Freskagarriak: hobe light badira
Gehien edaten ditugun freskagarriek formula erraz-erraza dute; guztiek berdina, funtsean: ur karbonatatua, gasduna, eta azukrea edo eztitzaileak, light baldin badira edo kaloria gutxikoak. Ur gozo horri hainbat gauza gehitzen zaizkio gero, eta horiek ematen diote bakoitzari bere zaporea, usaina kolorea eta itxura. Fruta zukua izan daiteke (laranja, limoia…), edo landare estraktoak (kola, kinina…), eta askotariko gehigarriak (kontserbagarriak, azidogarriak, koloragarriak…).
CONSUMER EROSKIk 17 freskagarri aztertu ditu laborategian; kolazko 5 (Coca-Cola eta Pepsi markakoak), laranjazko 6 (Kas, Fanta eta Schweppes), 3 tonika (Schweppes eta Nordic Mist), 2 bitter (biak ere Kas) eta gaseosa bat (La Casera). Horietako bederatzik kaloria gutxi dituzte, eztitzaileak baitituzte azukrearen ordez.
Light motakoak zertxobait garestiagoak dira azukredunak baino: batez beste, 1, 47 euro balio du light litroak, eta 1,45 euro normalak. Coca-Cola % 13 garestiagoa da Pepsi baino, eta laranjazko sei freskagarrien artean oso alde txikia dago. Toniketan, Schweppes normala baino % 20 garestiagoa da Nordic Mist (2 euro balio du litroak). Bitter litroak, berriz, ia 2,5 euro balio du. Edari gasdunetan (aztertu ditugun guztiak hala dira), gas karbonikoari edo CO2ari esker (% 0,4koa da laranjazkoetan eta % 0,8koa gaseosetan; besteak tartean geratzen dira), zaporeak arinduta geratzen dira; leunago antzematen ditugu kolazko eta laranjazkoen gozoa eta bitter eta toniken mingotsa, eta ukitu fresko eta atsegina geratzen zaigu bukaeran. Gasak, gainera, freskagarriaren usaina eta azidotasuna indartzen du. Nolanahi ere, egarria kentzeko, ura da edaririk onena eta osasungarriena.
Zeri erreparatu zitzaion azterketa egiterakoan
Irregulartasunik nabarmenena Bitter Kas-i antzeman zaio; azterketak erakutsi du sodio bentzoatoa duela, baina etiketak ez du esaten. Ez da hori izan arau-hauste bakarra: Pepsi light, Tónica Schweppes eta Tónica Schweppes light edarien etiketan, nahitaez eman beharreko informazioa ez da ageri gainerako datuak datozen toki berean; Kas Naranja Light-ek, berriz, elikadura-osagaiak lerroan idatzita ematen ditu, eta ez taula batean, nahiz eta tokia baduen hala egiteko.
Gauza asko neurtu dira laborategian: egiazko bolumena eta bakoitzak jartzen duena, azukre edo eztitzaile kopuruak, Brix graduak, CO2, kontserbagarri artifizialak, azido fosforikoa eta bentzenoa (minbizi eragilea da, eta kontserbagarrien eta C bitaminaren arteko erreakziotik sor daiteke), toniketako kinina eta kolazko edarietako kafeina. Era askotako emaitzak agertu dira, baina guztiek betetzen dute arauak esaten duena.
Kaloriei begiratuta zentzuzkoa da freskagarri light-en alde. Adibidez, ehun mililitro bakoitzeko biterrak 30 kaloria ditu, Fanta Naranja eta Pepsik 45 eta Coca-Cola lata batek (33 zentilitro) 126. Aldiz, etxe bereko Zero edo Light motakoek ez dute batere kaloriarik.
E951 aspartamoak eta beste eztitzaile batzuek (E954 Sakarina, E952 Azido ziklamikoa eta E950 Azesulfamoa) ez diote kalterik egiten gure osasunari, hori diote, behintzat, zientzialarien orain arteko ikerketek eta halakoak neurriz kanpo ere ez dituzte freskagarri hauek. Egunean komeni den baino aspartamo gehiago hartzeko -osasun agintariek gomendatzen kopurua baino gehiago-, heldu batek, aspartamo gehien daraman edaritik, 8 litro edan beharko lituzke.
