Respectan a normativa, pero pensan pouco no usuario

Respectan a normativa, pero pensan pouco no usuario

Cando decidimos reducir no posible os gastos do noso fogar, atopámonos con que algúns deles, como os relacionados coa electricidade, a auga, o gas e a telefonía, parecen irreductibles. Cada dous ou tres meses recibimos nos nosos fogares diversas facturas, e o máis habitual é que as aboemos sen reflexionar ata cánto ascendeu o noso consumo, agás cando a cantidade nos semella excesiva en comparación con anteriores recibos. Este comportamento débese, en parte, ó indescifrables que resultan estas facturas, nas que non sempre aparece a información máis relevante para o consumidor dunha maneira clara e comprensible. Sen dúbida, é difícil determinar qué parte destes gastos é imprescindible e cál poderiamos controlar.

CONSUMER analizou, desde a perspectiva de legalidade xurídica e desde un enfoque de utilidade para o usuario, unha ducia de facturas (tres de compañías eléctricas, dúas de subministradoras de gas, catro de operadoras de telefonía e tres de empresas de xestión da auga). Detectáronse importantes diferencias nos criterios de presentación dos datos, mesmo en facturas de compañías do mesmo sector. E comprobouse que, malia a que tódalas facturas cumpren os requisitos legais, resultan pouco claras, escasamente áxiles e atractivas na súa presentación, se ben hai excepcións.

Por sectores, as facturas que mellor superaron o exame de CONSUMER foron as das empresas enerxéticas: electricidade e gas. As peores foron as de auga, e as de telefonía quedan nun termo medio. Por empresas, destacaron positivamente Iberdrola (electricidade) e Jazztel (telefonía), e demostraron unhas facturas menos aceptables Telefónica e Aljarafesa (Sevilla) e Aigües de Barcelona (as dúas subministradoras de auga). A lectura destes documentos de cobro resulta confusa pola ausencia de contrastes e recadros e por uns tamaños de letras excesivamente pequenos. Aínda que detallan os conceptos da factura, a miúdo non explican os conceptos que se cobran. E non todas presentan gráficos co historial de consumo das últimas facturas, aínda que a maioría ofrece o consumo medio en pesetas dalgún período de facturación, moi útil para compara-la evolución do consumo.

Por outra banda, tódalas facturas inclúen un teléfono de atención ó cliente, pero a chamada case nunca é gratuíta para o usuario e no 75% dos casos o horario deste servicio está limitado a unha franxa horaria, cando o ideal sería un servicio 24 horas.

Outro importante defecto das facturas estudiadas é que a miúdo hai que busca-lo importe total que hai que aboar entre outras moitas cifras e informacións, cando este é o dato que máis lles interesa ós consumidores, polo que se debería resaltar.

Electricidade

Malia a que é un servicio que prestan varias compañías en España, o usuario aínda non pode elixi-la empresa que lle subministra electricidade, que se lle impón en función dun único criterio: a zona xeográfica na que está emprazado o seu domicilio. Ademais, tódalas empresas ofrecen prezos fixos, establecidos polo Goberno. Por estes dous motivos, o aforro que poidamos conseguir no gasto por electricidade irá ligado a unha elección atinada do tipo de tarifa e a un consumo razoable.

Hai varias tarifas (1.0, para pequenos locais; 2.0, para unha vivenda normal; 2.0 N, para quen está subscrito á tarifa nocturna; 3.0, para empresas…). A máis habitual nos fogares é a tarifa 2.0. Dentro dela, podemos contratar desde 0,77 ata 15 quilovatios.

Calcula-lo custo O titular da factura que se amosa como exemplo ten contratados 4,4 quilovatios.

