O mellor, un dos máis baratos
Analizáronse oito secadores de pelo iónicos de 1.800 W e de 2.000 W que custan desde os 24 euros de Polti ata os 40 euros de Solac. A mellor relación calidade-prezo preséntaa a segunda mostra máis barata, Taurus (30 euros), que ofrece unha boa calidade global e foi a mellor valorada polos usuarios.
Pero, en que consiste a tecnoloxía iónica? Cepillar o pelo, secalo cunha toalla ou a contaminación cargan o noso cabelo de electricidade estática, o que acaba por abrir as escamas do pelo e darlle un aspecto encrespado, amais de dificultar o peiteado. Para contrarrestar este fenómeno, os secadores iónicos, xunto ó fluxo de aire quente, xeran ións negativos que, segundo os fabricantes, neutralizan a electricidade estática e suavizan o pelo, axudando a que luza brillante e a que sexa bo de peitear. Ademais, estes secadores pulverizan as moléculas de auga ata convertelas en micropartículas tan miúdas que son capaces de atravesar a capa externa do cabelo e hidratar a cutícula. A velocidade de secado disque tamén é máis rápida ca cos equipos convencionais.
Non se atoparon diferenzas significativas no tamaño dos secadores. Todos eles son pequenos e manexables: o máis grande, Taurus, só é un 20% máis voluminoso có máis pequeno, Ufesa (20,3 x 23 x 8,4 cm). No peso si houbo diferenzas significativas: seis das mostras andan arredor do medio quilo, mentres que BJM e Taurus pesan case o dobre có resto.
Potencia menor cá anunciada
Os oito funcionan enchufados á rede eléctrica, sen baterías e din contar cunha potencia de 2.000 W, salvo BJM e Polti, que anuncian só 1.800 W. Así e todo, a proba real demostrou que o seu consumo eléctrico é, nalgúns casos, moi inferior ó indicado: desde os 140 W menos que ofrece Fagor nas medicións ata os 320 W menos de BJM. Isto, dunha banda, resulta positivo, pois indica un menor consumo eléctrico, pero, doutra, significa que o equipo ofrece unha potencia inferior á anunciada. Agora ben, todas as mostras cumpren a norma, xa que a lei nada indica sobre os equipos que contan cunha potencia inferior á declarada.
Canto máis longo sexa o cable, máis sinxelo e cómodo resultará o manexo do secador, pois o usuario contará cunha maior liberdade de movementos. O cable máis longo ofréceo Taurus, con 305 centímetros, seguido por Solac (295 cm) e BJM (288 cm); o resto foron moi semellantes e roldaron os 180 cm.
Os oito secadores ofrecen unha reixa traseira desmontable para facilitar a súa limpeza, unha asa para colgalo da parede, tres niveis de regulación da temperatura (catro de se contar o aire frío, útil para fixar o rizo) e dúas velocidades de caudal de aire. Fagor suma unha segunda posición de aire frío, mentres que Polti non conta cunha posición fixa para o aire frío, o que obriga a estar presionando continuamente un botón para esta función. Polti, BJM e Ufesa dispoñen da función “Turbo”, que aumenta a potencia uns segundos. BJM, o máis pesado, é o único equipo que non é de plástico, senón metálico con acabado en cobre. Os mangos de Solac e Ufesa, a diferenza do resto, non son antiescorregantes, pero o de Ufesa ten ó seu favor que pivota 90º, facendo máis cómodo o seu uso.
No tocante á tecnoloxía iónica (que disque suaviza, hidrata e evita que o pelo se encrespe), en Philips, Fagor, BJM e Solac actívase mediante un interruptor, polo que son capaces de emitir aire quente non-ionizado, a diferenza dos outros catro, nos que a emisión de ións negativos é constante. Polti e Ufesa son os dous únicos que non dispoñen dun indicador para avisar que se está emitindo aire ionizado.
