Ensaladas en conserva

Prácticas e saudables

Os ingredientes principais son atún, chícharos, cenoria, pemento vermello e cebola. Algunhas ensaladas conteñen tamén millo, olivas, espárragos e soia.
1 Xullo de 2006
Img analisis listado 125

Prácticas e saudables

Os alimentos preparados que apenas requiren elaboración para seren consumidos ocupan cada vez maior espazo na nosa bolsa da compra, non en van cada vez dedicamos menos tempo a cociñar. E a tendencia chegou tamén ás ensaladas, un dos pratos que mellor representa a dieta mediterránea, moi eloxiada nos últimos anos porque axuda a reducir a probabilidade de sufrir enfermidades tan do noso tempo coma as cardiovasculares, as dexenerativas e o cancro. Entre as moitas virtudes das hortalizas, constituíntes fundamentais das ensaladas, cómpre destacar o seu elevado contido en fibra e en vitaminas e minerais, o seu baixo poder calórico e a súa valiosa contribución para manter o organismo hidratado. Malia tantas vantaxes, no noso país o consumo de hortalizas e vexetais non chega sequera á metade da cantidade diaria recomendada (400 gramos).

Incluír as ensaladas na nosa dieta habitual pode axudarnos a cumprir co consumo aconsellado desta familia de alimentos. O mercado, atento aos novos costumes e necesidades, ofrece varias opcións de ensaladas xa listas para consumir. Unha delas é a das ensaladas esterilizadas, presentadas en tarro de cristal ou ben en lata ou cunca. Os ingredientes envásanse en recipientes aos que se lles engade o líquido de cobertura (auga, aceite, vinagre…) e péchanse hermeticamente, o que impide que penetren no produto outros contaminantes. A esterilización á que se someten posteriormente é un tratamento de altas temperaturas que destrúe os microbios que puidesen conter os ingredientes. Despois, etiquétanse e almacénanse a temperatura ambiente, porque non precisan frío ao xa estaren esterilizados.

/imgs/20060701/img.analisisa.01.jpg

Esta análise estudou seis mostras de Ensalada “Mediterránea”, todas en conserva. Isabel, Rianxeira, Calvo e Miau comercialízanse en lata ou cunca, empregan aceite no aliño e declaran entre 150 e 180 gramos de peso neto. Bonduelle e Carretilla, en tarro de cristal, carecen de aceite e indican un peso de 530 e 345 gramos. Os ingredientes destas ensaladas en conserva son atún (excepto en Bonduelle, que non ten), chícharos, cenoria, pemento vermello e cebola. Algunhas engaden millo, olivas, espárragos e soia. Os prezos ían desde os 5,74 euros por quilo escorrido de Bonduelle ata os 8,63 euros/quilo de Carretilla.

Mellor en lata ou en frasco?

Ambos os formatos (lata ou cunca e frasco de cristal) carecen de aditivos e conservantes, teñen unha longa vida útil e non precisan frío para a súa conservación. Agora ben, as ensaladas en lata ou cunca teñen unha vantaxe de uso: están aliñadas non só con vinagre e sal senón tamén con aceite, o que fai posible o seu consumo directo e sen necesidade de extraela do seu envase, abonda cun garfo. Ademais, os formatos en lata ou cunca son máis pequenos (uns 150 gramos), o que facilita que tras o consumo non sobre nada. Por outra banda, as ensaladas en frasco son máis voluminosas, conteñen unha mestura de auga con vinagre e sal que será retirada para despois aliñar os ingredientes con aceite e, se é o caso, vinagre.

Peso e ingredientes, ben

Nas seis mostras o peso neto real foi superior ao declarado, mentres que o neto escorrido (unha vez eliminado o líquido de cobertura) só o indicaban Miau, Bonduelle e Carretilla, que o ofrecían en cantidades superiores ás declaradas.

Por outra banda, as seis ensaladas conteñen os ingredientes que anuncian, aínda que algúns presentan máis atún ca o indicado na etiqueta. Ese é o caso de Miau (45%), Isabel (35%), Calvo (35%) e Rianxeira (32%), que sinalan atún nunha proporción do 25%, cando a superan amplamente, mentres que Carretilla se axusta ao 8% declarado. Bonduelle é a única sen atún.

