Garestienek ez dute lortu emaitza hobea dastatze proban
11 ozpin botila aztertu ditugu, Borges, Ybarra, Louit eta Aliño etxeetakoak. Kristalezko botilatan etorri dira, eta neurri bat baino gehiagokoak izan dira: 250, 500 eta 750 mililitrokoak. Horietako hiru ardo-ozpinak izan dira, beste lau Modenako ozpinak (“aceto balsámico di Módena” dute berezko izena; adierazpen geografiko babestua erregulatzen duen araudia aurki onartuko du Europako Batasunak, eta Ybarra etxeak soilik ziurtatzen du egiaz Modenako ozpina dela); beste lau ozpin, berriz, Jerez ardoarekin eginak izan dira, Jatorri Izena dutenak, gainera (Ybarra etxekoa, Erreserbakoa da). Ardo-ozpinen artean, Borges eta Louit etxekoek diote Errioxako ardoz eginak daudela, eta Ybarra-k dio ardo onduarekin egina dela (Cadizko palomino mahatsetik lortua eta 12 hilabetez upelean zahartua). Hiruretatik Modenakoa da garestiena: batez beste, 8,6 euro balio du litroak; Jerez Jatorri Izenekoak 5,7 euro eta ardo-ozpinetan, berriz, 3,9 euro. Ozpinari, oraintsu arte, ez zaio eman izan garrantzi berezirik sukaldean, eta nekez pentsa zitekeen inork hainbeste ordainduko zuenik botila bat, ardo on samarraren pare.
Laborategian egin ditugun analisiek erakutsi dute 11 ozpinek ongi betetzen dituztela lege betebehar guztiak (estraktu lehorra, mineralak, azukreak, gatza, hondar-alkohola…), eta gai kutsakorrei dagokiena ere bai (legeak gehienezko kopuru bat ezartzen du, eta guztiek errespetatu dute muga hori). Etiketak ere ongi emanak dituzte.
Dastatze probari ere egin dugu eta ondorio adierazgarriena, prezio aldea ez dutela kontsumitzaileek nabaritu. Erabiltzaileei ez zaizkie gehiago gustatu ustez kalitate gehiago dutenak (ardo-ozpinetan, ardo onduarekin egina; Jerez-ozpinetan, Erreserbakoa eta Modenakoan, ziurtagiria dakarrena). Kalitate-prezioak aintzat hartuta, Borges etxekoa gailendu da Modenakoetan eta Louit etxekoa ardo-ozpinetan zein Jerez Jatorri Izena daukatenetan.
Ozpina: osasuna eta erabilera
Ozpinak elikadura-balio gutxi dauka, eta, gainera, kopuru txikietan erabili ohi da. Azido azetiko asko izaten du, oso mingotsa gertatzen da, eta minberatu egin dezake digestio hodiaren mukosa; eta lehendik minberatua badago, urdaileko azidotasuna handitzen du, eta ondoeza eragiten du, edo lehendik daukaguna areagotzen. Bestalde, legeak onartzen du ozpinek sulfitoak eduki ditzaten kontserbagarri moduan (E-220 eta E-224), eta gai horiek alergiak eta asma krisiak sortu ahal dituzte halako arazoak dituztenengan. Kalitateko ozpinak, batik bat, jakiak hornitzeko erabiltzen dira, zaporea eta usaina emateko. Mingots ukitu hori oso ongi etorri ohi da entsaladak eta barazkiak gatz-ozpintzeko, eta saltsa eta plater batzuk prestatzeko. Zenbait ozpini, gainera, belar eta espeziak eransten dizkiete lurrina emateko (baratxuria, piperra, ezkaia, binagrera). Baina ozpinak baditu beste erabilera batzuk ere; besteak beste, kontserbagarri ona da: azidotasunari esker, elikagai gutxiago galtzen dituzte jakiek prestatzeko orduan. Eta barazkiak uretan sartu eta ozpina botatzen badiogu urari, C bitamina ez zaio gutxituko. Eta mikrobioen aurka ere egiten du: ez du uzten zenbait mikrobio patogeno haz daitezen, nahiz eta ez dituen desagerrarazten. Ozpinetan onduta datozen jakiek ozpina izaten dute kon-tserbagarri nagusi (tipuleta, luzokertxo, kapar eta olibek). Elikagaiek luzaroago iraun dezaten ere balio du, eta ezinbesteko osagaia da jakiak olio-ozpinetan presta,tzeko, marinatzeko, ziapea egiteko eta hainbat saltsa lortzeko.
