da lana berehala egin behar denean edo, bestela, inolako kalitaterik eskatzen ez duten eginkizunetan. Dena den, numeroak eginez, oporraldietan harturiko argazki mordo hura paperean inprimatzerik merezi ez duela konturatuko gara: paper fotografikoak (inprimatu gabe) soilik laborategiko kopiak adina balio du: A4 orri bat, 10 x 5eko bi kopia ozta-ozta ateratzeko balio duena, 0,50 euro inguru kostatzen da. Horri tintaren kostua eta ekipoaren amortizazioa erantsiz gero, galera segurua. Laborategiko kalitatea, gainera, hoberena izango da beti eta, zerbait gaizki gertatuz gero, kontsumitzaileak erreklamazioa aurkezteko aukera izango du; etxean, aldiz, oker hartutako erabakiak ordaindu egiten dira: paperontzira doaz.
Laburbilduz eta konparaketako taula
Laburbilduz
- Tinta-injekziozko jarduera anitzeko sei inprimagailu aztertu dira oraingoan: kalitate fotografiko eta konbentzionalean inprimatzeaz gainera, eskaneatu eta fotokopiatu egiten dute (Lexmark laginak fax eginkizuna ere badu). Horien prezioa 83 eurotik (Olivetti) 99raino doaz (Canon). Aparatuarena baino areago, tintaren prezioa da garrantzitsuagoa: Brother laginarekin 10 orri inprimatzea 2,33 euro kostatzen da eta Epson-ekin (tintarik garestienekoa), 5,76 euro.
- Hainbat astetan komertzio askotan bila ibilita ere, ezin izan zen Lexmark aparatuarentzako tinta kartutxorik aurkitu: horregatik ez da agertu proba askotan. Erabiltzaileak tinta-ordezkorik aurkitzea agian kostatuko zaiola jakin beharko du.
- Brother-en bermea bakarrik dago zuzen. Lexmark eta Brother dira ekiporik sendoenak, Olivetti handiena. Zuri-beltzean inprimatzen, fotokopiatzen eta eskaneatzen kalitaterik hoberena HP laginak eman du. Koloretan, Olivetti. Denetan azkarrena Canon da (5 orri minutuko zuri-beltzean eta 1,5 koloretan).
- Olivetti eta Brother laginetako kartutxoak dira, askozaz ere, orri gehien inprimatzen dituztenak (200etik gora); HP laginak zuri-beltzean 75 baino ez. Aparatu zaratatsuena Lexmark da eta isilenak Epson eta Brother.
- Balorazio hoberena eman diete erabiltzailek HP (7,4 puntu, 10etik) eta Canon (7,3 puntu) laginei. Puntuazio apaleneko ekipoa Epson da: 6,4 puntu.
- Kalitatea eta prezioaren arteko erlazio egokiena Olivetti Any_Way laginak eman du: denetan merkeena izaki, wifi (haririk gabeko konexioa) daukan bakarra, koloretan hobekien inprimatzen duena eta orri gehien inprimatzen dituzten kartutxoak dauzka (errentagarrienak, hortaz).
| Marka | OLIVETTI | BROTHER | HEWLETT PACKARD |
|---|---|---|---|
| Modeloa | Any_way | DCP-115C | Deskjet F380 |
| Inprimagailuaren prezioa | 82,75 | 89 | 83,58 |
| Euroak kartutxoko | 57,37 | 56 | 48,61 |
| Euroak 10 orriko | 2,58 | 2,33 | 5,40 |
| Kontsumitzailea- rentzako informazioa eta babesa | Zuzen | Zuzen | Zuzen |
| Etiketa, markatze eta gida-liburuak Bermea | Ez du betetzen | Zuzen | Ez du betetzen |
| Segurtasuna | Zuzen | Zuzen | Zuzen |
| Ezaugarri teknikoak, prestazioak | |||
| – Neurriak (milimetro) | 462x339x196 | 373x345x135 | 426x260x170 |
| – Kontsumoa (Watt) | 22,9 | 14,8 | 12,4 |
| – Konexioak | USB, Wifi | USB | USB |
| – Sistema operatibo elkargarriak | Mac Os/Windows | Mac Os/Windows | Mac Os/Windows |
| – Softwarea barne | Paintshop Photo album5 | Traductor SYSTRAN web translator | CD gidaliburu elektronikoa, HP Photosmart |
| – Multimedia txartelak | Ez | Bai | Ez |
| – Adierazitako inprimatze-bereizmena (ph)1 | Ez du adierazten | 1200×1200 B/n 600×1200 kolorea | Ez du adierazten |