/imgs/20060701/img.analisisa.02.jpg

Ademais de atún, os compoñentes da ensalada de Carretilla son principalmente cenoria (35%) e millo (33%). En Bonduelle predominan gromos de soia (25%) e millo (28%). En Calvo, chícharos (31%) e cenoria (24%) mandan sobre pemento vermello (6%) e cebola (4%). O mesmo sucede en Miau, aínda que as diferenzas son menores. En Rianxeira víronse as maiores discrepancias: asegura que o atún é maioritario, cando en realidade o seu 32% é superado polos chícharos (41%). No resto de ensaladas, as diferenzas foron pouco significativas.

As catro ensaladas en lata ou cunca, teñen os mesmos ingredientes: atún, cenorias, chícharos, pemento vermello e cebola. En cambio, as dúas que se comercializan en frasco difiren na súa composición. Carretilla opta polo atún, a cenoria, os espárragos, as olivas negras e verdes e o millo, mentres que Bonduelle prefire decantarse polas cenorias, o pemento vermello, os gromos de soia, o millo e as espigas de millo.

O sal é un ingrediente que sempre cómpre ter en conta nos alimentos procesados. O produto menos salgado (sen contar o líquido de cobertura) foi Miau, cun 0,6%, mentres que no outro extremo figurou a ensalada Bonduelle (1,3%). O resto contiñan arredor do 1% de sal.

As ensaladas en lata ou cunca están inmersas en aceite vexetal, vinagre e sal; a de Isabel contén tamén azucre. Por outra banda, Bonduelle e Carretilla, as dúas en tarro de cristal, non teñen aceite: o seu mollo consta de vinagre, azucre, sal e auga. Comprobouse que, tal e como o declaran, Rianxeira e Isabel utilizan aceite de oliva, mentres que o de Miau é de xirasol e o de Calvo, de soia. Os catro son aceites vexetais saudables nos que os ácidos graxos insaturados predominan sobre os saturados.

Como era de esperar nun alimento en conserva, a análise microbiolóxica, que establece a calidade hixiénico-sanitaria dos alimentos, non presentou problema ningún: todos os datos foron correctos.

Vitaminas, minerais e fibra

Posto que a maior parte destas ensaladas son hortalizas, achegan abundantes vitaminas do grupo B, C e, grazas ás cenorias, pro-vitamina A. Iso si, o tratamento térmico que sofren estas hortalizas reduce lixeiramente o contido de vitaminas, especialmente as do grupo B e a vitamina C. Entre os minerais, destacan o potasio, o magnesio e o ferro -grazas ao atún-, así como o sodio do sal. Outros nutrientes das ensaladas son a fibra e os antioxidantes. Os fabricantes reducen ao máximo o tempo do tratamento térmico e a intensidade da calor para que as perdas de nutrientes sexan mínimas. Un xeito de mellorar esta achega de vitaminas e minerais é combinalos con hortalizas crúas como a leituga, a escarola, etc.

O consumo de ensaladas protexe a pel

Os raios solares agriden a pel e son causa do seu envellecemento prematuro e do desenvolvemento de melanomas. O consumo de ensaladas achega nutrientes para manter a pel en bo estado. As hortalizas de cores intensas (cenoria, remolacha, pementos, tomate, col lombarda, leituga lollo vermello) achegan beta-caroteno que se transforma en vitamina A e renova a pel e as mucosas, e vitamina C, que mellora a produción de coláxeno, proteína que mantén a pel tersa e prevén a formación de engurras. Se as ensaladas se enriquecen con aguacate ou froitos secos e se condimentan con aceite de oliva virxe introdúcense no organismo ácidos graxos insaturados que axudan a manter unha pel estruturada e hidratada, e tamén vitamina E, que frea a aparición de manchas na pel.

Etiquetas mellorables

Catro das seis mostras incumpren a normativa. Rianxeira non indica a porcentaxe dalgúns ingredientes cando si os representa con imaxes, non ofrece no mesmo campo visual toda a información e a súa lista de ingredientes non figura en orde decrecente de composición. Isabel destaca o aceite (oliva), pero non indica a súa proporción nin o peso escorrido do produto. Miau indica que a cenoria, os chícharos, os pementos e a cebola se atopan “en proporción variable”, cando a cenoria e os chícharos pesan o dobre ca o pemento; debería indicar a porcentaxe de cada ingrediente. Acontece o mesmo con Calvo. Tampouco Bonduelle indica esta proporción, pero ao comercializarse en tarro de cristal permítelle ao consumidor facerse unha idea do contido de cada un. A única mostra con etiquetaxe correcta é Carretilla.