Dastatzaileen iritzia biltzeko orduan, 30 kontsumitzaile hartu eta produktuak familiaka eman zaizkie dastatzera. Coca-Colak eta Pepsi Light-ek iritzi hobea bildu dute, Coca-Cola Light-ek eta Coca-Cola Zero-k baino, eta Pepsi normala bi multzoen tartean geratu da. Laranjazko freskagarrietan, Fanta eta Schweppes bereizi dituzte besteen artetik, eta bi horien light bertsioak geratu dira azken tokian. Kas etxeko bi edariak tartean jarri dituzte. Biterretan, biak ziren Kas, eta light motakoak emaitza hobea izan du. Eta toniken artean, ez da izan desberdintasun nabarmenik, nahiz eta Schweppes etxekoak puntuazio hobea lortu beste biek baino. Gaseosari erdipurdiko puntuazioa eman diote.
Kafeina eta kinina
Tonikak ura, gas karbonikoa edo ur gasifikatua ditu, azukrea edo eztitzailea, gehigarriak eta kinina estraktoa. Kinikak eragin suspergarria du nerbio sisteman (alkaloide mingotsa da, kinina zuhaitzaren azaletik ateratakoa). Litro bakoitzeko, 100 miligramo onartzen dituzte, eta Schweppes etxeko biek 27 mg/l eman dituzte, eta 60 mg/l Nordic Mist-ekoak.
Kolako freskagarriek kafeina izaten dute, eta fruta tropikal batetik ateratzen dute, kola-hurretik, hark berez edukitzen baitu. Kafeina bizkorgarria da, eta neurrian hartuz gero (egunean 200 miligramo, gehienez), mesede egiten die buru-lanari eta muskuluen jardunari. Hortik gora hartuz gero, loezina eta estutasuna sor ditzake. Haurrei gehiago eragiten dien kafeinak, helduei bano. Kolazko bost freskagarrietan, batez beste, 11 miligramo kafeina aurkitu dira ehun mililitro bakoitzeko; te beltzak hori halako bi izaten du, Red Bull edo antzeko edari energetikoek, hori halako hiru, eta kafe iragaziak, hori halako zazpi. Edaritik edarira, badira aldeak kafeina kopuruetan: Coca Cola Light-ek 12,2 mg/100 ml ditu eta Pepsi Light-ek 11,4 mg/100 ml; Coca-Cola normala eta Zero motakoak 9,3 mg/100 ml dauzka eta Pepsi normalak, 10,6 mg/100 ml. Beraz, Coca-Cola Light-ek % 35 kafeina gehiago du, etxe bereko beste biek baino. Coca-Cola etxeak merkaturatzen dituen freskagarri kaloriagabeen artean (Light eta Zero) horixe da, gainera, alderik azpimarragarriena, nahiz eta beste zenbait gehigarri ere desberdinak dituzten.
Kolazko edariek azido fosforikoa ere badute (garratz puntua ematen dio, eta herdoilaren aurkakoa da). Fosforo gehiegi hartzeak hezurren kaltziogabetzea ekar dezake. Edariek 700 miligramo eduki ditzakete litro bakoitzeko. Aztertu diren bostak neurrien barruan daude, eta 478-546 miligramo eman dituzte litroko.
Freskagarrietako laranja zukua
Laranja zukuzkoak diren freskagarriek, gutxienez, % 8 eduki behar dute laranja ura, zuku kontzentratutik lortuta. Laborategian ezin izan da jakin zenbat zuku duten freskagarri hauek, baina bai zenbat azukre. Laranja zukuak, berez, azukre gutxi du, eta ezin asko eman produktuari: light motakoetan, 7 eta 8 gramo azukre agertu dira litro bakoitzeko, eta besteetan, 83 eta 116 gramo litroko. Laranjazko freskagarri batek 42 kaloria ematen ditu ehun mililitro bakoitzeko, laranja zukuak adina, baina zukuak bitaminak eta mineralak ditu, freskagarriek ez bezala.
Kontserbagarriak eta koloragarriak
Koloragarri artifizialen bila aritu dira ikertzaileak, horiek sortzen baitute eztabaida. Lau antzeman dituzte. Kas Naranjak eta Kas Naranja Light-ek E-102 tartrazina eta E-110 Hori Ilunabarrekoa dauzkate; Bitter Kas-ek eta Bitter Kas Light-ek, berriz, E-122 Karmoisina eta 4R E-124 Ponceau erabiltzen dituzte. Kopuruak muga barruan daude, baina hobe zatekeen koloragarri naturalak erabili izango balituzte, beste etxeetakoek egiten duten bezala.
Hamazazpi freskagarrietatik bederatzik kontserbagarriak dituzte, azido sorbikoa (litroko 300 mg eduki ditzakete) eta azido bentzoikoa (litroko 150 mg); guztiek ere legea betetzen dute.
Freskagarriak eta osasuna
Azidotzaileak eta hezurrak. Kolazko freskagarriek azido fosforikoa dute, eta maiz-maiz edango bagenitu, fosforo asko ariko ginateke ematen gure gorputzari, eta fosforoak, neurriz kanpo hartuz gero, desmineralizatu egiten ditu gure hezurrak. Fosforo gehiegiak hezurrak kaltziogabetzea dakar.