• Potencia contratada: cantidade fixa, págase en función da potencia contratada. Abóase sempre, aínda que non consumamos nada. Se empregamos ó mesmo tempo varios aparellos eléctricos e a nosa potencia contratada non é abonda, o “automático” saltará. 4,4 kW (potencia contratada polo titular) x 242 pesetas (prezo do kW ó mes, cantidade fixada polo Goberno) x 2 (meses)= 2.130 pesetas
• Enerxía consumida: cantidade variable, depende da electricidade consumida. 306 kWh (electricidade consumida) x 13,18 (prezo do kW ó mes, fixado polo Goberno) x 2 (meses) = 4.201 pesetas
• Imposto sobre electricidade: cantidade variable, que se paga segundo o consumo. Serve para subvenciona-la minería do carbón. Fórmula fixa: 4,864% (imposto de electricidade) x s/6.331 pesetas (resulta de suma-lo gasto da potencia contratada máis o da enerxía consumida) x 1,05113 (coeficiente fixo) = 324 pesetas
• Alugueiro dos equipos de medida: cantidade fixa. A cambio, a empresa está obrigada a realiza-lo mantemento e as reparacións do contador. 108 pesetas (tarifa do alugueiro do contador e do interruptor) x 2 meses = 216 pesetas

Gas

O gas natural canalízase ata o domicilio do usuario e abóase xeralmente cada dous meses en función da tarifa e o consumo. O gas non sempre chega ó noso fogar coa mesma calidade, nalgunhas rexións é máis puro e o seu poder calorífico varía. Por iso, o Goberno fixa as tarifas do gas en termias (unidade de medición de calor). As subministradoras aplícanlle á cantidade de gas consumida polos clientes o factor de conversión do poder calorífico. Esta cifra difire en cada rexión e multiplícase polos metros cúbicos de gas consumidos. Así, sempre nos cobran o mesmo por cada termia, independentemente da calidade do gas.

As tarifas para usos domésticos son a D1 (para vivendas sen caldeira de calefacción individual), a D2 (para casas con calefacción individual por caldeira de gas) e a D3 (para grandes consumos, como a calefacción colectiva dunha comunidade de veciños).

A nosa análise das facturas do gas

GasAndalucía. Cádiz, Córdoba, Granada, Huelva, Xaén, Málaga e Sevilla. Clara, con detalle da facturación, aínda que só figura en euros o importe total. Tres teléfonos de atención ó cliente (información e xestións, lecturas e urxencias), aínda que non informa da franxa horaria deste servicio. Sinala o enderezo da súa páxina web, pero non do correo electrónico. Gráfico co historial de consumo do último ano. Bótase en falta información explicativa dos conceptos facturados. Non aparece o consumo medio en pesetas nin en kWh/día do período de facturación, aínda que si o anual (só en pesetas).

Gasnalsa. Vitoria Clara, con detalle da facturación, pero só se sinala en euros o importe total. Catro teléfonos de atención ó cliente (central, atención ó cliente, lecturas e avarías e emerxencias). Gráfico co historial do consumo do último ano. Emprega a parte traseira da factura para recomendacións. Bótase en falta información explicativa dos conceptos facturados. Non indica web nin e-mail. Non sinala o consumo medio en pesetas nin en kWh/día do período de facturación, nin tampouco o anual. Non informa da franxa horaria do servicio de atención ó cliente.

Teléfono

As tarifas, a diferencia do que acontece coas eléctricas e coas do gas natural, varían dunha operadora a outra. Podemos elixi-la operadora coa que efectuármo-las chamadas. Dependendo do tipo de chamada e da empresa contratada, aforraremos ata un 50% no prezo dalgunhas conexións. Pero aínda oito de cada dez consumidores españois operan exclusivamente con Telefónica, e só un 10% utiliza, amais de Telefónica, outra compañía.

A nosa análise das facturas telefónicas

Jazztel Unha das mellores en claridade e transparencia da información, por detallada e analizada. Tanto o importe total como a base impoñible analízanse nos conceptos que os compoñen. Inclúe historial de consumo, explicación da factura por esquema e detalle de zonas internacionais. A información de análise das chamadas, moi clara: separa as chamadas interprovinciais das de fixo a móbil e ofrece información do prezo medio de cada tipo de chamada. Na parte traseira, incorpora consellos para interpreta-la factura. Non informa do horario do servicio de atención ó cliente.

Retevisión Detalla os servicios facturados e a base impoñible do IVE. Contén historial de consumo, explicación da factura esquematizada e separación en tipo de chamadas. Na parte traseira, indica instruccións para interpreta-la factura. Ofrece un gráfico que representa o consumo en cada período de facturación. Atención ó cliente, 24 horas. Letra da factura demasiado pequena. Información cronolóxica sobre o consumo; sería mellor seguir criterios máis útiles, como unha división polo tipo de chamada. O detalle de consumo non aparece na primeira folla.