Zer daukate ozpinek?
Ozpin hauen osagaiak ardo-ozpina bera eta kontserbagarriak dira. Modenakoek mahats muztio kontzentratu eta egosia ere badute, eta koloragarria (Louit eta Aliño etxekoen osagai zerrendan ez da ageri, hala ere). Muztioa eransten dietenez, Modenakoek azukre gehixeago daukate, eta ardo-ozpinak eta Jerez-ozpinak baino zertxobait azidoagoak dira. Ozpina, oro har, mingotsa izaten da, eta ia ez du edukitzen azukrerik (ardoarekin eta Jerezarekin egindakoek, 0,6 g/ml), eta, beraz, kaloriarik ere ez du ematen; Modenako ozpinek, aldiz, dezente azukre gehiago dute (gutxien duenak 13 g/100 ml ditu, eta gehien duenak, Borges etxekoak, 24 g/10 ml), eta kalorietan ere badu ondorioa horrek: 56 kaloria ematen ditu lehenak 100 mililitro bakoitzeko, eta 96 kaloria bigarrenak. Ardo-ozpinek 4 kaloria soilik dituzte 100 mililitro bakoitzeko. Ozpinaren azukre kopuruak, hala ere, ez dio askorik eragiten dietari, oso ozpin gutxi erabiltzen baita jakiak prestatzeko.
muztio kontzentratua eransten zaielako
Estraktu lehorra ere (ura kenduta geratzen den hori) gehiago daukate Modenako ozpinek (% 19, batez beste), ardo-ozpinek (% 1,4) eta Jerez-ozpinek baino (% 1,3). Errauts kopurua ere neurtu dugu, mineralen berri izateko (honako hauek ditu ozpinak, nagusiki: potasioa, fosforoa, magnesioa, sodioa eta kaltzioa), eta oso-oso gutxi antzeman diegu guztiei, eta nahiko kopuru antzekoa denei ere. Eta berdintsu gertatu da gatzarekin ere: batez beste, 0,2 gramo dauzkate litroko, eta arauak dio, gehienez, 1 gramo eduki dezaketela litro bakoitzeko ardo-ozpinek eta Jerez-ozpinek. Koloragarririk ez da ageri ardo- eta Jerez-ozpinen osagai zerrendan. Modenako batzuek badaukate, Borges eta Ybarra etxekoek (E-150d, amonio sulfitoaren karamelua), baina dastatze proban ez dute alderik antzeman “kolorearen” atalean. Kontserbagarriak, berriz, guztiek dauzkate, baina legeak onartzen dituenak dira: potasio metasulfitoa (E-224), sufre dioxidoa (E-220) eta anhidrido sulfurosoa. Guztira zenbat sulfuroso (SO2) daukaten ere neurtu dugu, eta kopuruak lege barruan dabiltzala ikusi dugu (mugaren oso azpitik dauzkate).
Beste alderdi batzuk
Ozpina egiteko prozesuan, azido azetikoa sortzen da; ardoa hartzitzen ari denean, bakterio azetikoek ardoaren alkohola eta giroan dagoen oxigenoa konbinatzen dituzte, eta azido azetikoa eta ura sortzen dituzte. Arauak dio gu-txieneko azidotasun bat eduki behar duela ozpinak, eta azido azetikoak eman behar diola hori: 6 g/100 ml ardo-ozpinak eta Modenakoak, eta 7 g/100 ml Jerez-ozpinak. Ozpin guztiek eman dituzte emaitza egokiak. Modenako ozpinek, batez beste, 6,2 gramoko azidotasuna eman dute 100 mililitro bakoitzeko, eta ardo-ozpinek eta Jerez-ozpinek, zertxobait gehiago (7,3 gramo 100 mililitro bakoitzeko).
