O bazar bancario

O bazar bancario

/imgs/20061101/img.economia.01.jpg

Seguro que algunha vez se sentiu tentado de acudir ó seu banco a contratar ese depósito que non deixan de anunciar soamente para levar a vaixela, a cafeteira ou o reprodutor .mp3 de moda que a entidade se compromete a regalarlle. Este tipo de obsequios son o que na linguaxe bancaria se denomina remuneración en especie e substitúen ós populares tipos de xuro. O banco ou caixa en cuestión dálle ó cliente o regalo no canto de ofrecerlle unha cantidade de cartos para ingresar na súa conta corrente. O outono e mais a primavera son as dúas tempadas nas que bancos e caixas avivan as súas promocións.

Como obter un regalo bancario?

As entidades saben que ofrecer un agasallo a quen contrate un depósito, unha conta, un fondo de investimento ou un fondo de pensións, por pór algúns exemplos, é un incentivo moi eficaz para ganar clientela. De aí que continuamente bancos e caixas traten de atraer a usuarios con vaixelas, cuberterías, ferros de pasar, cafeteiras, teléfonos ou dvd para que contraten o produto que toque. Esta práctica, que se remonta á década dos 80, segue a estar vixente hoxe.

/imgs/20061101/img.economia.02.jpg

O sistema é ben sinxelo: a persoa interesada elixe o produto financeiro que o banco ou caixa ten en promoción e, ó pouco tempo, o cliente recibe na casa ou na súa sucursal bancaria o regalo elixido. Pero, resulta de verdade rendible acollerse a este tipo de promocións? Para darlle resposta a esta cuestión, convén coñecer o prezo de mercado do regalo que a entidade publicita e o tipo de xuro que representa. É interesante calcular se cos xuros en efectivo se podería mercar o regalo no mercado ou non serían abondos. Neste último caso, si que resultaría interesante acollerse á promoción. Isto adoita ser habitual porque as entidades conseguen os regalos a prezo de custo e a miúdo repercútenllelos ós clientes a prezos algo máis baixos ca ó que se atopan no mercado.

Tamén é aconsellable comprobar o xuro medio que están ofrecendo as entidades no momento actual e comparalo co da promoción en cuestión. Se pode atopar un depósito ou unha conta cun tipo de xuro realmente máis alto, será mellor optar pola remuneración en efectivo. Por exemplo, na actualidade a rendibilidade media dos depósitos sitúase no 2,9%. Así e todo, hai numerosas entidades que ofrecen depósitos a un tipo de xuro máis elevado, de ata o 4% TAE a un ano (as ofertas máis interesantes atópanse en maior medida nas entidades online).

Coidado coas penalizacións

En calquera caso, todas as promocións que supoñen a entrega dun regalo a cambio de ingresar diñeiro nun produto bancario impoñen certas condicións, como manter o aforro un determinado tempo (os prazos van desde os 3 meses ata varios anos). Se o cliente incumpre este requisito e desexa sacar os cartos antes de tempo, as entidades contan con elevadas penalizacións (de ata o 3%). Isto é o que se denomina comisión de cancelación anticipada. Con esta tarifa, a entidade pode recuperar con creces o prezo do regalo en cuestión que o cliente xa ten na casa.

A quen lle interesan os regalos bancarios?

Para moitos clientes bancarios, recibir un regalo por facer un ingreso na súa conta corrente é unha opción máis atraente ca obter un pequeno xuro polos seus cartos. Pero o que non é tan coñecido é que estes regalos tamén tributan, aínda que a súa fiscalidade é moi particular. De feito, por recibir unha vaixela, unha cafeteira ou un espremedor dunha promoción dunha entidade financeira hai que renderlle contas a Facenda.

Que fiscalidade teñen os regalos bancarios?

Facenda considera que o importe dos regalos que reciben os clientes dunha entidade financeira é rendemento de capital mobiliario (segundo a lei fiscal, considéranse rendementos íntegros de capital mobiliario a totalidade de utilidades ou de contraprestacións que proveñan de elementos patrimoniais, bens ou dereitos de natureza mobiliaria dos que é titular o contribuínte e que non están suxeitos a actividades económicas realizadas por el mesmo). O importe do regalo que recibe un cliente bancario considérase para os efectos fiscais rendemento de capital mobiliario, suxeito a tributación e a ingreso a conta do 15%. Para calcular o ingreso a conta do devandito 15%, a entidade financeira toma como valor do regalo o prezo de custo, polo tanto ten que informar o cliente do valor deste regalo e tamén do xuro TAE que suporía en caso de que o que lle ofrecesen fose retribución en cartos ou en efectivo.