Uni2 Detalla os servicios facturados (por chamadas interprovinciais e chamadas a móbiles). Distingue o total da base impoñible e o IVE, informando da conversión a euros. Teléfono gratuíto de atención ó cliente, pero non indica a franxa horaria de funcionamento. A súa páxina web resulta moi útil para analiza-lo consumo. Moi boa aselección dos 10 números máis chamados e o seu custo. Tamén ofrece un gráfico do historial do consumo (detallado nos seis últimos meses). Letra pequena que dificulta a lectura. Faltan cores que melloren os contrastes, e instruccións para entende-la factura.

Telefónica Detalla a cota por período e o importe dos servicios contratados, incluíndo o de tódolos tipos de chamada e doutros consumos e descontos. Inclúe o importe medio de consumo diario. A segunda páxina refire o detalle de chamadas automáticas. Varios teléfonos de atención ó cliente ós que dirixirse. Inclúe enderezo de páxina web. Factura moi detallada pero monótona, debido á ausencia de cores e contrastes. Vese de xeito moi claro o importe que hai que aboar. A orde das chamadas, cronolóxica. Sen gráfico do historial de consumo. Bótase de menos a información de a qué compañía de teléfono móbil se dirixe cada chamada.

Auga

O abastecemento doméstico da auga ofrece prezos moi distintos dunha cidade a outra. As tarifas dependen da empresa que opera no lugar de residencia do usuario, que non pode elixir provedor. Polo tanto, o aforro nesta factura trimestral está ligado a un uso racional da auga.

Cota de investimento: para o mantemento dos sumidoiros ou infraestructuras hidráulicas.

A nosa análise das facturas da auga

Aljarafesa (Sevilla) Cumpre a normativa. Servicio de atención ó cliente, de 9 a 21 horas. Factura pouco atraente e monótona, por ausencia de cores e contrastes. Facturación detallada, pero non está en euros ningún importe. Bótase de menos información explicativa dos conceptos facturados. Pouca claridade e letra de tamaño minúsculo na parte inferior da factura. Sen web nin correo electrónico. Non aparece o consumo medio dalgún período de tempo. Non hai gráfico co historial de consumo do último ano.

Aigües de Barcelona Cumpre a normativa. Factura detallada, pero só figura en euros o importe final. Teléfono de atención ó cliente de 8 a 20 horas, aínda que un teléfono de avarías funciona as 24 horas. Informa na parte traseira sobre atención ó cliente. Deseño pouco atraente, sen cores nin cadros que separen os conceptos. Non recolle información explicativa dos conceptos facturados. Sen web nin e-mail. Non ofrece o consumo medio dalgún período nin gráfico co historial do consumo.

Emalgesa (Alxeciras) Cumpre a normativa. Facturación detallada, pero só figura en euros o importe final. Na parte traseira, información sobre o pagamento e consellos sobre o contador. Deseño pouco atraente. Letra pequena de difícil lectura. Bótanse de menos explicacións dos conceptos facturados. Sen web nin e-mail. Non ofrece o consumo medio dalgún período de tempo nin gráfico co historial de consumo. Factura pouco atraente. Sen información sobre o servicio de atención ó cliente.

Os electrodomésticos, grandes responsables do gasto de enerxía

Calefacción, auga quente e cociña representan o 24% do gasto. A temperatura na casa non debe supera-los 22 graos. Tampouco convén prolonga-las duchas nin utiliza-la auga a unha temperatura excesivamente elevada.

• O frigorífico, un 21% do gasto eléctrico. Deixa-la porta aberta ou abrila innecesariamente aumenta o consumo. E o gasto subirá un 5% por cada grao de máis que arrefríe o frigorífico.
• O televisor é o terceiro aparello que máis gasta: o 12%. Convén mantelo apagado cando non se lle presta atención.
• A lavadora, o 5% do gasto enerxético, máis có lavalouza, que representa só o 1%. En ámbolos casos, hai que evitar poñelos en marcha se non é coa carga completa.
• Outros electrodomésticos, como vídeos, aspiradores… supoñen o 13% do gasto de luz.
• Algúns aparellos consumen pouco, pero ó estaren enchufados permanentemente o seu gasto acaba sendo elevado. Por iso, apaguémo-los que dispoñen de modo de espera (“stand by”) cando non os usamos. Illa-la casa axuda a aforrar ata un 40% do gasto enerxético.

