Haurrentzakoak, helduentzako prezioan
Ospakizunaren antolamenduari ezinbesteko oparia erantsi behar zaio: bizikleta, panpina-etxea, bideo-kontsola, auto telegidatua edo ordenagailua, estreinakoa. Etxeko txikiena jaiotzaren urtebetetzean zoriontsu egiteak 150 eta 400 euroren gastua ekar dezake, opariak barne. Hona beste kontu bat, garrantzi berekoa: non ospatuko dugu, etxean edo etxetik kanpora? Aspaldi honetan, urtebetetze-ospakizunaz gozatzeko aukerak biderkatu egin dira: egin daiteke jatetxe batean, animatzailearekin edo gabe; aisialdi-parke batean, haurrak nahi erara jolas daitezen, askaria hartu aurretik; jolas-parkean; zoologikoan edo, areago, haurrentzako ile-apaindegi batean: bertan, askaria hartzeaz gainera, mozorroa jantzi eta makillatzeko aukera izango dute umeek; baliteke, era berean, horrelako ile-apaindegietan kit osoa hartzea: ilea apaindu, makillatu eta manikura egitea, marrazki lehiaketan parte hartzen duten bitartean. Ospakizuna etxean egiten bada, txikiekin lehian eta pelean ?kasu askotan, agortu arteraino? ibili beharko dutela ondotxo dakite gurasoek, baina horrelako jaialdiak kuttun eta pertsonalagoak dira, aukeran. Eta, etxeko ekonomiarentzat, kontu nagusia: aurreko edozeinek eskatzen duena baino askoz ere aurrekontu txikiagoarekin egin daiteke.
Gastuen kapitulua osatzeko hor ditugu ikaskideei eta eskolaz kanpoko kideei banatu beharreko karamelu eta gainerako litxarreriak. ?Urtebetetze-ospakizuneko zorroa” hartzearen alde egiten badu, 25 – 70 euroko kostua izan dezake horrek, gozokien eta, noski, ume kopuruaren arabera.
Gustu eta patrika denetarako ospakizunak
/imgs/20070601/img.informe.02.jpg Etxean bertan. Aukerarik tradizionalen eta merkeena baina, era berean, gurasoei lan gehien ematen diena: dena antolatu, apaindu eta egin ondoren, hasieran zegoen bezala utzi behar da guztia. Merkeena den aldetik, aukerarik logikoena badirudi ere, Espainiako familia askok ospakizuna honela egiteko duten oztoporik larriena espaziorik eza da. Ongi pasatzeko gogoa duten hamar haurri aretorik zabalena txiki gerta dakieke eta etxeko zeramika guztia hauts eginik bukatuko da, deskuiduan. Lore-ontzi eta figura garestienak ezkutaturik, etxeko apaintze-lanak hasiko dira: globoak, girlandak, txanoak, plater-basoak… 50 ? 60 euroko kostua, hitz batez. Sandwich edo ogitartekoek, aperitiboek, freskagarriek eta tartak osaturiko askari tipikoa ere 50 euro inguru ibiliko da. Horri, anfitrioiarentzako eta inbitatuentzako litxarreriaz beteriko zorroak gehitu behar zaizkio: beste 10 – 20 euro.- Beste aukera bat: denaz arduratuko den katerin zerbitzua kontratatzea. Aurrekontuak sakela guztien araberakoak izan daitezke: laguneko bost eurotik hasita, 130 euroraino, hamar lagunentzat. Hori bai, amaitutakoan den-dena garbituko dizute.
- Lagunen kopurua kontuan izanik eta etxeak espazioa baliagarri badauka (lorategia, etc.) haurrentzako animazio-enpresa baten zerbitzua kontrata daiteke, bere pailazo, txotxongilo, mago, jolas eta guzti. Prezioak doaz 60 eurotik 90eraino, bi orduko saioagatik.
- Janari azkarreko establezimendua. Ospakizuna etxetik kanpo egiten bada, hauxe da aukerarik merkeena. Hanburgesa edo pizza, patatak, freskagarriak, tarta eta jostailuak opari, jolastokia, animazioa edo gozo-eltzea (aukerak aldatzen dira establezimendu batetik bestera) erdiesteko modukoak dira, haur bakoitzeko bosna euro (gutxienez) gastatuz gero.
- Haur-parkeak. Haurrak nahi erara saltoka eta brinkoka aritzeko etxean nahiko espaziorik izan ezean, aukera polita dira honelakoak. Abantaila nagusia: umeaz gozatzeko aukera izango dute gurasoek eta inbitatuek, ondoren pisu osoa hainbat ordutan garbitu beharraz kezkatu gabe. Haur-parke espezializatuetan boladun kaiolak, txirrista eta beste hamaika aparatu izaten direnez, haurrek hor badute arriskurik gabe dibertitzeko bidea, monitore baten zaintzapean. Horrelako festetan anfitrioiari koroa eta oparia entregatzen zaizkio eta, horrez gainera, inbitatu bakoitzari freskagarri eta ogitarteko bana, patata frijituak, kakotxoak eta elementu behinena: urtebetetze-ospakizuneko tarta, bere kandela eta guzti. Parke batzuetan pailazoak, gozo-eltzea, karaokea eta dantza izaten da haurrentzat. Prezioak astegunaren arabera aldatzen dien arren, zerbitzu hau kontratatzea 8 eta 15 euro artean kostatzen da, haurreko. Beste ohartarazpen bat: honelako ospakizunetan establezimenduek gehienez ere hamar haur onartzen dituzte.