Bestalde, ozpinak zenbat hondar-alkohol eduki dezakeen ere esaten du arauak. Jerez-ozpinek % 3 arte eduki dezakete, ardo-ozpinek % 0,5 arte eta Modenakoek, % 1,5 arte. Aztertu ditugun guztiek bete dute araua. Modenakoen artean, Borges etxekoak dauka alkohol gehien (% 0,2), eta ardo-ozpinetan, Ybarra etxekoak (% 0,3); Jerez-ozpinetan, Alino etxekoak eman du gehien (% 1,6), eta Ybarra etxekoak gero (% 0,5).
Sulfatoen atala ere aipatu beharrekoa da. Ardoei eranstea libre izaten da, herdoila sortzea eragozteko, baina ozpinetan mugatu egiten dute kopurua: Jerez-ozpinak, gehienez, 3,5 gramo eduki ditzake litroko, eta ardo-ozpinek, 2 gramo litroko; Modenakoetan, berriz, ozpin mota hori arau-tzen duen erakundeak ez du jartzen mugarik sulfatoentzat. Ozpin guztiek emaitza egokiak lortu dituzte (gramo bat baino gutxiago antzeman dugu litroko guztietan).
Azkenik, gai kutsakor eta ez-desiragarrien kopuruak ere arau barruan dabiltza guk aztertu ditugun ozpinetan. Metanola da horietako bat: ardoak edo ozpinak egurrezko upeletan edukitzen dituzte zahartzen, eta gerta daiteke egurraren pirolisiaren eraginez agertzea gai horiek (beroaren eraginez materia organikoa kimikoki deskonposa-tzea, hori da pirolisia). Metal astunak ere edukitzen dituzte: artsenikoa, kobrea, merkurioa, beruna eta zinka (zoruan, uretan edo airean egon daitezke, industria jardunak sortzen duen kutsaduraren eraginez).
Hiru ozpin motak eta konparatzeko taula
Hiru ozpin motak
Ardo-ozpina beste biak baino ohikoagoa da eta ekoitzi ere gehiago egiten da. Ardoaren hartzidura azetikotik lortzen da, eta ardo mota bat baino gehiago erabil daitezke. Ozpinaren araudi orokorra 1993. urtetik dago indarrean Espainian, baina Jatorri Izena duten ozpin bakoitzak (Modena eta Jerez Jatorrikoek, adibidez). Modenako ozpinen artean, bi eratakoak daude: ekoizpen tradizionalekoa (Jatorri Izena duena) eta komertziala edo “Aceto balsámico di Módena”. Guk azterturiko laurak, halakoak izan dira, komertzialak eta Ybarra etxekoak soilik dauka zigilua esanez Modenan eta Regio Emilian (Italia) egina dela, eta mahatsa Emilia Romagna eskualdekoa dela. Ardoa eta muztio kontzentratua nahasiz lortzen dituzte Modenako ozpin komertzial hauek, eta koloragarria, karamelua eta kontserbagarriak eransten dizkiete; Modenako ozpin tradizionala, aldiz (“tradizionale”), ardo-muztio egosia ozpintzen utzita lortzen dute, eta ez diete eransten ez egonkortzailerik eta ez karamelurik. “Tradizionale” deitzen duten ozpinak, gainera, gutxienez 12 urtez egon behar du zahartzen, eta komertzialek gutxienez 3 urte. Komertzialen artean, honako mota hauek bereizten dira: “Giovanne” (ozpinak 3 urte egon behar du haritzezko upeletan, eta oso egokia izaten da entsaladari botatzeko), “Maturo” (5 urtez egon behar du zahartzen; gozo ukitu handiagoa du, eta lurrin handiko platerak prestatzeko erabiltzen da) eta “Vecchio” (10 urtez edukitzen dute upeletan, lurrin eta zapore handia izaten ditu, gozo ukituekin; edozertarako erabil daiteke sukaldean). Modenako ozpina berotzen bada, azidotasuna galtzen du eta gozo zaporea ere bai; hozkailutik kanpora, ordea, ongi irauten du behin irekita ere.
