Denean berdintsuak, antza; askotan desberdinak, baina
Oraingoan 250 – 500 gramoko ontzietan merkaturatzen diren hamahiru gazta fresko aztertu dira. Gazta hauek behi, ardi edo ahuntz-esnez edo behi-esne gehi beste batekin nahasirik egiten dira eta 4,14 eurotatik (689 pezeta) 7,16 euro (1.191 pezeta) bitarte kostatzen dira, kiloko. Hamahiru horietatik zazpi era tradizionalean eginak daude (esne pasteurizatuari gatzagi eta hartzigarriak gehitzen zaizkio eta, mamitu ondoren, mami hori jo egiten da (oreak, hautsirik, gatzuna gal dezan) eta horrelaxe sartzen da moldeetan; hauetan hartuko du gaztak bere azken itxura; ondoren ontziratu egingo da, merkaturatzeko; gainerako seiak ultrafiltratuak dira: esne pasteurizatua, gantz eta proteinak dauzkan mintz batean barrena iragazten da; gatzunaren parte bat (hainbat azukre eta gatzekin batera) bazterturik, ontzian sartzen da, bertan gatzagiak eta hartzigarriak eransteko. Beraz, gazta ontzian bertan mamitzen da.
Elikagai polita da gazta freskoa: hartzidura laktikoaz beste eraldaketarik nozitu ez duen esnekia da eta edukiaren %70 ura da; beraz, gantz eta kaloria gehiegirik eduki gabe ere, balio biologiko handiko proteinez, bitaminez (A, B2, B12, niazina, etab.) eta mineralez (kaltzioa, fosforoa, magnesioa, etab.) hornitzen gaitu. Gazta freskoa (eta beste zeinahi esneki, deskrematua ez baldin bada) maiz kontsumitzeak duen eragozpen nabarmen bakarra gantzean datza, batez ere saturatua delako. Haur eta nerabeek bezala, edoskitzaroa edo antzeko egoera fisiologiko berezian dauden helduek ere elikagai aproposa dute; era berean, esnea onartzen ez dutelarik, elikabidean kaltzio gehiago sartu nahi dutenek ere gazta freskoa dute bide egokia.
Hamahiru laginen egoera higieniko sanitarioa zuzen zegoen, araua doi-doi betetzen zuten aldetik, baina haietako bostek mikroorganismo ez patogenoak zenbatzean, kopuru handi samarrak agertu zituzten, kontserbazioa hobetu beharraren seinale.
Dastaketak emaitza onak erakutsi zituen: denetan hoberena Gailla izan zelarik (7,5 puntu), beste sei lagin ere zazpiraino iritsi ziren. Horrela frogatu zen, gazta freskoetan behintzat, gehiago ordaintzea ez dela elikagai goxoagoa eskuratzearen baliokide.
Kalitatea eta prezioaren arteko erlaziorik egokiena Ruiz Francos laginak erakutsi zuen (4,88 euro kiloko) tradizionalen artean; ultrafiltratuetan, berriz, Mama Luise markakoak (6,64 euro kiloko).
Osaketa desberdinak
Horrela ez badirudi ere, gazta fresko guztien osaketak ez dira berdinak. Estraktu lehorraren (hau da, ura suntsitutakoan geratzen den parte solidoa) edukia aldatu egin zen lagin batetik bestera: %23,4tik (Berta) %36ra (Mama Luise) arte. Proteina gehienekoa El Ventero (%15,2) izan zen bitartean, gantz gehien zeukana Mama Luise (%19,8) zen; proteina (%7,7) eta gantz (%10,3) gutxienekoa, aitzitik, Berta. Ultrafiltratuek, garestiago izateaz gainera, kaloria, gantz eta proteina gehiago zuten tradizionalek baino eta, gainera, estraktu lehor kopuru handiagoa erakutsi zuten, parametro horrekiko gantzaren portzentajea antzekoa izan bazen ere. La Pasiega, Berta eta El Monasterio -erdi-gantzatsua honakoa- laginak izan ezik, azterturiko gainerako gaztak gantzatsuak dira, nutriente horren portzentaje %45etik %60ra doalako, estraktu lehorrarekiko. Beste aldetik, kaltzio gehien daukatenak Angulo markako bi laginak dira (352 eta 372 mg/100 g); mineral horren eduki txikiena, aldiz, Bertak (263 mg/100).