Azukrea eta txantxarra. Azidotasunak eta azukre sinple ugari edukitzeak kalte egiten diote esmalteari, eta horrek lana errazten dio txantxarrari.
Azukrea eta gizentasuna. Freskagarri lata bat edaten denean, hiru azukre zorrotxo irenstea bezala da (100 eta 130 kaloria inguru).
Gasa eta aerofagia. Freskagarri gasdunek aerofagia sor dezakete; gasak pilatu egiten dira urdailean eta hesteetan, eta horrek zaildu egiten du digestioa. Hobe da gasik gabeko freskagarriak hartzea.
Kafeina bizigarria da. Egunean 200 miligramo baino gehiago hartzeak loezina eta estutasuna sor ditzake. Kolazko lata batek 30-40 mg kafeina ditu. Kafeak eta teak ere badute kafeina. Haurretan, txikiagoa da gainditu behar ez den kafeina kopurua.
Laburbilduz eta konparaketako taula
Laburbilduz
- CONSUMER EROSKI-k 17 edari eraman ditu laborategira, eta denekin egin ditu dastatze-probak: kolazko 5 (Coca-Cola eta Pepsi), laranjazko 6 (Kas, Fanta eta Schweppes), 3 tonika (Schweppes eta Nordic Mist), 2 bitter (biak Kas) eta gaseosa bat (La Casera). 33 zentilitroko latak, gehienak (Nordic Mistenak 25 cl); bitterrak kristalezko botiletan zetozen (20 cl-koak), eta gaseosa, plastikozko botilan (50 cl-koa). Bederatzik kaloria gutxi dauzkate, eztitzaileak dituztelako azukrearen ordez.
- Bitterrak dira garestienak (2,45 eta 2,48 euro litroko), eta merkeena, gaseosa: 0,93 euro litroko. Laranjazko freskagarrietan, batez beste, 1,12 euro balio du litroak; kolazkoetan, 1,37; eta toniketan, 1,79. Light motakoak garestixeagoak dira ohiko freskagarriak baino: 2 zentimo, batez beste.
- Bost freskagarri mota hauek ur gozatua dute (azukrearekin edo eztitzailearekin), eta karbonatatua. Hortik aurrera hasten dira ezberdinatsunak: batzuek kola dute, bestek laranja ura (zuku kontzentratutik dator), bitterrak landare estraktoak ditu, eta tonikak, kinina. Horiez gain, freskagarri bakoitzak gehigarri mota jakin batzuk ditu.
- Bitter Kas-ek sodio bentzoatoa du (kontserbagarria), baina osagaien zerrendan ez da azaltzen.
- Neurtu den guztia legeak esaten duenaren barruan dago: egiazko bolumena, azukrea, eztitzaileak, Brix graduak, kinina, kafeina, CO2, kontserbagarriak, koloragarri artifizialak, azido fosforikoa, bentzenoa (minbizi eragilea da, eta kontserbagarrien eta C bitaminaren arteko erreakziotik sor daiteke).
- Coca-Cola Light-ek % 30 kafeina gehiago du Coca-Cola normalak eta Zero motakoak baino, eta Pepsik baino % 15 gehiago.
- Light motakoek ez dute kaloriarik, eta ohikoek, berriz, bai: 100 mililitro bakoitzeko, 30 eta 45 kaloria artean dabiltza; bitterrak gutxien eta Fanta Naranjak eta Pepsik gehien.
- Freskagarrietan gehien erabiltzen duten eztitzaile edo edulkoratzaileetako bat aspartamoa da, eta, ikerketen arabera, ez dio kalterik egiten osasunari. 55 kiloko heldu batek, egunean komeni den baino aspartamo gehiago hartzeko, 8 litro freskagarri edan beharko lituzke azterketa honetan aspartamo kopuru handiena eman duen edaritik. Fenilzetonuria dutenek ezin dute hartu aspartamoa.
- Freskagarriak maiz hartzea, light izanda ere, dieta orekatuaren kaltetan izan daiteke eta, gozo zaporea duenez, gizentasun iturri izan daiteke, batik bat haurretan eta gazteetan.