| – Eskanerraren bereizmena (ph)1 | 1200×1200 | 600×600 | 1200×2400 |
| – Argazki kalitatedun inprimatzea (ph)1 | Bai | Bai (600×1200) | Bai (4800×1200,kolorea) |
| – Kopiatutakoaren handitze eta txikitzea | Bai | Bai (%25-%400) | Bai (%50-%200) |
| – Kamera / txarteletik inprimatzea | Bai (USB eta Wifi) | Bai | Ez dago eskuragarri |
| – Paper-bandejaren edukiera (orri kop.) | 100 inguru | 100 | 100 |
| Inprimatzeko abiadura | |||
| – Abiadura zuri-beltzean / kolorean (om)2 | 4 / 0,8 | 4 / 1 | 4,5 / 1,5 |
| – Lehen orria zuri-beltzean / kolorean inprimatzeko denbora (segundotan) | 20 / 9 | 72 / 5 | 28 / 6 |
| Kartutxo bidezko inprimatzea | |||
| – Orrialde kopurua z.b. / kolorean | 240 / 222 | 209 / 240 | 75 / 90 |
| – Inprimatze uniformea z.b. / kolorean | Tinta gutxi 222 orrian | NA | 60 / 84 orri arte |
| Hitsa (dezibelio) | 63,2 | 61,2 | 64,8 |
| Erabilera proba (1 – 10) | 6,8 | 6,7 | 7,4 |
| – Programa informatikoak erabiltzeko erraztasuna | 6,5 | 6 | 7 |
| – Zuri-beltzezko inprimatzearen kalitatea | 6,6 | 6,8 | 8,8 |
| – Koloretako inprimatzearen kalitatea | 8,6 | 7,2 | 8,2 |
| – Eskaneatuaren kalitatea | 7,3 | 6,6 | 7,6 |
| – Fotokopiatuaren kalitatea | 7,3 | 6,6 | 7,8 |
| Marka | CANON | EPSON | LEXMARK |
|---|---|---|---|
| Modeloa | Pixma MP170 | Stylus DX4000 | X3470 |
| Inprimagailuaren prezioa | 99 | 94 | 87,75 |
| Euroak kartutxoko | 49,09 | 69,69 | Ez da aurkitu |
| Euroak 10 orriko | 3,72 | 5,76 | |
| Kontsumitzailea- rentzako informazioa eta babesa | Zuzen | Zuzen | Zuzen |
| Etiketa, markatze eta gida-liburuak Bermea | Ez du betetzen | Ez du betetzen | Ez du betetzen |
| Segurtasuna | Zuzen | Zuzen | Zuzen |
| Ezaugarri teknikoak, prestazioak | |||
| – Neurriak (milimetro) | 443x381x181 | 430x345x172 | 375x279x153 |
| – Kontsumoa (Watt) | 15,1 | 22,1 | 14,7 |
| – Konexioak | USB | USB | USB |
| – Sistema operatibo elkargarriak | Mac Os/Windows | Mac Os/Windows | Mac Os/Windows |
| – Softwarea barne | Ez | Opyphoto eta Print easy | Mac eta Windows “Dena 1-tan” |
| – Multimedia txartelak | Bai | Ez | Bai |
| – Adierazitako inprimatze-bereizmena (ph)1 | Ez du adierazten | 5760×1440 | Ez du adierazten |
| – Eskanerraren bereizmena (ph)1 | 1200×1200 | 600×1200 | Ez du adierazten |
| – Argazki kalitatedun inprimatzea (ph)1 | Bai (4800×1200) | Bai | Bai (4800 ph-raino) |
| – Kopiatutakoaren handitze eta txikitzea | Bai (%25-%400) | Bai | Bai |
| – Kamera / txarteletik inprimatzea | Bai | Ez dago eskuragarri | Bai |
| – Paper-bandejaren edukiera (orri kop.) | 100 inguru | 100 | 100 inguru |
| Inprimatzeko abiadura | |||
| – Abiadura zuri-beltzean / kolorean (om)2 | 5 / 1,5 | 4 / 0,7 | Ez dago eskuragarri |
| – Lehen orria zuri-beltzean / kolorean inprimatzeko denbora (segundotan) | 20 / 5 | 12 / 5 | Ez dago eskuragarri |
| Kartutxo bidezko inprimatzea | |||
| – Orrialde kopurua z.b. / kolorean | 90 / 150 | 80 / 121 | NA |
| – Inprimatze uniformea z.b. / kolorean | 60 /84 orri arte | Tinta gutxi 70 / 83 orrian | NA |
| Hitsa (dezibelio) | 64,5 | 61 | 67,9 |
| Erabilera proba (1 – 10) | 7,3 | 6,4 | 6,9 |
| – Programa informatikoak erabiltzeko erraztasuna | 6,8 | 5,2 | 6,6 |
| – Zuri-beltzezko inprimatzearen kalitatea | 7,8 | 6,2 | 5 |
| – Koloretako inprimatzearen kalitatea | 7 | 5,8 | 5 |
| – Eskaneatuaren kalitatea | 7,3 | 6,8 | 7,4 |
| – Fotokopiatuaren kalitatea | 7,8 | 6,8 | 7,4 |
(1) (ph) Puntuak hazbeteko. Inprimaturiko irudiaren zehazmena neurtzeko unitatea; zenbat eta puntu gehiago hainbat eta zehazmen hobea.