Kaloria gutxienekoa Berta da (138 baizik ez ehun gramoko) eta energetikoena Mama Luise (236 kaloria ehun gramoko). Kloruro gehienekoa (erantsitako gatz edukia adierazten du parametro honek) Burgo de Arias (%1) da eta denetan gezenak, berriz, Angulo (%0) eta Arkaute (%0,1) ditugu.
Dastaketan emaitza onak jaso ziren. Epaimahaikoei gehien gustatu zitzaizkienak, tradizionaletan, Gailla, Berta eta Ruiz Francos izan ziren (7,2 eta 7,5 puntu bitartean), eta El Monasterio, García Baquero, Mama Luise eta Burgo de Arias (6,9 -7,4 puntu) ultrafiltratuetan. Tradizionalei dagokienez, ez zen akatsik aurkitu itxura eta trinkotasun aldetik, bai ordea zaporean. Ultrafiltratuek, berriz, alderdi askotan nabarmendu zituzten batetik besterako aldeak. Angulo laginaren itxura gainontzekoen azpitik baloratu zuten dastatzaileek. Zaporeaz eta bukaeraz ari garela, García Baquero, El Monasterio eta Mama Luise gertatu ziren denetan hoberenak.
Gazta freskoaren kalitate sanitarioa
Izaeraz fresko baita eta, gainera, ur asko daukalako, honelako gaztak mikrobiologiaren ikuspegitik arazoak sortzen dituenez, bai lehengaiak bai elaborazio-prozesuko higieneak kalitate-estandar altuak gainditu behar izaten dituzte. Baliteke, halaz ere, neurri horiek aski ez gertatzea saltokirainoko garraioa, komertzioetako bilketa eta agerraldi hoztua eta, areago, kontsumitu bitartean, bezeroaren etxean gordetzea behar bezain arretatsua ez baldin badira. Prozesu horietan zehar, tenperaturak ez du 8º C baino altuagoa izan behar. Segida horretan tenperaturaren igoera txiki bat (hau da, teknikoki “hotz katea haustea” bataiatu dena) aski izan liteke gaztaren kalitate mikrobiologikoa kaltetzeko.
Mikroorganismo koliformeak gazta freskoari dagokion arautegiak ez ditu jasotzen, patogeno gertatzen ez direlako eta, gainera, ikuspegi sanitariotik garrantzirik ez baitute, baldin eta 100.000 uks/g (unitate kolonia-sortzaile gramoko) baino ugariago ez badira. Dena den, koliforme horiek 1000 uks/g mailatik gora agertzeak esan nahi du esnearen pasteurizazioa ez zela nahikoa izan edo produktua ez dela kontserbatu behar bezain ongi. Koliformeen kopuru hori (1000 uks/g) gainditu zuten bost laginekin zer gertatu ote zen? Seguru aski, elaborazioa zuzen eta egokia izanik, gazta fabrikatik irten ondoren jazoko zen endekapena. Arkaute (tradizionala), eta Burgo de Arias, El Ventero, García Baquero eta Angulo (ultrafiltratuak) laginetako koliformeak zenbatzean 1.000 eta 15.000 uks/g agertu ziren: kontsumitzailearentzat inongo arriskurik ez dagoen arren, ezin esan dezakegu gazta horien egoera sanitarioa zuzenena denik.
Itxura guztien arabera, hemen azterturiko gazten elaborazio eta kontrol eragiketak zuzenak izan ziren eta arazoa ekoizpen prozesuan ez omen datza, garraioan eta saltokiko bilketa eta mantentze hoztuan baizik. Dena dela, azterketa konparatibo hau egiteko CONSUMERek erosi zituen lagin guztiak gehienez ere 6º C tenperatura zuten erakustoki hoztuetan zeuden, hau da, behar bezalako hozberoan.