“Jerez Jatorri Izeneko Ozpina”, berriz, Jerez-Xerez-Sherry Jatorri Izena duten ardoetatik lortzen da (Cadizen eta Sevillan egiten dute). Kolorea urre zaharraren eta kaobaren artekoa da, itxura trinkoa izaten du, lurrin sakona eta zapore mingots bizi-bizia. Hondar-alkohola izaten du, eta horrek badu eragina ozpin hauen kalitate eta berezitasunean (ontzeko edo zahartzeko prozesua ere berezia izaten dute). Modu bat baino gehiago daude ozpin mota hau egiteko: batzuetan, upelak zahartze adinaren arabera antolatzen dituzte, eskala homogeneo batean, batzuk besteen gainean jarrita (zaharrenak azpian -zolan- eta gazteagoak gainean); azpiko upel bakoitzetik ozpin pixka bat ateratzen dute -horrekin betetzen dituzte ozpin botilak- eta, haren lekuan, ontze-aldi gazteagoko ozpina eransten dute, gaineko upeletan dagoen ozpina, alegia (“solera eta criadera” izena ematen zaio sistema horri, zolan geratzen diren upelekin eta ontze-aldiarekin jokatzen duelako). Ozpina ontzeko beste sistema estatikoa izaten da: zahartze azetiko batetik datozen ozpinak upel berean zahartzen dituzte, bestelako ozpinekin nahasi gabe (“uztakako” sistema esaten zaio horri). Modu batean edo bestean egin, Jerez-ozpina hiru eratakoa izaten da: Jerez-ozpina (gutxienez, 6 hilabetez zahartu dena), Erreserbako Jerez-ozpina (2 urtez zahartua) eta Erreserba Handiko Jerez-ozpina (10 urtez zahartua). Eta zein ardo motarekin egin den kontuan hartuta, bi motatako Jerez-ozpin erdigozoak bereizten dituzte: “Pedro Ximénez” erakoa eta “Moscatel” erakoa.
| Marka | Borges | Ybarra | Louis | Aliño |
|---|---|---|---|---|
| Salgaiaren izena | Modenako ozpin baltsamikoa | Modenako ozpin baltsamikoa | Modenako ozpin baltsamikoa | Modenako ozpin baltsamikoa |
| Formatua (ml) | 500 | 250 | 250 | 250 |
| Prezioa (Euro/litro) | 6,66 | 10,23 | 7,73 | 9,58 |
| Estraktu lehorra (%) 1 | 25,7 | 15,7 | 16,5 | 19,7 |
| Errautsak (%) 2 | 0,3 | 0,5 | 0,5 | 0,4 |
| Azukreak (g/100ml) 3 | 23,6 | 13,4 | 14,1 | 17,2 |
| Gatza (g/litro) 4 | 0,2 | 0,2 | 0,2 | 0,1 |
| Sulfurosoa, guztira (mg/l100ml) 5 | 1,9 | 1,5 | 1,3 | 1,5 |
| Azidotasuna (azido azetiko %) 6 | 6,1 | 6,4 | 6,2 | 6,2 |
| Hondar-alkohola (%) 7 | 0,2 | 0,1 | 0,1 | 0,04 |
| Sulfatoak (g/litro) 8 | 0,88 | 0,63 | 0,31 | 0,57 |
