Non sandan, pero relaxan e alivian

Cando unha parte do corpo nos doe ou molesta, acariciámola. Masaxeámo-lo músculo e os tecidos brandos en busca de alivio. Non resulta estraño, xa que logo, que os beneficios da masaxe e a súa capacidade para mellora-la saúde estean recollidos en escritos milenarios, presentes en múltiples culturas que desenvolveron as súas propias técnicas. Os hindús convertérona en obxecto de estudio, os exipcios confiaban nela para alivia-lo cansazo de corpo e mente, e incluso os gregos socráticos eloxiaron as súas virtudes. Pero se ben a cultura oriental integra a masaxe como unha acción de cura e en ocasións mesmo mística, Occidente tarda en admiti-la súa práctica de xeito regrado e natural. Faino ligado ó deporte, entendéndoo como unha fórmula para combate-la rixidez, as contraccións ou as dores reumáticas, e incluso para favorece-la consolidación de fracturas. Sen embargo, as bondades dunha masaxe non se limitan a estas propiedades fisiolóxicas. Tamén alivian o malestar psíquico e combaten a tensión, relaxan corpo e mente, e se se reciben con confianza e entrega, ofrecen a oportunidade de desconectar por un intre.

Unha masaxe é un xeito de tranquilizarse, recuperar forzas e deixarse mimar

¿Masaxe terapéutica ou relaxante?

A masaxe terapéutica e a relaxante parten de obxectivos moi distintos. A primeira pretende curar ou cando menos calmar certas doenzas, mentres que a segunda persegue unicamente relaxar a quen o recibe ou aliviarlle, por exemplo, a zona das cervicais logo dunha dura xeira. O curativo aplícao o profesional, que coñece o corpo dos seus pacientes e sabe cál é o problema que hai que tratar e cómo se debe masaxea-la zona lesionada ou danada. Ben a través da osteopatía (estiramentos óseos), a quiropraxia (manipulación de puntos concretos nas vértebras) ou a reflexoterapia (presións sobre as terminacións nerviosas de mans e pés), deben ser só os profesionais quen así manipulen o corpo. Pero non cómpre agardar a que apareza unha lesión para acudir a eles. Se se estima que unha dor ou unha molestia persistente é síntoma de que algo vai mal, é que chegou o momento de se poñer en mans dun especialista.

Unha masaxe, non obstante, non é só parte dun tratamento. Pode estar encamiñada á relaxación e confiarse a mans non expertas, aínda que nese caso tan só se masaxearán as zonas do corpo que non presenten lesións.

Atención ó pescozo

Sen dúbida, o máis habitual é solicitar unha masaxe no pescozo e isto non é casual. As preocupacións e os medos, en definitiva, a intranquilidade, concéntranse na caluga. A mala educación postural, hábitos como suxeita-lo teléfono co queixo ou se sentar coas pernas cruzadas, cargan ó longo do día. Pero non só iso. O desequilibrio emocional tamén se sitúa entre a cabeza e as costas. Por iso, unha lixeira masaxe desde a caluga ata os ombreiros ten a facultade de alivia-las molestias e combate-la tensión. Ó fin e ó cabo, deixamos aquilo que nos pesa en mans amigas, algo ó que non estamos afeitos noutros ámbitos ou momentos do día. A terapia da masaxe pódeselle aplicar a toda persoa e influír positivamente nela.

Beneficios dunha masaxe relaxante

Sobre os músculos: Recuperan a elasticidade e disípanse os signos de tensión.
Sobre o sistema nervioso: Proporciona unha sensación relaxante.
Sobre a circulación: Activa o proceso circulatorio, ó aumenta-lo envío de osíxeno ós tecidos.
Sobre a pel: O peeling ou a fricción da epiderme axuda a libera-los desfeitos e a elimina-las células mortas.

Como dar unha masaxe relaxante

Unha masaxe pódese entender como un método de evasión que se pode dar e recibir na casa, atendendo a unhas sinxelas pautas. Iso si, lembrando sempre que se trata de aliviar -que non de sandar- molestias leves, ou simplemente vendo nel un xeito de tranquilizarse, recuperar forzas e deixarse mimar.

O tacto é moi importante ó transmitirlle certas sensacións á persoa que recibe unha masaxe. As mans transmiten seguridade, sensibilidade e flexibilidade. Se non son fortes, pódese axudar co peso do corpo para aumenta-la presión, pero sempre deben estar seguras e convencidas.
Como non disporá de padiola, ten que buscar unha superficie firme e cómoda. O chan non o é, pero si a cama ou un simple colchón. O lombo debe quedar en horizontal e sobre todo, a persoa que recibirá a masaxe cómpre que estea cómoda. As embarazadas, sempre de costado.
Elixir unha habitación tranquila, lonxe da cociña ou de despensas que emitan cheiros, evitando correntes de aire.
Crear un ambiente cálido, que axude á relaxación. A musicoterapia cada vez conta con máis adeptos, pero unha conversa agradable pode ser igual de tranquilizante. Cómpre evita-la luz directa e demasiado intensa, xa que obrigaría á persoa a contrae-las pálpebras.
Pódense usar aceites balsámicos, suaves e neutros, ou simplemente cremas hidratantes. A súa función é nutri-la pel e axuda-las mans inexpertas a se deslizaren suavemente.
Manter un ritmo constante, facendo que cada movemento siga con naturalidade o anterior. Se se masaxean as pernas, comezar desde os pés ata chegar á ingua. Trátase de ir gañando centímetros ós poucos, movendo as mans de maneira horizontal, achegándonos ó corazón para favorece-lo retorno venoso e a drenaxe linfática. Se se masaxean as cervicais, facelo en círculo, evitando premer calquera nó que se atope.
Non esquece-las mans e os pés. Nas nosas extremidades atópanse terminacións nerviosas, e sobre elas pódese actuar dunha maneira moi suave e sen riscos.
Non deixar nunca de estar en contacto con quen recibe a masaxe. Esta é unha máxima respectada sempre polo especialista, sexa cal sexa a técnica que desenvolva, e é que a temperatura e a enerxía non se deben ver alteradas.
Unha vez recibida a masaxe, convén abrigarse para garda-la calor da pel.
Recoméndase non comer polo menos dúas horas antes da masaxe para evitar que o sangue estea aínda axudando a face-la dixestión. Tampouco beber auga previamente, por non interrompe-la sesión para ir ó servicio.
O obxecto é logra-lo efecto sedante. Con media hora de sesión é abondo.
Unha precaución que hai que ter moi presente: nunca recibir unha masaxe con febre. A masaxe sobe a temperatura corporal. Se se ten a tensión baixa, hai que ser conscientes de que se sente menos dor e pode que, ó manipular moito unha zona, esta se resinta.