Angulo, Berta eta Mama Luise laginen izendapena ez da arauaren araberakoa: “gazta freskoa” eta “gazta zuri pasteurizatua” baitira Arautegiak jasotzen dituen bi molde bakarrak. “Burgosko gazta” eta antzeko izendapenak, arras tradizionalak izan arren, Arauak ez ditu aintzakotzat hartzen. Hona beste zenbait irregulartasun: Arkaute eta Bien Aparecida laginetan ez da agertzen estraktu lehorrarekiko gantzaren portzentajerik, ezta kategoriarik (gantzatsua, erdi-gantzatsua, etab.) arauak bestelakorik xedatua badu ere. Gailla laginak bere burua erdi-gantzatsu gisa agertzen badu ere, CONSUMERen azterketako emaitzen arabera, gantzatsua da. Bukatzeko, Gailla horrek kontsumitzeko data egokia adierazten duen arren, Arauak xedatutakoa iraungitze data jartzea da.
Laburbilduz eta Konparaketako Taula
Bannan eta bannan
- 250 gramotik 500 gramorainoko ontzietan merkaturatzen diren hamahiru gazta fresko aztertu dira (zazpi tradizionalak eta sei ultrafiltratuak). Behi-, ardi- eta ahuntz-esne pasteurizatuekin (edo behi-esnea ardi- edo ahuntz-esnearekin nahasirik) egiten diren produktu hauen kostua 4,14 eurotik (689 pezeta) 7,16 eurora doa (1.191 pezeta), kiloko.
- Elikagai polita da: gantz edo kaloria gehiegirik izan gabe ere, balio biologiko handiko proteinez, bitaminez eta mineralez (kaltzioa, nabarmen) hornitzen gaitu. Baina gaztaren (esnekien) gantza batik bat saturatua da, hots, osasunari mesede gutxien egiten diona.
- Proteinen, gantzaren, kaloria kopuruaren eta kaltzio edukiaren aldetik, alde nabarmenak hautematen dira, lagin batetik bestera.
- Hainbat laginen etiketa ez da Arauak xedatutakoaren araberakoa. Irregulartasun ohikoenak: produktuaren okerreko izendapena eta derrigor agertu beharreko daturen bat ez azaltzea, hala nola estraktu lehorrarekiko gantz portzentajea edota produktuaren kategoria (gantzatsua, erdi-gantzatsua, etab.).
- Kalitatea eta prezioaren arteko erlazio egokiena, tradizionaletan, Ruiz Francos (4,88 euro kiloko) da; ultrafiltratuetan, berriz, Mama Luise (6,64 euro kiloko).
