Relaciones de este contenido

/imgs/20070601/img.informe.01.jpg Bizitzan ibiltzen ikasi ez eta sekulako agenda soziala dute dagoeneko. Lehengusuaren urtebetetze-ospakizunarekin hasi eta, ikastetxean, astero-astero dute haurrentzako ospakizunik markatua beren koadernoan. Horrek ere gurasoei gerrikoa estuaraziz gainera, maiz, familiaren aurrekontua egokiarazten die: hilean hiru urtebetetze baino gehiago ospatu behar eta haur mordoxka bat inbitatu denean, batez ere. Nork bere oparia eramango du, jakina, “zorionak zuri” eskuak hutsik kantatzea itsusia baita; ohitura horrek beste 10 – 15 euro gutxienez aterako dizkio gurasoari poltsikotik, hori baino merkeago gerta daitekeen opari onargarririk topatzea ez baita kontu erraza. Hori, dena den, hutsaren hurrengoa da, anfitrioiei seme edo alabaren urtebetetze-ospakizuna antolatzea kostatzen zaien ahalegin fisiko eta ekonomikoaren aldean.

Ospakizunaren antolamenduari ezinbesteko oparia erantsi behar zaio: bizikleta, panpina-etxea, bideo-kontsola, auto telegidatua edo ordenagailua, estreinakoa. Etxeko txikiena jaiotzaren urtebetetzean zoriontsu egiteak 150 eta 400 euroren gastua ekar dezake, opariak barne. Hona beste kontu bat, garrantzi berekoa: non ospatuko dugu, etxean edo etxetik kanpora? Aspaldi honetan, urtebetetze-ospakizunaz gozatzeko aukerak biderkatu egin dira: egin daiteke jatetxe batean, animatzailearekin edo gabe; aisialdi-parke batean, haurrak nahi erara jolas daitezen, askaria hartu aurretik; jolas-parkean; zoologikoan edo, areago, haurrentzako ile-apaindegi batean: bertan, askaria hartzeaz gainera, mozorroa jantzi eta makillatzeko aukera izango dute umeek; baliteke, era berean, horrelako ile-apaindegietan kit osoa hartzea: ilea apaindu, makillatu eta manikura egitea, marrazki lehiaketan parte hartzen duten bitartean. Ospakizuna etxean egiten bada, txikiekin lehian eta pelean ?kasu askotan, agortu arteraino? ibili beharko dutela ondotxo dakite gurasoek, baina horrelako jaialdiak kuttun eta pertsonalagoak dira, aukeran. Eta, etxeko ekonomiarentzat, kontu nagusia: aurreko edozeinek eskatzen duena baino askoz ere aurrekontu txikiagoarekin egin daiteke.

Gastuen kapitulua osatzeko hor ditugu ikaskideei eta eskolaz kanpoko kideei banatu beharreko karamelu eta gainerako litxarreriak. ?Urtebetetze-ospakizuneko zorroa” hartzearen alde egiten badu, 25 – 70 euroko kostua izan dezake horrek, gozokien eta, noski, ume kopuruaren arabera.