- Azterturiko bost produktuek ezaugarri desberdinak dituzte eta nekez konpara daitezke elkarrekin. Gainera, ez dute elikadura interesik, eta, horregatik, CONSUMER EROSKIri egoki iruditu zaio produktu hauen sailkapenik ez egitea kalitatearen eta prezioaren artean.
| Produktua | Pepsi Light | Coca cola Light | Coca cola Zero | Coca cola |
|---|---|---|---|---|
| Salgaiari eman dioten izena | Edari freskagarri lurrindua / aromatizatua | Edari freskagarri lurrindua / aromatizatua | Edari freskagarri lurrindua / aromatizatua | Edari freskagarri estraktoduna/ Estrakto-edari freskagarria |
| Formatua (litroak) | 0,33 | 0,33 | 0,33 | 0,33 |
| Prezioa (Euro/litroko) | 1,28 | 1,45 | 1,43 | 1,42 |
| Etiketa | Gaizki emana | Gaizki emana | Gaizki emana | Gaizki emana |
| Bolumen neurtua (litrotan) | 0,34 | 0,33 | 0,33 | 0,33 |
| CO2 (g/l) 1 | 7,2 | 7,6 | 7,4 | 6,5 |
| Brix 2 graduak | 0,4 | 0,3 | 0,4 | 10,4 |
| Azukrea, guztira (g/100ml) | Ez diote gehitu | Ez diote gehitu | Ez diote gehitu | 10,6 |
| Kaloriak (cal/100ml) | 0 | 0 | 0 | 42 |
| Kafeina 3(mg/l) |
114 | 122 | 93,1 | 93 |
| Quinina 4(mg/l) | EZ DAGOKIO | EZ DAGOKIO | EZ DAGOKIO | EZ DAGOKIO |
| Eztitzaileak | ||||
| Aspartamoa 5(E951) (mg/l) | 269 | 93,2 | 96,7 | EZ DAGOKIO |
| Kontserbagarriak | ||||
| Azido fosforikoa mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Azido bentzoikoa (mg/l) | 139 | EZ DA ANTZEMAN | EZ DA ANTZEMAN | EZ DA ANTZEMAN |
| Azidotzaileak | ||||
| Azido fosforikoa (mg/l) | 491 | 498 | 478 | 534 |
| Koloragarri artifizialak | ||||
| Tartrazinoa (E102) (mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Hori Ilunabarrekoa (E110) (mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Karmoisina (E122) (mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Ponceau 4R(E124(mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Bentzenoa 6(µg/l) | EZ DAGOKIO | EZ DAGOKIO | EZ DAGOKIO | EZ DAGOKIO |
| Dastatze-proba (1etik 9ra) | 6,6 | 6,1 | 5,8 | 7,0 |
| Produktua | Pepsi | Kas naranja Light | Fanta naranja Bajo en calorías | Schweppes Spirit naranjaLight |
|---|---|---|---|---|
| Salgaiari eman dioten izena | Bebida refrescante de extractos | Fruta zukuzko edari freskagarria con Eztitzaileak | Edari freskagarri lurrindua / aromatizatua | Edari freskagarri lurrindua / aromatizatua |
| Formatua (litroak) | 0,33 | 0,33 | 0,33 | 0,33 |
| Prezioa (Euro/litroko) | 1,25 | 1,11 | 1,12 | 1,17 |
| Etiketa | Gaizki emana | Gaizki emana | Gaizki emana | Gaizki emana |
| Bolumen neurtua (litrotan) | 0,34 | 0,34 | 0,33 | 0,33 |
| CO2 (g/l) 1 | 7,9 | 4,6 | 4,8 | 4,1 |
| Brix2 graduak | 11,3 | 1,5 | 1,3 | 1,5 |
| Azukrea, guztira (g/100ml) | 11,2 | 0,8 | 0,8 | 0,7 |
| Kaloriak (cal/100ml) | 45 | 3 | 3 | 3 |
| Kafeina 3(mg/l) |
106 | NA | NA | NA |
| Quinina 4(mg/l) | EZ DAGOKIO | EZ DAGOKIO | EZ DAGOKIO | EZ DAGOKIO |
| Eztitzaileak | ||||
| Aspartamoa 5(E951) (mg/l) | EZ DAGOKIO | EZ DAGOKIO | 81,8 | 75,4 |
| Kontserbagarriak | ||||
| Azido fosforikoa mg/l) | EZ DA ANTZEMAN | 144 | 164 | 121 |
| Azido bentzoikoa (mg/l) | EZ DA ANTZEMAN | 3,4 | EZ DA ANTZEMAN | 3,4 |