| MARKA | ANGULO | GAILLA | ARKAUTE |
|---|---|---|---|
| Prezioa (/ Kg) / (pta/ Kg) | 5,70/ 948 | 5,52/ 918 | 4,28/ 711 |
| Izendapena | Burgosko gazta freskoa | Gazta freskoa | Gazta freskoa |
| Osaketa | Behi eta ardi- esne pasteurizatua | Behi eta ardi- esne pasteurizatua | Ahuntz- esne pasteurizatua |
| Adierazitako pisu garbia (g) | 500 | 500 | 400 |
| Egiazko pisu garbia (g) | 495 | 611 | 491 |
| Estraktu lehorra (%) | 32,2 | 29,0 | 26,1 |
| Proteina (%) | 10,8 | 10,2 | 10,5 |
| Guztirako gantza (%) | 16,2 | 15,3 | 14,0 |
| Estraktu lehorrarekiko gantza (%) | 150,3 gantzatsua | 52,7 gantzatsua | 53,7 gantzatsua |
| Energia (Kcal/100 g) | 203 | 185 | 168 |
| Errautsak (%) | 1,4 | 1,8 | 1,6 |
| Kloruroak (%) | 0,0 | 0,6 | 0,1 |
| Kaltzioa (mg/kg) | 3515 | 3025 | 3170 |
| Azido sorbikoa (mg/kg) | 165 | – | 117 |
| Egoera mikrobiolo- gikoa |
Arauaren araberakoa1 | Arauaren araberakoa1 | CArauaren araberakoa1 |
| Dastaketa (1 – 9) | 6,1 | 7,5 | 5,4 |
| MARKA | LA PASIEGA | RUIZ FRANCOS | BIEN APARECIDA | BERTA |
|---|---|---|---|---|
| Prezioa (/ Kg) / (pta/ Kg) | 4,14/ 689 | 4,88/ 812 | 5,93/ 986 | 4,42/ 735 |
| Izendapena | Gazta freskoa | Gazta freskoa | Gazta freskoa | Burgosko gazta freskoa |
| Osaketa | Behi- esne pasteurizatua | Behi eta ardi- esne pasteurizatua | Behi- esne pasteurizatua | Behi- esne pasteurizatua |
| Adierazitako pisu garbia (g) | 500 | 500 | 400 | 500 |
| Egiazko pisu garbia (g) | 551 | 501 | 409 | 505 |
| Estraktu lehorra (%) | 26,6 | 30,7 | 25,8 | 23,4 |
| Proteina (%) | 10,0 | 10,6 | 8,9 | 7,7 |
| Guztirako gantza (%) | 11,2 | 14,2 | 11,7 | 10,3 |
| Estraktu lehorrarekiko gantza (%) | 42,1 gantzatsua | 46,2 gantzatsua | 45,3 gantzatsua | 44,1 erdi- gantzatsua |
| Energia (Kcal/100 g) | 154 | 185 | 154 | 138 |
| Errautsak (%) | 1,9 | 1,9 | 1,8 | 1,5 |
| Kloruroak (%) | 0,4 | 0,5 | 0,5 | 0,3 |
| Kaltzioa (mg/kg) | 3410 | 3355 | 2950 | 2630 |
| Azido sorbikoa (mg/kg) | 312 | – | – | 95 |
| Egoera mikrobiolo- gikoa |
Arauaren araberakoa1 | Arauaren araberakoa1 | Arauaren araberakoa1 | Arauaren araberakoa1 |
| Dastaketa (1 – 9) | 6,6 | 7,2 | 6,9 | 7,2 |
1. Indarreko legeriaren arabera laginaren egoera mikrobiologikoa zuzena bada ere, mikroorganismo koliformeen zenbaketan kopuru handi samarrak hauteman ziren. Horren arrazoia, seguruenik, elaborazioaren ondoren (dela saltokirainoko garraioan, dela metaketan edo freskaturik gordetzean) hotz-katea etetea izan daiteke.