| Metanola (%)9 | Egoki | Egoki | Egoki | Egoki |
| Metal astunak 10 | Egoki | Egoki | Egoki | Egoki |
| Dastatze proba (1etik 9ra) | 6,6 | 6,0 | 6,4 | 6,2 |
| Marka | Louit | Borges | Ybarra |
|---|---|---|---|
| Salgaiaren izena | Errioxako ardoarekin egindako ozpina | Errioxako ardoarekin egindako ozpina | Ardo onduarekin egindako ozpina |
| Formatua (ml) | 750 | 250 | 500 |
| Prezioa (Euro/litro) | 2,13 | 6,20 | 3,30 |
| Estraktu lehorra (%) 1 | 1,1 | 1,4 | 1,7 |
| Errautsak (%) 2 | 0,2 | 0,2 | 0,3 |
| Azukreak (g/100ml) 3 | – | – | – |
| Gatza (g/litro) 4 | 0,1 | 0,2 | 0,1 |
| Sulfurosoa, guztira (mg/l100ml) 5 | 1,6 | 1 baino gutxiago | 1 baino gutxiago |
| Azidotasuna (azido azetiko %) 6 | 7,2 | 6,3 | 8,4 |
| Hondar-alkohola (%) 7 | 0,1 | 0,1 | 0,3 |
| Sulfatoak (g/litro) 8 | 0,84 | 0,79 | 0,41 |
| Metanola (%)9 | Egoki | Egoki | Egoki |
| Metal astunak 10 | Egoki | Egoki | Egoki |
| Dastatze proba (1etik 9ra) | 6,5 | 6,0 | 5,6 |
| Marka | Louit | Borges | Ybarra | Aliño |
|---|---|---|---|---|
| Salgaiaren izena | Jerez-ozpina | Jerez-ozpina | Erreserbako Jerez-ozpina | Jerez-ozpina |
| Formatua (ml) | 750 | 250 | 500 | 250 |
| Prezioa (Euro/litro) | 2,47 | 6,14 | 7,36 | 6,76 |
| Estraktu lehorra (%) 1 | 1,1 | 1,6 | 1,2 | 1,1 |
| Errautsak (%) 2 | 0,3 | 0,3 | 0,2 | 0,4 |
| Azukreak (g/100ml) 3 | – | – | – | – |
| Gatza (g/litro) 4 | 0,1 | 0,2 | 0,1 | 0,1 |
| Sulfurosoa, guztira (mg/l100ml) 5 | 1 baino gutxiago | 1 baino gutxiago | 1 baino gutxiago | 1 baino gutxiago |
| Azidotasuna (azido azetiko %) 6 | 7,3 | 7,3 | 7,4 | 7,3 |
| Hondar-alkohola (%) 7 | 0,3 | 0,2 | 0,5 | 1,62 |
| Sulfatoak (g/litro) 8 | 0,85 | 0,78 | 0,25 | 0,87 |
| Metanola (%)9 | Egoki | Egoki | Egoki | Egoki |
| Metal astunak 10 | Egoki | Egoki | Egoki | Egoki |
| Dastatze proba (1etik 9ra) | 6,4 | 6,4 | 6,7 | 5,5 |
1. Estraktu lehorra (ura kentzean geratzen dena): ardo- eta Jerez-ozpinek 1,3 gramo baino gehiago eduki behar dituzte litroko. Modenakoek, gutxienez, 30 gramo eduki behar dituzte litroko (halaxe zehazten du Modenako Ozpin Baltsamikoaren Partzuergoak).
2. Errautsak: alderdi honek mineralekin du zerikusia (zenbat errauts eduki, hainbeste mineral izango dituzte). Ardo-ozpinek % 0,1 eta 0,5 artean eduki behar dituzte, eta Jerez-ozpinek, % 0,2 eta 0,7 artean.