Accesorios para peiteados
Amais da función obvia de secar o cabelo e previr así arrefriados, un secador de pelo é un instrumento útil para acadar diferentes peiteados, para o cal se tornan esenciais os accesorios subministrados. Os oito incorporan un concentrador de aire (unha boca que dirixe e concentra o fluxo á zona desexada) que se emprega habitualmente para alisar o pelo. BJM é o único sen difusor de aire, accesorio coa función oposta á anterior, é dicir, que reparte o aire ó longo de todo o coiro cabeludo e que lle confire maior volume ó cabelo. O difusor de Vidal Sassoon posúe nodos retractables e Ufesa inclúe dous difusores: un convencional e un segundo chamado “Ultra look” con varias saídas que se poden xirar en diversas posicións. Pero, sen dúbida, o equipo máis completo neste apartado é Taurus: amais do concentrador e do difusor, inclúe un cepillo redondo, un cepillo semicircular, un peite, dúas pinzas e un neceser.
Proba de uso
Seis usuarias habituais desta clase de aparellos, con melena ou media melena, probaron os secadores e puntuaron diferentes aspectos e funcións do un ó dez. Tamén probaron tres secadores convencionais (é dicir, non iónicos) para valorar se esta novidosa tecnoloxía é tan positiva como anuncian os fabricantes.
Todos os secadores recibiron de media boas valoracións. Fagor, Taurus, Vidal Sasoon e Solac acadaron, ademais, os sete puntos en “aspectos funcionais” (que engloba os parámetros máis importantes: eficacia e rapidez do secado, ruído xerado, eficacia no alisado de pelo…). Taurus obtivo as puntuacións máis altas en eficacia (8 puntos sobre 10) e rapidez do secado (8,2 puntos), resultado sobre o cabelo (7,5 puntos) e facilidade e comodidade de uso (7,8 puntos), utilidade dos accesorios (8,2 puntos) e eficacia do concentrador de aire (7,7 puntos). Os secadores son, polo xeral, ruidosos, pero Vidal Sasoon e BJM foron máis ruidosos có resto. Ufesa suspendeu o apartado de facilidade de almacenamento e transporte.
Os manuais máis claros e completos foron os de Philips e Solac. Solac tamén ofrece os botóns máis útiles e fáciles de usar. BJM recibiu as puntuacións máis baixas en todos os ítems valorados en “uso xeral” e suspendeu polo seu excesivo peso. Vidal Sasoon é o que, a teor das usuarias, ten un tamaño máis adecuado. En definitiva, todos obtiveron boas valoracións, aínda que con diferenzas. Taurus (7,6 puntos sobre 10) e Solac (7,4 puntos) foron os mellores. A puntuación máis baixa recibiuna BJM (6,2 puntos), seguido de Polti (6,7 puntos) e Ufesa (6,6 puntos). O resto superou lixeiramente os 7 puntos.
Os ións son útiles?
Tan importante como comparar os secadores iónicos entre si é medilos fronte ós equipos non-iónicos para comprobar se pagar algo máis por esta tecnoloxía paga a pena. Só a metade das usuarias percibiu mellores resultados cos secadores iónicos e foron as que tiñan o cabelo máis fino e liso as que máis notaron a redución na carga estática. No caso dos outros beneficios publicitados (hidratación, brillo e suavidade) os resultados son aínda peores: só un terzo das usuarias notou unha maior hidratación e brillo no cabelo.
Os oito equipos superaron en todos os casos as durísimas probas de seguridade ás que foron sometidas. BJM non cumpre a norma porque é o único secador que non supera o test de compatibilidade electromagnética, polo que lles pode xerar interferencias a outros aparellos eléctricos enchufados na mesma rede, como, por exemplo, unha radio. A documentación e a garantía que acompaña a cada equipo é correcta, ata o punto de que hai unha mostra, Taurus, que non só ofrece os dous anos de garantía preceptivos senón que ata os aumenta a un terceiro que abrangue unicamente os materiais.
Son tan resistentes e duradeiros como deberían? Para calculalo fixéronse dúas probas. Dunha banda, os secadores foron sometidos a un ciclo de 15 minutos de funcionamento seguidos de 30 minutos de parada á máxima temperatura e velocidade de aire. Estimouse que o uso real destes equipos será dunha media de tres veces por semana e parouse o test se a mostra alcanzaba os cinco anos e medio de funcionamento simulado. BJM deixou de dar aire quente tras uns dous anos e medio de funcionamento simulado, mentres que o resto chegou ó final da proba funcionando correctamente, polo que, en principio, todos agás BJM deberían durar polo menos cinco anos e medio.