| MARKA | BURGO DE ARIAS | EL VENTERO | GARCÍA BAQUERO |
|---|---|---|---|
| Prezioa (/ Kg) / (pta/ Kg) | 6,56/ 1.091 | 6,60/ 1.098 | 7,16/ 1.191 |
| Izendapena | Gazta zuri pasteurizatua | Gazta freskoa | Burgosko gazta zuri pasteurizatua |
| Osaketa | Behi-esne pasteurizatua | Behi- eta ahuntz-esne pasteurizatua | Behi-esne pasteurizatua |
| Adierazitako pisu garbia (g) | 250 | 250 | 250 |
| Egiazko pisu garbia (g) | 254 | 248 | 251 |
| Estraktu lehorra (%) | 33,7 | 33,8 | 33,3 |
| Proteina (%) | 11,8 | 15,2 | 12,5 |
| Guztirako gantza (%) | 16,8 | 15,4 | 15,9 |
| Estraktu lehorrarekiko guztirako gantza (%) | 49,9 gantzatsua | 45,6 gantzatsua | 47,7 gantzatsua |
| Energia (Kcal/100 g) | 212 | 207 | 206 |
| Errautsak (%) | 1,6 | 1,1 | 1,5 |
| Kloruroak (%) | 1,0 | 0,5 | 0,5 |
| Kaltzioa (mg/kg) | 3183 | 3487 | 3256 |
| Azido sorbikoa (mg/kg) | – | – | – |
| Egoera mikrobio- logikoa | Arauaren araberakoa2 | Arauaren araberakoa2 | Arauaren araberakoa2 |
| Dastaketa (1 – 9) | 6,9 | 6,2 | 7,2 |
| MARKA | ANGULO | MAMA LUISE | EL MONASTERIO |
|---|---|---|---|
| Prezioa (/ Kg) / (pta/ Kg) | 6,84/ 1.138 | 6,64/ 1.105 | 6.68/ 1.111 |
| Izendapena | Burgosko gazta freskoa | Burgosko gazta freskoa | Burgosko gazta fresko erdi-gantzatsua |
| Osaketa | Behi- eta ardi-esne pasteurizatua | Esne pasteurizatua | Behi- eta ahuntz-esne pasteurizatua |
| Adierazitako pisu garbia (g) | 250 | 250 | 250 |
| Egiazko pisu garbia (g) | 249 | 247 | 251 |
| Estraktu lehorra (%) | 34,8 | 36,0 | 29,6 |
| Proteina (%) | 12,3 | 12,8 | 12,4 |
| Guztirako gantza (%) | 16,4 | 19,8 | 12,5 |
| Estraktu lehorrarekiko guztirako gantza (%) | 47,7 gantzatsua | 55,0 gantzatsua | 42,2 erdi- gantzatsua |
| Energia (Kcal/100 g) | 214 | 236 | 176 |
| Errautsak (%) | 1,6 | 1,7 | 0,9 |
| Kloruroak (%) | 0,5 | 0,6 | 0,5 |
| Kaltzioa (mg/kg) | 3719 | 3335 | 3288 |
| Azido sorbikoa (mg/kg) | – | 198 | – |
| Egoera mikrobio- logikoa | Arauaren araberakoa2 | Arauaren araberakoa2 | Arauaren araberakoa2 |
| Dastaketa (1 – 9) | 6,1 | 7,1 | 7,4 |
2. Indarreko legeriaren arabera laginaren egoera mikrobiologikoa zuzena bada ere, mikroorganismo koliformeen zenbaketan kopuru handi samarrak hauteman ziren. Horren arrazoia, seguruenik, elaborazioaren ondoren (dela saltokirainoko garraioan, dela metaketan edo freskaturik gordetzean) hotz-katea etetea izan daiteke.
Laburbilduz
HAMAHIRU GAZTA FRESKOAK, BANAN-BANAN
RUIZ FRANCOS (Elaborazio tradizionalekoak)
- 4,88 euro (812 pta) kiloko. Tradizionaletan, kalitate eta prezioaren arteko erlazio egokiena.
- Mota: gazta freskoa. Behi- eta ardi-esne pasteurizatuez egina. Estraktu lehorrik handienetako (%30,7) bat. Errauts gehienekoa (%1,9), hau da, mineral gehien dauzkana. Egoera mikrobiologikoa: egokia. Dastatze proban (7,2 puntu), hoberenetako bat.
BERTA (Elaborazio tradizionalekoak)
- 4,42 euro (735 pta) kiloko. Aukera polita, hau ere: gantz gutxien eta kaloria gutxien dauzkana den arren, goxoa eta merkea da.
- Mota: gazta freskoa. Izendapena (“Burgosko gazta freskoa”) ez da Arauaren araberakoa. Behi-esne pasteurizatuaz egina. Erdi-gantzatsua. Estraktu lehor txikieneko (%23) eta gantz (%10), proteina (%7,7), kaloria (138 kaloria 100 gramoko) eta kaltzio (263 mg 100 gramoko) gutxieneko lagina. Errauts gehienekoa (%1,9), hau da, mineral gehien dauzkana. Egoera mikrobiologikoa: egokia. Dastatze proban (7,2 puntu), hoberenetako bat.