| Azidotzaileak | ||||
| Azido fosforikoa (mg/l) | 546 | EZ DAGOKIO | EZ DAGOKIO | EZ DAGOKIO |
| Koloragarri artifizialak | ||||
| Tartrazinoa (E102) (mg/l) | EZ DA ANTZEMAN | 4 | EZ DA ANTZEMAN | EZ DA ANTZEMAN |
| Hori Ilunabarrekoa (E110) (mg/l) | EZ DA ANTZEMAN | 0,9 | EZ DA ANTZEMAN | EZ DA ANTZEMAN |
| Karmoisina (E122) (mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Ponceau 4R (E124(mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DA ANTZEMAN |
| Bentzenoa 6(µg/l) | EZ DAGOKIO | EZ DA ANTZEMAN | EZ DAGOKIO | EZ DA ANTZEMAN |
| Dastatze-proba (1etik 9ra) | 6,5 | 5,6 | 5,4 | 5,5 |
| Produktua | Fanta naranja | Schweppes Spirit naranja | Kas naranja | Tonica Schweppes Light |
|---|---|---|---|---|
| Salgaiari eman dioten izena | Fruta zukuzko edari freskagarria | Fruta zukuzko edari freskagarria | Fruta zukuzko edari freskagarria | Edari freskagarri lurrindua / aromatizatua |
| Formatua (litroak) | 0,33 | 0,33 | 0,33 | 0,33 |
| Prezioa (Euro/litroko) | 1,12 | 1,14 | 1,09 | 1,72 |
| Etiketa | Gaizki emana | Gaizki emana | Gaizki emana | Gaizki emana |
| Bolumen neurtua (litrotan) | 0,33 | 0,32 | 0,33 | 0,33 |
| CO2 (g/l) 1 | 4,7 | 4,4 | 4,5 | 6,6 |
| Brix2 graduak | 11,7 | 11,2 | 13,8 | 0,6 |
| Azukrea, guztira (g/100ml) | 11,6 | 10,5 | 8,3 | Ez diote gehitu |
| Kaloriak (cal/100ml) | 46 | 42 | 33 | 0 |
| Kafeina 3(mg/l) |
NA | NA | NA | EZ DAGOKIO |
| Quinina 4(mg/l) | EZ DAGOKIO | EZ DAGOKIO | EZ DAGOKIO | 28 |
| Eztitzaileak | ||||
| Aspartamoa 5(E951) (mg/l) | EZ DAGOKIO | EZ DAGOKIO | EZ DAGOKIO | EZ DAGOKIO |
| Kontserbagarriak | ||||
| Azido fosforikoa mg/l) | 173 | 132 | 130 | EZ DA ANTZEMAN |
| Azido bentzoikoa (mg/l) | EZ DA ANTZEMAN | 3,3 | 3,7 | EZ DA ANTZEMAN |
| Azidotzaileak | ||||
| Azido fosforikoa (mg/l) | EZ DAGOKIO | EZ DAGOKIO | EZ DAGOKIO | EZ DAGOKIO |
| Koloragarri artifizialak | ||||
| Tartrazinoa (E102) (mg/l) | EZ DA ANTZEMAN | EZ DA ANTZEMAN | 5 | EZ DAGOKIO |
| Hori Ilunabarrekoa (E110) (mg/l) | EZ DA ANTZEMAN | EZ DA ANTZEMAN | 1 | EZ DAGOKIO |
| Karmoisina (E122) (mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DAGOKIO |
| Ponceau 4R (E124(mg/l) | EZ DA ANTZEMAN | EZ DA ANTZEMAN | EZ DA ANTZEMAN | EZ DAGOKIO |
| Bentzenoa 6(µg/l) | EZ DAGOKIO | EZ DA ANTZEMAN | EZ DA ANTZEMAN | EZ DAGOKIO |
| Dastatze-proba (1etik 9ra) | 6,7 | 6,4 | 6,2 | 5,7 |
| Produktua | Tonica Schweppes | Tonica Nordic Mist | Bitter Kas Light | Bitter Kas | La Casera |
|---|---|---|---|---|---|
| Salgaiari eman dioten izena | Bebida refrescante de extractos | Bebida refrescante de extractos | Bebida refrescante aromatizada | Bebida refrescante de extractos | Gaseosa |
| Formatua (litroak) | 0,33 | 0,25 | 0,2 | 0,2 | 0,5 |
| Prezioa (Euro/litroko) | 1,66 | 2 | 2,48 | 2,45 | 0,93 |
| Etiketa | Gaizki emana | Gaizki emana | Gaizki emana | Gaizki emana | Gaizki emana |
| Bolumen neurtua (litrotan) | 0,34 | 0,25 | 0,21 | 0,2 | 0,5 |
| CO2 (g/l) 1 | 6,5 | 6,5 | 6,2 | 5,5 | 8 |
| Brix2 graduak | 9,1 | 9 | 0,4 | 8,8 | 0,1 |
