Listeria e saúde
A listeria monocytogenes está moi presente na natureza (solo, augas residuais, auga de ríos, ferraia para os animais, insectos, intestino do ser humano…). Polo tanto, temos que convivir con ela, e malfadadamente, os controis sanitarios da industria alimentaria non son aínda eficaces de todo para combater esta bacteria.
Detectouse listeria en alimentos como vexetais, leite cru e derivados, xeados, polo, carnes crúas ou pouco feitas, peixes crus e afumados e pratos preparados. A listeria pode producir graves problemas de saúde, especialmente a mulleres embarazadas, neniños, anciáns, diabéticos, cancerosos, trasplantados e pacientes da sida ou doutras inmunodeficiencias. Aconséllase a estes grupos de risco evita-los queixos frescos e cremosos e as comidas crúas ou pouco cociñadas.
E suxírese quentar ata case a fervura os pratos precociñados antes de os consumir.
En realidade, a listeria causa moi poucas intoxicacións en seres humanos. E para que ocorran, os alimentos inxeridos han conter altos recontos desta bacteria patóxena; un baixo número non é problemático. Evitemos, xa que logo, que os alimentos máis proclives a contela se atopen nas condicións en que a bacteria se reproduce máis axiña. Fundamental: que se manteña a cadea de frío tanto na elaboración dos productos alimentarios e na súa distribución coma no fogar do consumidor. Pero isto non abonda, cómpre minimiza-la presencia de listeria nos centros de elaboración de alimentos. Urxe que a industria e as autoridades públicas adopten as medidas necesarias para que esta bacteria non cause máis problemas na saúde dos consumidores.