En síntese y Táboa comparativa

En síntese

  • Analizáronse seis “Ensalada Mediterránea”, todas en conserva. Isabel, Rianxeira, Calvo e Miau comercialízanse en lata ou cunca, empregan aceite como aliño e ofrecen desde 150 ata 180 gramos. Bonduelle e Carretilla, en tarro de cristal, carecen de aceite e pesan 530 e 345 gramos.
  • Son un alimento saudable e moi doado de preparar. Os seus ingredientes son atún (excepto Bonduelle, que non leva), chícharos, cenoria, pemento vermello e cebola. Algunhas engaden tamén millo, olivas, espárragos e soia.
  • Os prezos van desde 5,74 euros/quilo escorrido (Bonduelle) ata 8,63 euros/quilo (Carretilla).
  • A de máis atún é Miau (45%) e as de menos, Bonduelle (0%) e Carretilla (9%). A de menos sal, Miau (0,6%) e Bonduelle, a máis salgada (1,3%).
  • Mellor relación calidade-prezo: Miau, a segunda máis barata e a de máis atún. Outra opción: Isabel, leva moitísimo atún e é unha das dúas que máis gustaron na cata.
Marca/
Denominación
Miau “Ensalada Mediterránea con atun” Isabel “Ensalada Mediterránea con atun” Rianxeira “Ensalada Mediterránea”
Prezo por peso escorrido (euros / quilo) 6,11 6,86 7,53
Etiquetaxe Incorrecta Incorrecta Incorrecta
Peso neto declarado 1 (g) 150 157 180
Peso escorrido declarado 2 (g) 124 Non o indica Non o indica
Peso neto real 1 (g) 166,6 162,8 200
Peso escorrido real 2 (g) 140,2 134,5 181,1
Ingredientes (%)
Atún 45,4 34,9 32,1
Cenoria 17,7 28,5 13,4
Chícharos 16,3 18,5 41,4
Pemento vermello 8 10,1 3,9
Cebola 12,6 8 9,2
Gromos de soia
Espárragos
Oliva negra
Oliva verde
Millo
Espigas de millo
Sal (%) 0,6 1,1 0,8
Líquido de cobertura 3 Aceite de xirasol, vinagre e sal Aceite de oliva, vinagre, azucre e sal Aceite de oliva, vinagre e sal
Estado microbio- lóxico Correcto Correcto Correcto
Cata (1 a 9) 6 6,5 6,5
Marca/
Denominación
Calvo “Ensalada Mediterránea con atun” Bonduelle “Ensalada Mediterránea” Carretilla “Ensalada Mediterránea con atun”
Prezo por peso escorrido (euros / quilo) 7,54 5,74 8,63
Etiquetaxe Incorrecta Correcta Correcta
Peso neto declarado 1 (g) 150 530 345
Peso escorrido declarado 2 (g) Non o indica 300 225
Peso neto real 1 (g) 153,2 560,7 366
Peso escorrido real 2 (g) 130,7 334,2 236,5
Ingredientes (%)
Atún 34,6 8,7
Cenoria 24 18,8 34,8
Chícharos 31,4
Pemento vermello 6,4 10,7
Cebola 3,6
Gromos de soia 24,5
Espárragos
Oliva negra 9,6
Oliva verde 7,1
Millo 6,6
Espigas de millo 28,2 33,2
Sal (%) 17,8
Líquido de cobertura 3 Aceite de soja, vinagre e sal Auga, vinagre, sal e azucre Vinagre, azucre e sal
Estado microbio- lóxico Correcto Correcto Correcto
Cata (1 a 9) 6,3 4,4 5,5

(1) Peso neto: peso total dos ingredientes e mais do líquido que os cobre.
(2) Peso escorrido: peso da ensalada logo de eliminar o líquido de cobertura.
(3) Líquido de cobertura: o laboratorio verificou que os aceites indicados nas etiquetas, e que figuran neste cadro, son os que realmente contiñan as mostras analizadas.