Doutra banda, é imprescindible que un equipo destas características poida resistir e seguir funcionando tras unha caída fortuíta. A norma esixe que sigan funcionando tras tres caídas desde 90 centímetros de altura sobre unha superficie de madeira contrachapada. Aínda que algún sufriu danos, como o desprendemento da reixa traseira, os oito seguiron funcionando tras a proba.
En síntese e táboa comparativa
En síntese
- Analizáronse oito secadores de pelo con tecnoloxía iónica que custan desde os 24 euros de Polti ata os 39,93 de Solac. Contan con 1.800 W e 2.000 W.
- Os secadores iónicos emiten ións negativos que supostamente fan que o cabelo seque máis axiña, evitan que o pelo se encrespe, hidrátano e proporciónanlle maior brillo e suavidade ó cabelo. Agora ben, só as usuarias de pelo máis liso e fino notou melloría con respecto ós cabelos convencionais (3 usuarias de 6).
- Todos os equipos son seguros, teñen as garantías correctas e inclúen útiles e completos manuais. BJM pode causar interferencias en equipos conectados á mesma rede eléctrica.
- Vidal Sassoon e BJM son especialmente ruidosos. Todos son resistentes ás caídas e teñen unha vida útil de máis de cinco anos e medio, agás BJM, que se estraga ó cabo de dous.
- BJM e Taurus pesan case o dobre có resto. Philips, Fagor, BJM e Solac poden emitir aire convencional ou cargado de ións negativos, a diferenza dos máis, que só contan con esta segunda posición. En todos os equipos, a potencia real é inferior á publicitada, especialmente en BJM.
- Na proba de uso, as valoracións oscilaron entre os 6,2 puntos sobre 10 de BJM e os 7,6 puntos de Taurus.
- A mellor relación calidade-prezo é Taurus Fashion Professional 2100 Ionic, o segundo máis barato e o mellor na proba de uso.
| Marca Modelo |
TAURUS 2100 Ionic | POLTI Profesional IoNon 3000 | PHILIPS “HP 4883 JetSet Control Ion” | VIDAL SASSOON Attitude |
|---|---|---|---|---|
| Prezo (euros) | 30,31 | 24 | 32,29 | 35 |
| Información e protección ó consumidor | Correcto | Correcto | Correcto | Correcto |
| Seguridade eléctrica | Correcto | Correcto | Correcto | Correcto |
| Compatibi- lidade electromag- nética |
Correcto | Correcto | Correcto | Correcto |
| Características técnicas | ||||
| Dimensións LxAxH (cm) | 24,5 x 21,5 x9 |
21 x 22,5 x9,1 |
22,5 x 23 x8,3 |
21×23 x8,8 |
| Peso (g) | 810 | 575 | 580 | 565 |
| Potencia declarada (W) | 2000 | 1800 | 2000 | 2000 |
| Potencia medida (W) | 1760 | 1600 | 1750 | 1720 |
| Lonxitude do cable (cm) | 305 | 174 | 188 | 184 |
| Fluxo extra de aire | Non | Sí | Non | Non |
| Interruptor ionizador aire | Non | Non | Sí | Non |
| Indicador ionizador aire | Sí | Non | Sí | Sí |
| Empuñadura anties- corregante |
Sí | Sí | Sí | Sí |
| Resistencia | Correcta | Correcta | Correcta | Correcta |
| Vida útil | Satisfac- toria |
Satisfactoria | Satisfac- toria |
Satisfactoria |
| Proba de uso (de 1 a 10) | 7,6 | 6,7 | 7,2 | 7,1 |
| Calidade global | Boa | Boa | Boa | Boa |
| Marca Modelo |
FAGOR SP-2004 Ion TechNonlogy | SOLAC Ionic Silent 2000 | UFESA Futura SC8370 Ion-Pro | BJM Windy Ionic System Prof |
|---|---|---|---|---|
| Prezo (euros) | 36,95 | 39,93 | 38,22 | 35 |
| Información e protección ó consumidor | Correcto | Correcto | Correcto | Correcto |