LA PASIEGA DE PEÑA PELADA (Elaborazio tradizionalekoak)
- 4,14 euro (689 pta) kiloko. Denetan merkeena.
- Mota: gazta freskoa. Behi-esne pasteurizatuaz egina. Estraktu lehorrarekiko gantz portzentajerik txikienekoa (%41,9). Erdi-gantzatsua. Kaloria gutxien daukanetako bat (154 kaloria 100 gramoko). Errauts asko (%1,9), hau da, mineral ugari daukana. Kaltzio eduki handia (341 mg 100 gramoko) Egoera mikrobiologikoa: egokia. Dastatze proban 6,6 puntu.
ANGULO (Elaborazio tradizionalekoak)
- 5,70 euro (948 pta) kiloko.
- Mota: gazta freskoa. Izendapena (“Burgosko gazta freskoa”) ez da Arauaren araberakoa. Behi- eta ardi-esne pasteurizatuaz egina. Tradizionaletan, estraktu lehor handieneko (%32,2) eta gantz (%16,2), proteina (%10,8), kaloria (203 kaloria 100 gramoko) eta kaltzio (352 mg 100 gramoko) gehien dauzkan lagina. Kloruro (%0) eta errauts gutxienekoa (%1,41). Egoera mikrobiologikoa: egokia. Dastatze proban 6,1.
GAILLA (Elaborazio tradizionalekoak)
- 5,52 euro (918 pta) kiloko.
- Mota: gazta freskoa. Behi- eta ardi-esne pasteurizatuaz egina. Etiketa (erdi-gantzatsu gisa agertzen den arren, laborategiko emaitzen arabera gantzatsua da: estraktu lehorrarekiko %52,7 gantz dauka) ez da Arauaren araberakoa. “Iraungitze data” adierazi behar duen arren, “Kontsumitzeko data egokia” agertzen du. Estraktu lehorrarekiko gantz (%15,3), kaloria eta errauts gehien dauzkanetako bat. Kloruro gehienekoa (%0,6). Egoera mikrobiologikoa: egokia. Dastatze proban 7,5 puntu, denetan hoberena.
BIEN APARECIDA (Elaborazio tradizionalekoak)
- 5,93 euro (986 pta) kiloko: tradizionaletan garestiena.
- Etiketa ez da Arauaren araberakoa: “gihar-estraktu lehorra” adierazten duen arren, ez du “estraktu lehorrarekiko gantza” aipatzen, ezta produktuaren kategoria, gantzarekiko. Behi-esne pasteurizatuaz egina. Estraktu lehor gutxieneko bat (%25,8); gantz (%11,7) eta proteina (%8,9) gutxi, eta kalorietan apal (154 kaloria 100 gramoko). Egoera mikrobiologiko egokia. Dastatze proban, 6,9 puntu.
ARKAUTE (Elaborazio tradizionalekoak)
- 4,28 euro (711 pta) kiloko: merke-merkea.
- Mota: gazta freskoa. Ahuntz-esne pasteurizatuaz soilik egina dagoen bakarra. Etiketa, hobetzeko modukoa: ez dio gazta gantzatsua denik. Estraktu lehorrarekiko gantz portzentaje handienekoa (%53,7). Oso kloruro gutxi (%0,1). Egoera mikrobiologikoa: zuzen, baina mikroorganismo koliformeak zenbatzean 1.000 unitate kolonia-sortzaile baino gehiago agertu ziren gramoko; hori, fabrikatik irten ondoren hotz-katea haustearren gertatuko zen, agian. Dastatze proban (5,4 puntu), denetan okerrena.
MAMA LUISE (Ultrafiltratuak
- 6,46 euro (1.105 pta) kiloko.