Trucos para aforrar

Na cociña

• Empregue potas e tixolas de diámetro maior cá placa ou zona de cocción e tape as potas para non desaproveitar calor. A cocción será máis rápida e aforrará ata un 20% de enerxía. Se un recipiente deixa ó descuberto dous ou tres centímetros da zona de cocción, perde parte da enerxía consumida.
• A ola a presión consume menos enerxía e aforra tempo.
• Aproveite a calor residual apagando o lume 5-10 minutos antes de retira-lo recipiente (tres minutos antes na vitrocerámica).

Forno

• Manteña ben pechado o forno mentres cociña e procure non abrilo, pode perder ata o 20% da calor acumulada.
• Empregue o reloxo programador ou avisador.
• Os fornos microondas permiten un grande aforro de tempo e enerxía con respecto ós fornos e placas convencionais.
• Lavadora e secadora
• Use programas de lavado a temperaturas reducidas. Unha bogada a 60ºC no canto de a 90ºC reduce o gasto enerxético a case a metade.
• Non as poña en marcha se non están cheas. Reducirá o consumo de auga, deterxente e enerxía e aumentará a vida do electrodoméstico.
• Se merca unha lavadora nova, elíxaa con centrifugado de alta velocidade xa que un centrifugado a 1.200 rpm (revolucións por minuto), no canto de a 700 rpm reduce o consumo da secadora nun 20%.

Frigorífico e conxelador

• Comprobe que pechan sen dificultade e de maneira axeitada.
• Non introduza alimentos quentes, déixeos arrefriar fóra.
• Se o vai mercar novo, elixa un modelo eficiente e ecolóxico. Consumen menos enerxía.

Iluminación

• Substitúa as bombillas tradicionais por lámpadas de baixo consumo: aforrará ata o 80% de enerxía eléctrica. Por outra banda, as lámpadas halóxenas, aínda que máis caras, dan máis luz cás tradicionais, consumen o mesmo e a súa vida é de dúas a tres veces maior.
• Os tubos fluorescentes duran ata 10 veces máis cás bombillas tradicionais e son moi eficientes enerxeticamente. Recoméndanse para lugares que precisan máis luz e durante máis tempo. Se vai ter unha lámpada fluorescente apagada menos de 20 minutos, é máis económico deixala acesa.
• As lámpadas electrónicas de baixo consumo (LBC) duran ata oito veces máis cás tradicionais e consumen a cuarta parte.

Calefacción

• Ó adquirir unha vivenda, preste atención á súa orientación. Cantas máis horas de luz teña, menos cartos gastará en calefacción.
• Durante o día, suba as persianas: o sol proporcionaralle luz e calor ó seu fogar. Á noitiña, peche as cortinas e baixe as persianas: reducirá a perda de calor.
• Se cambia as ventás, que as novas sexan de dobre cristal.
• Instalando xuntas ou burletes nas portas e ventás, reducirá as fugas de calefacción nun 10%. Unha vivenda ben illada aforra ata un 30% en calefacción.
• Para ventilar unha habitación, abondan 10 minutos.

Auga quente

• Instale o termo dentro da vivenda e preto dos puntos de uso: cociña, cuarto de baño.
• Dúchese no canto de bañarse: consumirá a cuarta parte de auga e enerxía.
• Coloque unha válvula mesturadora na saída do termo, deste xeito obterá a auga quente a unha temperatura constante: máis comodidade e menos consumo.
• Se regula o termo por riba dos 60ºC, malgastará enerxía e reducirá a súa duración.

Lavalouza

• Seleccione un programa acorde co grao de sucidade da louza.
• Aproveite ó máximo a capacidade do lavalouza. Enchéndoo reducirá o consumo de auga, deterxente e enerxía. E aumentará a vida do electrodoméstico. Se lava “a media carga”, seleccione o programa económico.
• Se merca un lavalouza, elixa un modelo eficiente. Consumen menos auga e deterxente e aforran o 20% de enerxía.