- Jolas-parkea. Norian eta errusiar mendian gora eta behera ibili ondoren, askaria hartzea 13 eta 22 euro artean kostatzen da, haurreko. Prezio batetik besterako aldea ezartzen dute parke batzuek, haurren altueraren arabera: altuenak garestiago ordaintzen du.
- Zoologikoa. Izurdeen zoriontzea hartzea eta gainerako animaliak bisitatzea, haur bakoitzeko, 19 eta 23 euro artean kostatzen da. Honelako urtebetetze-ospakizunetara, ikaskideak baino gehiago, familiartekoak joan ohi dira: lehengusuak, lagun minak, batez ere, asteburua aukeratzen delako honelakoak egiteko.
- Bestelakoak
- Ikastetxea. Ikastetxe askok ikasleentzako urtebetetze-ospakizunak antolatzen dituzte: honelakoetan, bat baino gehiago egin daitezke batera eta, gainera, haurrak ez du lekualdatzen ibiltzeko beharrik. Festako 150 euro inguru baizik kobratzen ez dituzten arren, ikastetxekoak ez diren inbitatuek beste bost bat euroren “isuna” ordaindu behar izaten dute. Haurrentzako diskoteka. Karaokea, dantza, antolatutako jolasak, magoak edo antzerkia, aperitiboak, sandwichak, freskagarriak eta tarta. Hori dena, 10 eurotik aurrera, haur bakoitzeko.
Urtebetetze-ospakizuneko protagonistaren gurasoei hainbat aholku
- Inbitatuak eta anfitrioiaren arteko komunikazioa sustatzea.
- Bai gonbidatuek, bai protagonistak ere, lagunaren etxera edo parkera zertara joan diren argi eta garbi eduki behar dute: salbuespenezko egokiera da-eta, gonbitea egin duen pertsona eta bere senitartekoak errespetatu behar dituztela eta haiekin atsegin jokatu behar dutela azaldu behar zaie. Bidezkoa da, era berean, beraien artean elkarrizketa sustatzea ere, adiskidantza preziatzen eta balioztatzen has daitezen.
- Festa antolatzeko tokiaz erabakia hartzeko unean izan kontuan lekuak zabala ez ezik, inbitatu guztien arteko komunikazioa bideratzeko egokia ere izan behar duela. Honelako ospakizunak haur-parkeetan edo janari azkarrak zerbitzatzen dituzten berariazko establezimenduetan egiten direnean, jolas-espazioa ?maiz, beste ospakizun batzuetako haurrekin partekatu beharrekoa? eta festarako espazioaren artean bereizketarik ez ohi dago. Horren ondorioz, umea biziki asaldaturik etxeratzen da ilunabarrean, eztarria urraturik eta, areago, haserre, gurasoei haserrarazi eta nerbioak galdu arazi dizkielako.
- Eskura duen guzti-guztian parte aktiboa hartu behar du protagonistak, gurasoen zaintzapean, ezinbestez. Haurra izan daiteke dekorazioaren arduraduna: ?zorionak”, “urte askoan” edo antzeko esakuneak agertzen dituzten kartoiak eta marrazkiak, lagunen artean banatu beharreko karamelu zorroak? Hori ospakizun egunean ere praktikan jarri ahal izango du, gonbidatu guztiekiko.
- Egunero gurasoek argudiatzen dituzten estres eta denbora-faltak ez dute aitzakia izan behar umearentzako urteko festarik garrantzitsuena den hori aurrez prestaturiko gertakizun estandar inpertsonal eta partaidetzarik gabekoa bihurtzeko.
- Aukeratutako tokia goi-goi mailakoa izateak ez du garrantzirik. Garrantzi handia duena, ordea, inbitatu ditugun haurrek harreman ona izatea da. Batzuetan, beraien arteko komunikaziorik ez da izaten, ahalik eta azkarren amaitu eta jolastera joan baino ez dute nahi. Horrela, denak elkartu dituen motiboa ahantzirik geratu da.
- Izan kontuan urtebetetze-ospakizun horretako helburu nagusietako bat ongi pasatzea dela baina horrek ez du esan nahi inola ere umeek bere kasa bildu eta taldetxoak eginik jolastu behar dutenik. Horrelakoetan oso litekeena da festako protagonistak edo gonbidaturen batek bere burua diskriminatua sentitzea.