3. Azukreak: Modenakoetan soilik ageri dira, mahats muztioa eransten baitiote.
4. Gatza: gehienez, 1 gramo eduki dezakete litroko.
5. Sulfurosoa: gehienez, 17 mg/100 ml. Modenakoei beste muga bat jartzen zaie: 10 mg /100 ml.
6. Azidotasuna: ardo-ozpinak, gutxienez, 6 gramo eduki behar ditu azido azetikoa 100 mililitro bakoitzeko; Jerez-ozpinak, 7 gramo 100 mililitro bakoitzeko. Modenakoek, berriz, 6 gramo, gutxienez, 100 mililitro bakoitzeko.
7. Hondar-alkohola. Jerez-ozpinek % 3 eduki dezakete, gehienez, eta ardo-ozpinek, % 0,5. Modenakoei, % 1,5 arte onartzen die legeak.
8. Sulfatoak: ozpina ez herdoiltzeko izaten dira. Jerez-ozpinei 3,5 gramo onartzen dizkiete litroko, eta ardo-ozpinei, 2 gramo litroko. Modenakoek ez daukate mugarik.
9. Metanola: ozpinek, oro har, 0,1 gramoko muga izaten dute 100 mililitro bakoitzeko; Jerez-ozpinei 25 miligramo arteraino onartzen dizkiete 100 mililitro bakoitzeko.
10. Metal astunen gehienezko kopuruak: merkurioa, 0,05 z/m (zati milioiko); artsenikoa, 0,5 z/m; beruna, 0,5 z/m; kobrea eta zinka, 10 z/m. Jerez-ozpinetan, ez dago gehienezko mugarik kobrearentzat eta zinkarentzat.
Banan-Banan
11 kalitatezko ozpin banan-banan
LOUIT "Errioxako ardoz egindako ozpina"
- Kristalezko botilan etorri da (750 ml).
- Litroak 2,13 euro balio du, eta hau izan da merkeena aztertu ditugun guztietan.
- Kalitate-prezioak aintzat hartuta, hau da aukerarik onena ardo-ozpinetan.
- Azidotasuna: % 7,2.
- Dastatze proban 6,5 puntu lortu ditu, eta kontsumitzaileek ez dute alderik sumatu honen eta gainerako ardo-ozpinen artean.
- Ez dute ezaugarri bat nabarmendu, eta kritika jakinik ere ez diote egin.
YBARRA "Ardo onduarekin egindako ozpina"
- Kristalezko botilan etorri da (500 ml).
- Litroak 3,30 euro balio.
- Besteek baino azidotasun handiagoa du (% 8,4), baina muga barruan dabil, hala ere.
- Dastatze proban 5,6 puntu. Kontsumitzaileek ez dute alderik sumatu honen eta gainerako ardo-ozpinen artean. “Azidotasun maila” eta “usaina” gustatu zaizkio jendeari, baina ez zaporea (“bizi-bizia”) eta “usaina”.
BORGES "Errioxako ardoarekin egindako ozpina"
- Kristalezko botilan etorri da (250 ml).
- Litroak 6,20 euro balio du, eta hau izan da garestiena ardo-ozpinen artean.
- Azidotasuna: % 6,3.
- Dastatze proban 6 puntu. Alderik ez diote antzeman kontsumitzaileek gainerako ardo-ozpinekin. “Kolorea” gustatu zaio jendeari, baina ez “gozotasuna”.
LOUIT "Jerez-ozpina"
- Sei hilabetez baino gehiagoz zahartua
- Kristalezko botilan etorri da (750 ml).
- Litroak 2,47 euro balio du, eta Jerez-ozpinetan merkeena izan da.
- Kalitate-prezioak aintzat hartuta, hau da aukerarik onena Jerez Jatorri Izeneko ozpinetan.
- Azidotasuna: % 7,3.
- Dastatze proban 6,4 puntu. “Gozo ukitua” gustatu zaie kontsumitzaileei, ez, ordea, kolorea (“iluna” iruditu zaie).
BORGES "Jerez-ozpina"
- Sei hilabetez baino gehiagoz zahartua
- Kristalezko botilan etorri da (250 ml).
- Litroak 6,14 euro balio du.