| Seguridade eléctrica | Correcto | Correcto | Correcto | Correcto |
| Compatibi- lidade electromag- nética |
Correcto | Correcto | Correcto | Incorrecto |
| Características técnicas | ||||
| Dimensións LxAxH (cm) | 23×22,5 x8,3 |
22,5 x 21,5 x9 |
20,3×23 x8,4 |
21,5×23 x8,2 |
| Peso (g) | 525 | 645 | 565 | 950 |
| Potencia declarada (W) | 2000 | 2000 | 2000 | 1800 |
| Potencia medida (W) | 1860 | 1760 | 1710 | 1480 |
| Lonxitude do cable (cm) | 181 | 295 | 182 | 288 |
| Fluxo extra de aire | Non | Non | Sí | Sí |
| Interruptor ionizador aire | Sí | Sí | Non | Sí |
| Indicador ionizador aire | Sí | Sí | Non | Sí |
| Empuñadura anties- corregante |
Sí | Non | Non | Sí |
| Resistencia | Correcta | Correcta | Correcta | Correcta |
| Vida útil | Satisfactoria | Satisfactoria | Satisfactoria | Baixa |
| Proba de uso (de 1 a 10) | 7 | 7,4 | 6,6 | 6,2 |
| Calidade global | Boa | Boa | Boa | Insuficiente |
Un por un
Un por un, 8 secadores de pelo iónicos
Taurus "Fashion professional 2100 Ionic"
Calidade global: boa.
A mellor relación calidade-prezo. Só emite aire ionizado. O máis grande (aínda que só un 21% máis có máis pequeno) e o segundo máis pesado (810 g). O seu cable é o máis longo (305 cm). O maior número de accesorios, con diferenza.
Proba de uso: 7,6 puntos de 10, o mellor. O secado máis rápido e eficaz. Tamén o mellor valorado no resultado sobre o cabelo, na facilidade de uso e na utilidade dos seus accesorios.
Polti "Profesional Iono 3000"
Calidade global: boa. Só emite aire ionizado. O cable máis curto (174 cm).
Proba de uso: 6,7 puntos de 10. O máis discreto en eficacia e rapidez de secado.
Philips "HP 4883 JetSet Control Ion"
Calidade global: boa. Pode emitir aire convencional ou ionizado.
Proba de uso: 7,1 puntos de 10. Gusta polo seu deseño, dimensións, peso e porque é bo de almacenar.
Fagor "SP-2004 Ion Technology"
Calidade global: boa. Pode emitir aire convencional ou ionizado. O máis lixeiro (525 g). Proba de uso: 7 puntos de 10. Destaca por ser bo de almacenar, pero recibe a puntuación máis baixa en eficacia do concentrador para alisar o pelo.
Solac "Ionic Silent 2000"
Calidade global: boa. Pode emitir aire convencional ou ionizado. A súa empuñadura non é antiescorregante.
Proba de uso: 7,4 puntos de 10, o segundo mellor. O mellor en claridade e utilidade do seu manual e pola utilidade dos seus mandos.
Ufesa "Futura SC8370 Ion-Pro"
Calidade global: boa. Só emite aire ionizado. O máis pequeno (20,3x23x8,4 cm). A súa empuñadura non é antiescorregante.
Proba de uso: 6,6 puntos de 10. Suspende en facilidade de almacenamento e recibe a puntuación máis baixa en rapidez de secado.
BJM "Windy Ionic System Prof"
Calidade global insuficiente. Pode emitir aire convencional ou ionizado. O máis pesado (950 g). Pode chegar a crear interferencias en equipos conectados á mesma rede eléctrica (incumpre a norma). Resulta especialmente ruidoso. Deixa de emitir aire quente ó cabo de dous anos e medio de uso simulado (o resto segue funcionando ó cabo de cinco).
Proba de uso: 6,2 puntos de 10, o peor. O máis discreto en facilidade de uso, utilidade de accesorios, claridade do manual, utilidade dos mandos, e mais en deseño, dimensións e peso do equipo.