Cómpre usalas, a pel ten memoria

Lucir un bronceado atraente é case obrigatorio cando chega o verán e calquera modo de consegui-la devecida cor dourada semella ser válido. Ano tras ano e por estas datas os dermatólogos nos lembran a gravidade dos efectos perniciosos dos raios solares (queimaduras, avellentamento prematuro, melanomas…), pero a moda da boa cor está demasiado arraigada entre nós, polo que se imos toma-lo sol, fagámolo de maneira responsable. Non vale pensar que as queimaduras do pasado ano xa sandaron: a pel ten memoria -acumula os estragos que sufriu- e os problemas poden sobrevir moito tempo despois de deixar de toma-lo sol.

¿Por que usar crema solar?

Utilizadas correctamente, son o mellor aliado fronte ó sol, xa que reducen a probabilidade e a intensidade das queimaduras ó bloquearen os raios ultravioletas (UV).
Os efectos secundarios dunha exposición ó sol excesiva e sen protección son queimaduras cutáneas, avellentamento prematuro, melanomas…
A pel ten memoria e os danos acumúlanse.
Para acadar unha cor duradeira e non castiga-la pel, cómpre exporse ó sol de maneira gradual e con protección.

Cómo elixi-lo bronceador

Antes de adquirir un fotoprotector, comprobe que incorpora filtros de protección anti raios UVB -responsables do bronceado, pero tamén de eritemas e queimaduras- e anti UVA -dan axiña cor, pero provocan engurras, manchas, fotoavellentamento e procesos cancerosos-.
Hai unha gran diferencia entre atoparse no curuto dunha montaña ou veranear na praia. O efecto dos raios ultravioletas faise máis potente nas alturas, o que significa que é preciso protexerse cunha crema solar de factor elevado, que supere o número 15. Canto máis verticalmente incidan os raios do sol sobre a pel, máis perigosos serán e máis precaucións cumprirá tomar.
Se a túa pel é clara, sensible ou ten tendencia á cuperose debes utilizar factores de protección altos (de 30 a 15). Se pertences ó grupo dos que aturan ben o sol (peles normais ou morenas) podes aplicar cremas cun Índice de Protección Solar (IPS) menor de 15.
Os dermatólogos insisten en que menos dun 20 de IPS non é recomendable. E é que, en contra do que poida parecer, un índice de protección alto non só non impide pórse moreno, senón que proporciona un bronceado máis duradeiro e a pel non sofre.
Utilice cremas cun índice máis alto e ingredientes activos antiengurras nas zonas máis sensibles do corpo: cara, beizos, escote…

Nenos, adolescentes e anciáns

Extreme as precaucións con nenos, adolescentes e anciáns. Non expoña os cativos ó sol antes dos tres anos e utilice para eles protectores solares especiais, de alto índice (máis de 25) e resistentes á auga. Renove a miúdo a aplicación do producto e protéxaos con camiseta, gorro e gafas. Tome as mesmas medidas de protección cos anciáns.
Os adolescentes con acne non deben descoida-la protección por creren que o sol vai “secar” os grans. É moi frecuente a recaída das peles acneicas trala exposición.
Non dubide en aplicar cremas con pantalla total se a súa pel é sensible, ten cuperose, pecas, manchas ou cicatrices recentes.

Cómo aplica-lo bronceador

Aplique a crema protectora coa pel seca uns trinta minutos antes da exposición solar e de maneira abundante. Renove a aplicación da crema cada dúas horas e cada vez que tome un baño.
Se lle gusta bañarse a miúdo, utilice productos resistentes á auga. Os waterproof garanten a protección indicada no envase tras 80 minutos de inmersión na auga. Os water resistant soamente 40 minutos.
Nunca utilice nin limóns, nin refrescos nin cervexa nin calquera outro producto como bronceador, xa que amais de non ofreceren protección, poden aumenta-la fotosensibilidade e incrementa-lo dano solar de xeito desproporcionado.
Non tome o sol con restos de maquillaxe ou perfume sobre a pel, poden aparecer manchas.

Coidado coa auga e a area

Lembre que a auga e a area reflicten os raios solares un 50% e un 35% respectivamente, aumentando os seus efectos nocivos sobre a pel.
Evite exporse ó sol entre as 12h e as 16h, intervalo en que os raios chegan verticalmente e, polo tanto, a radiación UVA e UVB (a ultravioleta) é máis forte.
Protexa a pel tamén os días anubrados. As nubes finas non filtran os UVB, principais responsables das queimaduras.
Non deixe de aplica-la crema protectora aínda que xa estea bronceado. Aínda que a pel morena actúa como unha barreira natural fronte ás queimaduras, non acontece o mesmo cos raios ultravioleta, que penetran na pel producindo danos celulares.
Non se pulverice con auga para refrescarse mentres toma o sol, as pingas actúan como lupas sobre a pel e poden acelera-la aparición de queimaduras.

Conservación das cremas

Os protectores solares teñen unha duración aproximada dun ano. Pasado ese tempo pódense tornar ineficaces e provocar reaccións na pel, sobre todo se estiveron na praia ou no coche sometidos a altas temperaturas, xa que os filtros non son estables e se degradan.

Conserve as súas cremas en perfecto estado limpando os envases de restos de producto e area despois de cada uso, e gardándoas nun lugar fresco e seco.

Se ten algunha crema do verán anterior, repare en se mudou de cor, textura ou aroma. Se cre que a súa composición non se viu alterada, pode utilizala sen problema.