| Azukrea, guztira (g/100ml) | 8,9 | 8,9 | Ez diote gehitu | 7,5 | Ez diote gehitu |
| Kaloriak (cal/100ml) | 36 | 36 | 0 | 30 | 0 |
| Kafeina 3(mg/l) | EZ DAGOKIO | EZ DAGOKIO | EZ DAGOKIO | EZ DAGOKIO | EZ DAGOKIO |
| Quinina 4(mg/l) | 27 | 60 | EZ DAGOKIO | EZ DAGOKIO | EZ DAGOKIO |
| Eztitzaileak | |||||
| Aspartamoa 5(E951) (mg/l) | EZ DAGOKIO | EZ DAGOKIO | EZ DAGOKIO | EZ DAGOKIO | EZ DAGOKIO |
| Kontserbagarriak | |||||
| Azido fosforikoa mg/l) | EZ DA ANTZEMAN | EZ DA ANTZEMAN | 136 | 124 | EZ DA ANTZEMAN |
| Azido bentzoikoa (mg/l) | EZ DA ANTZEMAN | EZ DA ANTZEMAN | 47,5 | 44,4 | EZ DA ANTZEMAN |
| Azidotzaileak | |||||
| Azido fosforikoa (mg/l) | EZ DAGOKIO | EZ DAGOKIO | EZ DAGOKIO | EZ DAGOKIO | EZ DAGOKIO |
| Koloragarri artifizialak | |||||
| Tartrazinoa (E102) (mg/l) | EZ DAGOKIO | EZ DAGOKIO | EZ DA ANTZEMAN | EZ DA ANTZEMAN | EZ DAGOKIO |
| Hori Ilunabarrekoa (E110) (mg/l) | EZ DAGOKIO | EZ DAGOKIO | EZ DA ANTZEMAN | EZ DA ANTZEMAN | EZ DAGOKIO |
| Karmoisina (E122) (mg/l) | EZ DAGOKIO | EZ DAGOKIO | 19,6 | 20,9 | EZ DAGOKIO |
| Ponceau 4R (E124(mg/l) | EZ DA ANTZEMAN | EZ DA ANTZEMAN | 6,4 | 6,4 | EZ DAGOKIO |
| Bentzenoa 6(µg/l) | EZ DAGOKIO | EZ DAGOKIO | EZ DAGOKIO | EZ DAGOKIO | EZ DAGOKIO |
| Dastatze-proba (1etik 9ra) | 6,3 | 5,3 | 6,7 | 5,3 | 5,4 |
1) CO2 (karbono dioxidoa): Fabrikatzaileek CO2 botatzen diote urari, edariei gas ukitua emateko.
2) Brix graduak: Brix graduek adierazten dute zenbat solido disolbagarri dauden uretan disolbatuta. Nagusiki, urari bota dizkioten azukreei buruz ari gara (sakarosa), eta edariak fruta zukua badu, gehitu zaion zukuak zenbat azukre duen ere kontatzen da
3) Kafeina: kolazko edariek eduki ohi duten osagai alkaloidea. Kafeak, teak eta edari energetikoek ere badute kafeina. Gehiegizkoa da egunean 200 miligramo kafeina baino gehiago hartzea.
4) Kinina: tonikek izan ohi duten osagai alkaloidea. Gehienez, litro bakoitzean 100 miligramo kinina onartzen ditu legeak.
5) Aspartamoa: gehigarri artifiziala da, oso gozagarria (azukrea baino 200 aldiz gozoagoa da). Pertsonak pisatzen duen kilo bakoitzeko, gehienez ere, 40 miligramo aspartamo har ditzake.
6) Bentzenoa: Azido askorbikoa (C bitamina) eta sodio bentzoatoa (kontserbagarria da) elkartuz gero, bentzenoa sor daiteke, eta bentzenoa minbizi eragilea da.
Banan-banan
17 freskagarri, banan-banan
Coca-Cola
- 0,33 litroko lata. 1,42 euro balio du litroak.
- 42 kaloria ditu ehun miligramo bakoitzeko, ia Pepsik adina (45). Kolazko beste lau edariek bezala, azido fosforikoa du, legeak ezarritako gehienezko kopurua (700 mg/l) baino gutxiago: 534 mg/l ditu honek.
- Dastatze-proban 7 puntu lortu ditu, eta gehien gustatu denetakoa izan da kolazkoen artan. “Gozo ukitua” gustatu zaie dastatzaileei, baina “kola zapore gutxi” hartu diote.
Pepsi
- 0,33 litroko lata. 1,25 euro balio du litroak. Hau da merkeena kolazkoetan.
- 45 kaloria ditu ehun miligramo bakoitzeko, ia Coca Colak adina (42). Kolazko gainerako edariek bezala, azido fosforikoa du, legeak ezarritako gehienezko kopurua (700 mg/l) baino gutxiago: 546 mg/l ditu honek.