Integrarase como rendemento de capital mobiliario o resultado de incrementarlle ó valor de mercado do regalo o ingreso a conta realizado a cargo da entidade. O ingreso a conta obterase do cálculo do 15% do valor de mercado da retribución en especie.

Cun sinxelo exemplo pódese comprender mellor a explicación: o Banco X regálalle a un cliente que contrata un plan de pensións un microondas, que ten de prezo de mercado 85 euros. Como sobre o valor do regalo Facenda ten que realizar o ingreso a conta, hai que calcular o 15% de 85, é dicir, 12,75 euros, a cantidade que reterá Facenda na próxima Declaración da Renda do contribuínte por obter este regalo.

Na súa próxima declaración do IRPF, o cliente deberá recoller como un ingreso de capital mobiliario a suma do regalo da entidade máis o importe que realizou no banco. O ingreso a conta será a retención que leva Facenda. Polo tanto, aínda que se trata dun regalo, todo cliente terá que pagar a retención fiscal correspondente a esa remuneración en especie.

Todas as entidades inclúen a tributación dos seus regalos bancarios no seu extracto de información fiscal, que están obrigadas a proporcionarlles ós seus usuarios cando se achega a campaña do IRPF. Nese extracto deberá vir especificada a cantidade concreta do correspondente ingreso a conta que se lle paga ó fisco.

A oferta de agasallos bancarios

Entidade	Regalo que ofrece	Produto que hai que contratar	Importe ou condicións esixidas
Caja Madrid	Xogo wok e tixola	Plan de pensións	Traspasar ou ingresar máis de 2000 euros
	Balón oficial Champions League	Tarxeta champions Caja Madrid	Facturar 50 euros en comercios antes do 30/11/06, ou ata fin de existencias
La Caixa	Reloxo exclusivo Antonio Miró	Depósito Nómina 10	2.500 euros
	Blablaboli (gravadora de voz-bolígrafo)	Ingresar cartos na Megalibreta Estrela	–
	Xogo de 6 vasos e xerra	Depósito	800 euros
	Guitarra eléctrica, televisores, teléfonos sen fíos, vaixelas, cuberterías, cristalerías	Depósito Estrela	Desde 1.000 euros
Caixa Catalunya	Albornoz	Domiciliar nómina e recibos	–
	MP3	Domiciliar nómina e recibos
Ibanesto	Ipod nano 2MG	Domiciliar nómina	Nómina superior a 800 euros/mes
Banco del Deporte	Cámara dixital 6 megapixels	Domiciliar nómina	Nómina superior a 800 euros/mes
Kutxa	TV y DVD	Depósito a prazo	15.000 euros
	Cámara dixital	Depósito a prazo	12.000 euros
	DVD gravador	Depósito a prazo	7.400 euros
Caja Vital	Termo aceiro	Facer achegas a un plan de pensións	2.000 euros
	Trade percutora	Facer achegas a un plan de pensións	18.000 euros
	Cafeteira hidropresión	Facer achegas a un plan de pensións	24.000 euros
	Microcadea de música	Facer achegas a un plan de pensións	30.000 euros
BBVA	Set nórdico de 5 pezas	O Libretón	2.800 euros

Entidade	Prazo do investimento	Prezo de mercado do produto	Tipo de xuro que representa
Caja Madrid	Manter os cartos polo menos 6 meses	30 euros	–
	–	30 euros	–
La Caixa	15 meses e 16 días	60 euros	0,66%-16,04
	–	30 euros	–
	12 meses	15 euros	2,37%
	18 meses	Variable en función do regalo	3-2%
Caixa Catalunya	Manter a nómina polo menos 12 meses	30 euros	–
	Manter a nómina polo menos 24 meses	50 euros
Ibanesto	Manter a nómina polo menos 24 meses	250 euros	1,3
Banco del Deporte	Manter a nómina polo menos 24 meses	150 euros	1,56
Kutxa	Un ano	550 euros	2,88
	Un ano	300 euros	2,87
	Un ano	250 euros	2,89
Caja Vital	Polo menos un ano	30 euros	1,5
	Polo menos un ano	100 euros	2,19
	Polo menos un ano	150 euros	2,44
	Polo menos un ano	200 euros	2,56
BBVA	4 meses	60 euros	4,18