Un a un

Unha por unha, seis ensaladas envasadas

Miau

/imgs/20060701/img.miau-ensaladas.jpg “Ensalada Mediterránea con atún”. Lata de 150 gramos.
Sae a 6,11 euros/quilo (peso escorrido: só a ensalada, sen o aliño); a segunda máis barata.
A mellor relación calidade-prezo. Ingredientes principais: atún (45%), cenoria (18%) e chícharos (16%). A menos salgada (0,6%). Incumpre a norma de etiquetaxe. Aliño: aceite de xirasol, vinagre e sal.
Na cata, 6 puntos: gusta polo “bo sabor a bonito”, “aliño”, “variedade de ingredientes”, “sensación ao mastigar” e “aparencia”, pero é criticada por “moito sabor a vinagre”, “un pouco sosa” e “atún moi esmigallado”.

Isabel

/imgs/20060701/img.isabel-ensaladas.jpg“Ensalada Mediterránea con atún”. Lata de 157 gramos
Sae a 6,86 euros/quilo (peso escorrido: só a ensalada, sen o aliño)
Outra opción interesante. Ingredientes principais: atún (35%) e cenoria (29%). Incumpre a norma de etiquetaxe. Aliño: aceite de oliva, vinagre, azucre e sal.
Na cata recibe 6,5 puntos: gusta por “saborosa”, “variedade de ingredientes”, “bo aspecto” e “zumenta”, pero é criticada por levar “demasiada cenoria” e por predominar “o sabor dun ingrediente”.

Rianxeira

/imgs/20060701/img.rianxeira-ensaladas.jpg“Ensalada Mediterránea con atún”. Bol (cunca sen asa) de 180 gramos.
Sae a 7,53 euros/quilo (peso escorrido: só a ensalada, sen o aliño). Ingredientes principais: chícharos (41%) e atún (32%). Incumpre a norma de etiquetaxe.
Aliño: aceite de oliva, vinagre e sal.
Na cata consegue 6,5 puntos: gusta polo seu “sabor bo”, “boa aparencia”, “ingredientes ben combinados” e “agradable ao mastigar”; foi criticada polo “exceso de chícharos” e “pouco sabor”.

Calvo

/imgs/20060701/img.calvo-ensaladas.jpg“Ensalada Mediterránea con atún”. Lata de 150 gramos.
Sae a 7,54 euros/quilo (peso escorrido: só a ensalada, sen o aliño). Ingredientes principais: atún (35%) e chícharos (31%). Incumpre a norma de etiquetaxe.
Como aliño, aceite de soia, vinagre e sal.
Na cata recibe 6,3 puntos: gusta por “saborosa”, “aparencia”, “ingredientes”, “sensación ao mastigar”; é criticada por levar “moitos chícharos”, “atún un pouco forte” e “sabor a vinagre”.

Bonduelle

/imgs/20060701/img.bonduelle-ensaladas.jpg“Ensalada Mediterránea”. Tarro de cristal de 530 gramos.
A máis barata, sae a 5,74 euros/quilo (peso escorrido: só a ensalada, sen o aliño). Ingredientes principais: millo (28%) e gromos de soia (25%). A única sen atún, e a de máis sal (1,3%). Como aliño contén auga, vinagre, sal e azucre, pero nada de aceite.
Na cata, con 4,4 puntos, foi a peor: gusta polo seu “colorido” e “sabor” e pola “orixinalidade dos ingredientes”; foi criticada pola “acidez”, pola “falta dalgún ingrediente máis” e por levar “demasiado millo”.

Carretilla

/imgs/20060701/img.carretilla-ensaladas.jpg“Ensalada Mediterránea con atún”. Tarro de cristal de 345 gramos.
A máis cara, sae a 8,63 euros/quilo (peso escorrido, só a ensalada, sen o aliño). Ingredientes maioritarios: cenoria (35%) e millo (33%). Pouco atún (9%). E nada de aceite: como aliño leva vinagre, azucre e sal. É a de mellor etiquetaxe.
Na cata, con 5,5 puntos, a segunda peor valorada: gustou polo “bo sabor”, pola “presenza de espárragos e olivas” e pola “aparencia”, pero foi criticada por levar “poucos ingredientes” e por “insípida”.