Pequenas brazadas, grandes beneficios

Pequenas brazadas, grandes beneficios

/imgs/20090301/consejo.jpg
Fórmanse, medran e nacen arrodeados de auga. Así como o líquido amniótico é o medio básico de enriquecemento do bebé no útero da nai, a auga tamén o é dende os primeiros meses de vida extrauterina. Por iso, a natación é unha das actividades físicas máis completas para potenciar o desenvolvemento dos nenos e para mellorar a súa coordinación, equilibrio e forza muscular, amais de lles proporcionar numerosos beneficios psíquicos. Así e todo, a natación para bebés pouco ten que ver con nadar ou con aprender a nadar: é un xeito de estimular o bebé no medio acuático. Agora ben, en ningún caso adquirirán as habilidades necesarias para desenvolveren a autonomía necesaria na auga nin aprenderán os movementos propios que require a práctica da natación.

Beneficios da natación nos máis cativos…

• /imgs/20090301/consejo-2.jpg
  A natación a idades temperás axuda ao desenvolvemento psicomotor, xa que os bebés atopan na auga a posibilidade de se moveren de modo tridimensional, cunha gran liberdade e continuidade de movementos.
• Os nenos adquiren nocións de desprazamento e de distancia, o que redunda nun maior equilibrio e coordinación motriz. Ademais, a súa aliñación postural vese favorecida.
• A natación fortalece o sistema cardiorrespiratorio dos picariños. Mediante os exercicios de respiración na auga lógrase aumentar a eficiencia na osixenación e no traslado do sangue.
• A práctica da natación incrementa o apetito e mellora a mobilidade intestinal.
• Nenos e bebés, mesmo os máis bulebule ou hiperactivos, reláxanse e dormen mellor logo de botaren unhas horas na piscina.
• A auga estimula a capacidade de xogo dos bebés, o que resultará moi vantaxoso na súa aprendizaxe futura, xa que desenvolven unha percepción máis ampla do mundo no que viven e son máis creativos e observadores.
• Na auga o neno comeza a coñecer as súas posibilidades e limitacións e séntese seguro.
• A actividade acuática en común mellora e fortalece a relación afectiva e cognitiva entre o bebé e os pais.
• O medio acuático está recomendado sobre todo en nenos con problemas de saúde que dificultan a súa natural mobilidade. É o caso dos menores que sofren danos na columna e que precisan de cadeira de rodas, e mesmo naqueles casos de obesidade infantil.

… e algunha molestia

• Os nenos máis cativos poden presentar hiperhidratación pola inxestión masiva de auga e, derivado diso, trastornos iónicos (o sangue dilúese e redúcese a súa cantidade de sales).
• Outras enfermidades frecuentes, neste caso cos ollos como protagonistas, son a conxuntivite química por cloro, a conxuntivite infecciosa vírica ou bacteriana e a infección de córnea en nenos que usan lentes de contacto.
• As infeccións nas costas (pitiriase versicolor), nos pés por fungos, e/ou diarreas tamén se poden contraer na auga.

A idade axeitada para unha primeira toma de contacto coa auga

A idade recomendable para que o cativo da casa goce do seu primeiro baño na piscina son os 3-4 meses, así que o bebé xa mantén a cabeza ergueita e que o seu sistema inmunolóxico madurou. Así e todo, convén consultar co pediatra esta decisión.

• Comece as clases cando se sinta seguro, tendo en conta que a partir dos 8 ou 9 meses o bebé perderá algúns reflexos innatos determinantes e precisará aprendelos. (Ata os 4 meses de vida o bebé conserva unha serie de capacidades que favorecen a súa adaptación ao medio acuático). Os bebés que acaban de nacer caracterízanse pola súa capacidade de flotar, de mover o seu corpo dentro da auga de maneira relaxada e de manter o reflexo de apnea baseado en pechar a glote, de xeito que non tragan auga nin experimentan a sensación de se atragoaren.
• Non cree falsas expectativas. Ata os 4 ou 5 anos os nenos non dan nadado como un adulto. Ata entón son demasiado pequenos para desenvolveren autonomía na auga e adquiriren os movementos propios da natación.
• Unhas 20 sesións de 30 minutos nun club de natación privado custan entre 250 e 350 euros.
• O custo dun curso nun polideportivo municipal ou nun centro público oscila entre 30 e 90 euros mensuais.

Condicións óptimas da piscina

• Evite as piscinas de dubidoso control hixiénico e sanitario, que poden ser causa de serias infeccións e enfermidades.
• A temperatura da auga debe roldar os 32 ºC, aínda que pode variar un grao para riba ou para baixo en función da época do ano.
• O nivel de cloración débese manter entre o 0’5 e o 0’6% (fronte ao 1% nas de adultos).
• A piscina dos pequenos débese reservar para que eles xoguen en exclusiva e para o uso dos seus pais baixo supervisión e recomendación do monitor. Xamais hai que compartir este espazo con outros usuarios.
• A profundidade da piscina non debería superar o metro, sobre todo no caso dos cursos para os bebés. Deste xeito os pais poden facer pé e reaccionar ante calquera contratempo.
• Asegúrese de que a zona dos vestiarios onde lles cambia o cueiro estea climatizada e que cumpra coas normas hixiénicas.
• Se os vestiarios se atopan afastados da piscina é conveniente que preto dela se dispoña dun banco ou dun lugar especial para espir e vestir o neno.
• Comprobe que sempre haxa monitores ou socorristas preto dos nenos e que o persoal que imparte as clases estea cualificado especificamente para traballar con eles.