- Hobe da egun ori ospatzeko jende asko biltzen duten tokiak ez aukeratzea; lekua modakoa denean edo festa ilunabarrean egiten bada, bereziki, orduantxe biltzen baita jende gehien. Zaratak, maiz, haurrek eta gurasoek elkar ezagutzeko beharrezkoa den gertutasun giroa lortzea galarazi egiten du.
- Bertan egingo dena urtebetetze-ospakizuna dela adieraziko duten berariazko elementuak ez dauzkan tokia hautatzea ere ez da komeni. Haurrek eginiko marrazkiak edo globoak hormetan itsastea debekatua badago edo ezinezkoa bada beste leku bat bilatzea komeni da. Adiskideak eta janaria garrantzitsuak badira ere, haurrentzako berariazko giroa sortzeak ospakizunari gusturako heltzea ondoriozta dezake.
- Gurasoek ez dute behin ere bereizi behar ospakizunetik; praktika hori ohikoa da, horrelako jokabideak errazten baitituzte kontratazio bidez goitik behera antolatutako festek.
Ospakizuna etxean antolatzeko aholkuak
/imgs/20070601/img.informe.03.jpg Inbitatuek adin bertsukoak izan behar dute. Ezinezkoa izango duzu ospakizun berean haur eta helduak elkartzea: lana biderkatu egingo zaizu eta ezingo dituzu denak artatu.- Balora ezazu zenbat espazio baliagarri daukazun; baliozta itzazu beste nonbait egitearen aldeko eta kontrakoak.
- Ipini etxeko gela bakar bat ospakizuna egiteko; atera itzazu bertatik ahal dituzun altzari guztiak, haurrak zailtasunik gabe ibili eta jolastu ahal izan daitezen.
- Aukeratu egunik aproposena ospakizuna antolatzeko. Egokiena astegun arratsalde batean, ikastetxetik irtetean egitea da: horrela ume gehiago etorriko zaizkizue eta horrek asteburua libre utziko dizue gurasoei famili giroko beste ospakizun kuttunago bat atontzeko.
- Ezarri ordutegi finkoa: adierazi zein ordutan emango den ospakizuna amaitutzat, bertara joandako haurren bila gurasoek etorri beharko dute-eta. Hiru orduko saioa aski da asperrean edo erokerian amiltzeke, planifikatutako egintza guztiak burutzeko.
- Ospakizunaren berri (egun eta ordua) jakinarazten diezuen unean, eskatu umeen gurasoei telefono zenbakia: horrela, zerbait gertatuko balitz, bilaketa errazagoa izango litzateke.
- Haurren adinaren araberakoa izan behar du janariak. Ospakizuna bada ere, ez eman gozoki, aperitibo eta litxarreria gehiegi.
- Haurrak txikiak badira, ez eman elikagai txikiegiak, hala nola almendra, mahaspasa edota karameluak.
- Bermatu bertan izango direla behar adina pertsona heldu haurrak kontrolatzeko; neurri hori are eta hertsiago hartu beharko duzu ospakizuna igerilekutik edo ur-iturrietatik gertu egiten bada.
- Antola ezazu inbitatuak ahalik eta denbora gehien “loturik” edukitzeko jokoren bat. Marrazki bizidunak, adibidez: film arrakastatsu batek festaren azken partean bizirik iraun duten nerbioak baretzeko balio dezake.
Opari ona aukeratzea
- Izan gogoan oparia jaso behar duen pertsonaren premiak eta zaletasunak, zeureen gainetik.
- Jostailuek gurasoek bizipen ludikoak partekatzeko balio dutenez, gurasoak eta seme-alaben arteko harreman hobeak sustatzeko egoki-egokiak dira.
- Ahal dela, ez oparitu berehala alferrikako trasteen apaletan metatuko den jostailurik. Bila ezazu joko edo jolasaren baliagarritasun praktikoa; ahalegin zaitez haurraren sormen eta irudimena sustatuko dituen zerbait oparitzen.
/imgs/20070601/img.informe.04.jpg Har itzazu aintzat umea protagonista bihurtuko duten jostailu edo jolasak.- Indarrean dagoen segurtasun araudia betetzen duten jostailuen enbasean CE marka dago agerian; bila ezazu ikur hori beti.
- Aukeratu oparia sexuen araberako bereizketarik egin gabe; jostailu guztiak egokiak izan daitezke neskatoentzat eta mutikoentzat.
- Izan kontuan haurraren adina eta fabrikatzaileak adierazitako orientazio psikomotorea.
- Ez ito umea jostailuekin. Balia zaitez egun horretaz: eskatu senideei eta lagun minei gauza beharrezkoagoak: pijama, kirol-zapatilak etc.
- Ez ahaztu: liburu bat izan daiteke oparirik hoberena.
- Ez xahutu herentzia osoa egun horretan. Gogoan izan jostailurik onena irudimena dela. Kartoizko kutxa soil bat karrera-autorik zoragarriena izan daiteke.