- Dastatze-proban 6,5 puntu lortu ditu. Ez diote bereziki ezer nabarmendu, eta kritikatu ere ez.
Pepsi light
- 0,33 litroko lata. 1,28 euro balio du litroak.
- Etiketa gaizki emana du: nahitaez jarri beharreko informazioa ez dator gainerakoarekin batera. Apenas du kaloriarik. Pepsi normalak baino % 6 kafeina gehiago du, eta Coca Cola Light-ek baino % 6 gutxiago. Aspartamo gehien duen kolazko edaria da eta kontserbagarria duen bakarra (azido bentzoikoa). Azido fosforikoa du.
- Dastatze-proban 6,6 puntu lortu ditu, eta jendearen gustukoenetakoa izan da. “Bizi puntua” nabarmendu diote, baina “zapore gutxi” omen.
Coca-Cola Zero
- 0,33 litroko lata. 1,43 euro balio du litroak.
- Apenas duen kaloriarik. Kolazko gainerako edariek bezala, azido fosforikoa du, legeak ezarritako gehienezko kopurua (700 mg/l) baino gutxiago: 478 mg/l.
- Dastatze-proban 5,8 puntu lortu ditu. Kolorea gustatu da.
Coca-Cola light
- 0,33 litroko lata. 1,45 euro balio du litroak. Kolazkoetan, garestiena.
- Apenas duen kaloriarik. % 30 kafeina gehiago du Coca Cola normalak eta Zero motakoak baino. Kolazko beste lau edariek bezala, azido fosforikoa du, legeak ezarritako gehienezko kopurua (700 mg/l) baino gutxiago: 498 mg/l ditu honek.
- Dastatze-proban 6,1 puntu lortu ditu. Ez diote bereziki ezer nabarmendu, eta kritikatu ere ez.
Fanta naranja
- 0,33 litroko lata. 1,12 euro balio du litroak.
- Laranja ura % 8 duela dio, zuku kontzentratutik lortuta.
- 46 kaloria ditu ehun mililitro bakoitzeko, ia Schweppes etxekoak adina (42), eta Kas-ek baino zertxobait gehiago (33). Laranja zuku batek ere kaloria kopuru bera du, baina baita bitaminak eta mineralak ere; freskagarriek ez dute halakorik.
- Dastatze-proban 6, 7 puntu lortu ditu, eta gehien gustatu denetakoa izan da. “Gozo ukitua” eta “kolorea” nabarmendu dizkiote, baina “zapore gutxi” antzeman diote.
Schweppes Spirit naranja
- 0,33 litroko lata. 1,14 euro balio du litroak.
- Laranja ura % 8 duela dio, zuku kontzentratutik lortuta.
- 42 kaloria ditu ehun mililitro bakoitzeko, ia Fanta-k adina (46), eta Kas-ek baino gehiago (33). Laranja zuku batek ere kaloria kopuru bera du, baina baita bitaminak eta mineralak ere.
- Dastatze-proban 6,4 puntu lortu ditu, eta gehien gustatu denetakoa izan da. “Zaporea” eta “kolorea” gustatu zaizkio jendeari, “mingotsa” eta “bizi puntu handikoa” dela esan dute.
Kas naranja
- 0,33 litroko lata. 1,09 euro balio du litroak. Hau da laranjazko freskagarririk merkeena.
- Laranja ura % 8 duela dio, zuku kontzentratutik lortuta.
- 33 kaloria ditu ehun mililitro bakoitzeko; laranjazkoetan, honek du kaloria gutxien (Schweppes etxekoak 42 ditu eta 46 Fanta-k). Laranja zuku batek 42 kaloria ematen ditu ehun mililitro bakoitzeko, baina bitaminak eta mineralak ere bai. Bi koloragarri artifizial daramatza.
- Dastatze-proban 6,2 puntu lortu ditu, eta erdi parean geratu da. “Bizi puntua” gustatu zaio jendeari, baina ez “kolore argia” edukitzea.
Kas naranja light
- 0,33 litroko lata. 1,11 euro balio du litroak.
- Laranja ura % 8 duela dio, zuku kontzentratutik lortuta. Soilik 3 kaloria ditu ehun mililitro bakoitzeko, zukuak dituenak.
- Bi koloragarri artifizial daramatza. Egokiagoa da koloragarri naturalak erabiltzea.
- Dastatze-proban 5,6 puntu lortu ditu, eta erdi parean geratu da. Zaporea gustatu zaio jendeari, baina batzuek esan dute “laranja zapore gutxi” duela.
Kaloria gutxiko Fanta naranja
- 0,33 litroko lata. 1,12 euro balio du litroak.