(2) (om): orriak minutuko.
Banan banan
Sei inprimagailuak, banan-banan
Olivetti Any Way
/imgs/20070201/img.impresoras.01.jpg - 82,75 euro, denetan merkeena
- 10 orri inprimatzea 2,58 euro kostatzen da (merkeenetako bat)
- Bermeen araua ez du betetzen. Hau da denetan handiena. Hari gabeko konexioa (wifi) daukan bakarra. Orri gehien inprimatzen dituen tinta-kartutxoa daukana (240 orri zuri-beltzean eta 222 orri koloretan). Bost argazki-paper lagin ditu.
- Erabilera-proba: 6,8 puntu, 10etik: aurkakoak: gidaliburua eta aginteak; aldekoak: koloretako inprimatzearen kalitatea (8,6 puntu).
Brother DCP-115C
/imgs/20070201/img.impresoras.02.jpg - 89 euro
- 10 orri inprimatzea 2,33 euro kostatzen da (denetan merkeena)
- Txikienetako bat. Txartel-irakurgailua dauka. Zuri-beltzean lehen orria inprimatzeko denbora gehien behar duena (72 segundo). Hots gutxienekoa (61,2 dB)
- Erabilera-proba: 6,7 puntu, 10etik: fotokopiak eta eskanerrak egiten, kalitaterik txarrenekoa.
Hewlett Packard DeskJet F380
/imgs/20070201/img.impresoras.03.jpg - 83,58 euro
- 10 orri inprimatzea 5,40euro kostatzen da.
- Bermeen araua ez du betetzen. Eskaneatzeko bereizmenik hoberenekoa. Azkarrenetako bat: 4,5 orri minutuko zuri-beltzean eta 1,5, koloretan. Orri gutxien inprimatzen dituzten kartutxoak: 75 orri zuri-beltzean eta 90 koloretan.
- Erabilera-proba: 7,4 puntu, 10etik. Inprimatze, eskaneatze eta fotokopiatze lanen kalitateagatik, hoberenetako bat.
Canon Pixma MP170
/imgs/20070201/img.impresoras.04.jpg - 99 euro, denetan garestiena
- 10 orri inprimatzea 3,72 euro kostatzen da.
- Bermeen araua ez du betetzen. Lagin handienetako bat. txartelen irakurgailua dauka. Aparatu azkarrena: 5 orri zuri-beltzean eta 1,5 koloretan, minutuko. Bost argazki-paper lagin ditu.
- Erabilera-proba: 7,3 puntu, 10etik. Ekipamendu eta funtzioengatik, balorazio hoberenetako bat jaso du.
Epson Stylus DX4000
/imgs/20070201/img.impresoras.05.jpg - 94 euro; bigarren garestiena
- 10 orri inprimatzea 5,76 euro kostatzen da.
- Bermeen araua ez du betetzen. Lehen orria inprimatzeko denbora gutxien behar duena (12 segundo). Eraginkortasun moteleneko kartutxoak dauzkana 80 orri zuri-beltzean eta 121 koloretan. Isilenetako bat.
- Erabilera-proba: 6,4 puntu, 10etik. Menu eta eskuliburu ulergaitzengatik, erabiltzeko zaila duen programa informatikoagatik, eskaneatzen, fotokopiatzen eta inprimatzen agertu duen funtzionaltasun apalagatik, balorazio txarrena eman zaio.
Lexmark X3470
/imgs/20070201/img.impresoras.06.jpg - 87,75 euro
- Faxa daukan bakarra. Probetako asko ezin egin izan da, tinta-kartutxorik ez baitzegoen salgai. Bermeen araua ez du betetzen. Laginik txikiena. Txartelen irakurgailua dauka. Denetan zaratatsuena. Eskaneatze-bereizmena ez du adierazten.
- Erabilera proba: 6,9 puntu, 10etik. Inprimatzeko kalitaterik txarrenekoa.