- Azidotasuna: % 7,3.
- Dastatze proban 6,4 puntu. “Kolorea” gustatu zaie, baina ez usaina (“gehiegizkotzat” jo dute).
YBARRA "Erreserbako Jerez-ozpina"
- Bi urtez baino gehiagoz zahartua
- Kristalezko botilan etorri da (500 ml).
- Litroak 7,36 euro balio du, eta Jerez-ozpin guztietan garestiena izan da.
- Azidotasuna: % 7,4.
- Dastatze proban 6,7 puntu. “Zapore bizia” duelako gustatu zaio jendeari, baina “usaina” ez dute atsegin izan.
ALIÑO "Jerez-ozpina"
- Sei hilabetez baino gehiagoz zahartua
- Kristalezko botilan etorri da (250 ml).
- Litroak 6,76 euro balio du.
- Azidotasuna: % 7,3.
- Honek eduki du hondar-alkohol gehien (% 1,6), baina araua betetzen du (% 3 baino gutxiago eduki behar dute).
- Dastatze proban 5,5 puntu. Beste Jerez-ozpinak baino gutxiago gustatu zaie kontsumitzaileei. “Usaina” ez dute atsegin izan.
BORGES "Modenako ozpin baltsamikoa"
- Kristalezko botilan etorri da (500 ml).
- Litroak 6,66 euro balio du, eta merkeena izan da mota horretakoetan.
- Azidotasuna: % 6,1.
- Kalitate-prezioak aintzat hartuta, hau da aukerarik onena Modenako ozpinetan.
- Honek dauka azukre gehien (24 g/100 ml), eta kaloriak gehien: ia 100 kaloria 100 gramo bakoitzeko.
- Koloragarria ageri duen bakarretakoa da: E-150d (amonio sulfitoaren karamelua).
- Dastatze proban 6,6 puntu. Kontsumitzaileek ez diote alderik sumatu Modenako gainerakoekin. “Azidotasun maila” gustatu zaie, “gozotasuna” eta “usaina”, baina zapore gutxitxo duela esan dute.
LOUIT "Modenako ozpin baltsamikoa"
- Kristalezko botilan etorri da (250 ml).
- Litroak 7,73 euro balio du.
- Azidotasuna: % 6,2.
- Dastatze proban 6,4 puntu. Kontsumitzaileek ez diote alderik sumatu Modenako gainerako ozpinekin. “Azidotasun leunekoa” delako gustatu zaio jendeari, eta “lurrintsua” delako ere bai; honek ere “zapore gutxitxo” duela nabarmendu dute.
ALIÑO "Modenako ozpin baltsamikoa"
- Kristalezko botilan etorri da (250 ml).
- Litroak 9,58 euro balio du.
- Azidotasuna: % 6,2
- Borges etxekoaren ondotik, honek du azukre gehien Modenakoen artean: 17 g/100 ml.
- Dastatze proban 6,2 puntu. Kontsumitzaileek ez diote alderik sumatu Modenako gainerako ozpinekin.
- “Azidotasun leunekoa” delako gustatu zaie, baina “usain gutxikotzat” jo dute.
YBARRA "Modenako ozpin baltsamikoa"
- Kristalezko botilan etorri da (250 ml).
- Litroak 10,23 euro balio du, eta hau izan da garestiena aztertu ditugun guztietan.
- Modenakoen artean, honek bakarra dauka jatorri eta egiazkotasun ziurtagiria, baina dastatze proban ez da nabarmendu besteen gainetik.
- Azidotasuna: % 6,4.
- Modenakoen artean, honek du azukre gutxien (13 g/100 ml).
- Osagai zerrendan koloragarria ageri duen bakarretakoa da: E-150d (amonio sulfitoaren karamelua).
- Dastatze proban 6 puntu. Kontsumitzaileek ez diote alderik sumatu Modenako gainerako ozpinekin. “Azidotasun maila” gustatu zaio jendeari, eta alde txarrik ez diote aurkitu.