- Mota: gazta freskoa. Ultrafiltratuetan, kalitatea eta prezioaren arteko erlaziorik egokiena. Izendapena (“Burgosko gazta freskoa”) ez da Arauaren araberakoa. Behi-esne pasteurizatuaz egina (hor nonbait, etiketak ez baitu ezer aipatzen). Estraktu lehor (%36), gantz (%19,8) eta kaloria gehien (236 kaloria 100 gramoko) dauzkana. Estraktu lehorrarekiko gantz (%55) eta errauts (%1,7) gehien dauzkanetako bat. Egoera mikrobiologikoa: egokia. Dastatze proban (7,1 puntu), hoberenetako bat.
EL MONASTERIO (Ultrafiltratuak)
- 6,68 euro (1.111 pta) kiloko. Aukera polita hau ere, goxoa delako, gantz eta kaloria gutxienekoa izaki.
- Mota: gazta freskoa. Izendapena Arauaren araberakoa den arren, “Burgosko gazta” ere adierazten du. Behi- eta ahuntz-esnez egina. Erdi-gantzatsua. Ultrafiltratuetan, estraktu lehor (%29,6), gantz (%12,5), estraktu lehorrarekiko gantz (42,2), balio energetiko (176 kaloria 100 gramoko) eta errauts gutxien (%0,9) dauzkana. Egoera mikrobiologikoa: egokia. Dastatze proban 7,4 puntu, denetan hoberena.
BURGO DE ARIAS (Ultrafiltratuak)
- 6,56 euro (1.091 pta) kiloko: ultrafiltratuetan merkeena.
- Mota: gazta fresko pasteurizatua. Behi-esne pasteurizatuaz egina. Kaltzio (318 mg 100 gramoko) eta proteina (%11,8) gutxienekoa. Egoera mikrobiologikoa: zuzen, baina mikroorganismo koliformeak zenbatzean 1000 unitate kolonia-sortzaile baino gehiago agertu ziren gramoko; hori, fabrikatik irten ondoren hotz-katea haustearren gertatuko zen, agian. Dastatze proban (6,9 puntu).
EL VENTERO (Ultrafiltratuak)
- 6,60 euro (1.098 pta) kiloko.
- Mota: gazta freskoa. Behi- eta ahuntz-esne pasteurizatuez egina. Proteina gehienekoa (%15,2), kaltzio-eduki handikoa (349 mg 100 gramoko). Egoera mikrobiologikoa: zuzen, baina mikroorganismo koliformeak zenbatzean 1.000 unitate kolonia-sortzaile baino gehiago agertu ziren gramoko; hori, fabrikatik irten ondoren hotz-katea haustearren gertatuko zen, agian. Dastatze proban (6,2 puntu).
GARCÍA BAQUERO (Ultrafiltratuak)
- 7,16 euro (1.191 pta) kiloko.
- Mota: gazta zuri pasteurizatua. Denetan garestiena. Behi-esne pasteurizatuaz egina. Izendapena, Arauaren araberakoa daukan arren, “Burgosko gazta” ere adierazten du. Egoera mikrobiologikoa: zuzen, baina mikroorganismo koliformeak zenbatzean 1.000 unitate kolonia-sortzaile baino gehiago agertu ziren gramoko; hori, fabrikatik irten ondoren hotz-katea haustearren gertatuko zen, agian. Dastatze proban (7,2 puntu), hoberenetako bat.
ANGULO (Ultrafiltratuak)
- 6,84 euro (1.138 pta) kiloko.
- Mota: gazta freskoa. Izendapena (“Burgosko gasta freskoa”) ez da Arauaren araberakoa. Behi- eta ardi-esne pasteurizatuaz egina. Kaltzio (372 mg 100 gramoko) gehienekoa. Egoera mikrobiologikoa: zuzen, baina mikroorganismo koliformeak zenbatzean 1.000 unitate kolonia-sortzaile baino gehiago agertu ziren gramoko; hori, fabrikatik irten ondoren hotz-katea haustearren gertatuko zen, agian. Dastatze proban (6,1 puntu), txarrenetako bat.