- Laranja ura % 8 duela dio, zuku kontzentratutik lortuta.
- Apenas duen kaloriarik; 3 kaloria ditu ehun mililitro bakoitzeko, laranja zukuak dituenak.
- Dastatze-proban 5,4 puntu lotu ditu, eta jendeari gutxien gustatu zaionetakoa izan da. “Kolorea” atsegin izan du jendeak, baina ez “bukaeran uzten duen zaporea”.
Schweppes Spirit naranja light
- 0,33 litroko lata. 1,17 euro balio du litroak. Hau da garestiena laranjazkoetan.
- Laranja ura % 8 duela dio, zuku kontzentratutik lortuta. 3 kaloria ditu ehun mililitro bakoitzeko, zukuak dituenak.
- Dastatze-proban 5,4 puntu lotu ditu, eta jendeari gutxien gustatu zaionetakoa izan da. “Zaporea” eta “kolorea” gustatu zaie batzuei, baina besteek esan dute “zapore arraroa” duela, “zapore gutxi”, “bizi puntu handia” eta zaiela gustatu “bukaeran uzten duen zaporea”.
Bitter Kas light
- Kristalezko botila, 0,20 litrokoa, 2,48 euro balio du litroak, laranjazkoek eta kolazkoek halako bi.
- Ekarpen energetikoa: kaloriarik ez. Bi koloragarri artifizial ditu. Egokiagoa da koloragarri naturalak erabiltzea.
- Dastatze-proban 6,7 puntu lortu ditu; etxe bereko beste bitterra ?normala- baino gehiago gustatu da; “gozo ukitua”, “zapore handia” eta “bizi puntua” gustatu zaizkio jendeari.
Bitter Kas
- Kristalezko botila, 0,20 litrokoa, 2,45 euro balio du litroak.
- 30 kaloria ditu ehun mililitro bakoitzeko, kolazkoek baino gutxiago eta laranjazkoen antzera.
- Etiketa gaizki emana: osagaien artean ez da ageri bentzoatoa (kontserbagarri onartua), baina analisiak erakutsi du baduela (44 mg/l).
- Bi koloragarri artifizial ditu. Egokiagoa da koloragarri naturalak erabiltzea.
- Dastatze-proban 5,3 puntu lortu ditu, eta “kolorea” gustatu zaio jendeari.
Tónica Schweppes
- 0,33 litroko lata. 1,66 euro balio du litroak.
- 36 kaloria ditu ehun mililitro bakoitzeko, kolazkoek baino gutxiago eta laranjazkoen antzera.
- Etiketa gaizki emana du: salgaiari eman dioten izena, bolumen garbia eta iraungitze data ez datoz gainerako informazioarekin batera.
- Dastatze-proban 6,3 puntu lortu ditu. “Zapore handia”, “mingots puntua” eta “bizi puntua” gustatu zaizkio jendeari, eta “uzten duen zaporea”. Kritiken artean, “zapore gutxi” duela esan dute.
Tónica Schweppes light
- 0,33 litroko lata. 1,72 euro balio du litroak.
- Etiketa gaizki emana du: salgaiari eman dioten izena, bolumen garbia eta iraungitze data ez datoz gainerako informazioarekin batera.
- Ekarpen energetikoa: kaloriarik ez.
- Dastatze-proban 5,7 puntu lortu ditu: “zaporea” gustatu da, baina ez “gozo ukitua” eta “bizi puntua”.
Tónica Nordic Mist
- 0,25 litroko lata. 2 euro balio du litroak. Hau da tonikarik garestiena.
- 36 kaloria ditu ehun mililitro bakoitzeko, kolazkoek baino gutxiago eta laranjazkoen antzera.
- Beste bi tonikek halako bi kinina du, baina gehienez eduki dezakeen baino dezente gutxiago.
- Dastatze-proban 5,3 puntu lortu ditu: “zaporea” gustatu da, baina zenbaitentzat “oso mingotsa” gertatu da.
Gaseosa La Casera
- Plastikozko botila, 0,5 litrokoa. 0,93 euro balio du litroak. Freskagarri guztietan merkeena.
- Ez du kaloriarik.
- Freskagarririk karbonatatuena da: 8 gramo C02 ditu litro bakoitzak (litroko 10 gramo onartzen dituzte); kolazkoek 7 gramo inguru dituzte litroko, tonikek 6,5, bitterrak ere 6,5 eta laranjazkoek, 4 eta 5 gramo artean litroko.
- Dastatze-proban 5,4 puntu lortu ditu: “zaporea” gustuko izan du jendeak, baina zenbaitek esan du “gorputzik gabea” dela eta “mingotsa”.