Prevención, revisión e diagnóstico, puntos clave
Son moitos os fogares que conviven coa humidade, un incómodo inimigo que provoca sensación de frío, propicia a aparición de mofos, ácaros, manchas nas tapicerías e que pode chegar a lles causar problemas respiratorios ós habitantes da casa. Se non se tratan debidamente, as humidades van a máis e pódense converter nun problema moi serio que ocasione danos na construción e, en consecuencia, a deterioración na seguridade da vivenda. A súa eliminación é cousa do especialista; a súa prevención e localización correspóndelle a quen habita a vivenda.
Buscando as causas
- A humidade pode ser provocada pola perda de auga dun cano ou por unha mala drenaxe de fiestras e portas.
- A porosidade dos chans de sotos ou doutras construcións de baixo nivel é responsable de humidades que soben desde o chan cara ó interior dunha vivenda.
- A condensación tamén causa humidades interiores, así como as fendas na cachotería.
- Coidado cos golpes ocasionais que reciben portas e fiestras. Poden producir unha caída do recebo de arredor dos marcos. Por estes espazos pódese filtrar humidade. Encha os ocos con masilla resistente á auga.
- Revise unha vez ó ano o correcto funcionamento das canles, as baixantes de evacuación e o estado de impermeabilización dos muros. Non descoide tampouco o grao de limpeza da rede de drenaxe e evacuación e as posibles fisuras e fendas do chan. Non esqueza a limpeza e o correcto funcionamento dos desaugadoiros (sumidoiros, canlóns e rebordadoiros) da cuberta.
- Comprobe cada tres anos se se abriron fisuras, deformacións, etc., na fachada e o estado de conservación do tellado (tellas, cambios de inclinación, etc.).
Como detectar o problema
- Comprobe se se trata ou non dun problema de condensación pegando con cinta adhesiva un cacho de papel de aluminio sobre a parede afectada. Se aparece bafo na cara visible do aluminio, hai condensación.
- As filtracións por chuvia que afectan o interior da vivenda maniféstanse a xeito de manchas perfectamente delimitadas que medran co aumento das precipitacións.
- Un dos síntomas de humidade exterior é a aparición de eflorescencias brancas na fachada. O mofo, o musgo ou as fendas tamén son indicio de humidade.
- Se a súa parede presenta, tanto por fóra coma por dentro, manchas brancas de salitre, o seu problema é a humidade ascensional (chamada así porque sobe pola parede desde o chan). Se non o trata, co tempo pode aparecer musgo no exterior, mentres que no interior a pintura irá escachando e a parede se irá enchendo de mofo.
- As chamadas humidades accidentais proveñen de fugas nos condutos de auga (rotura dun cano, mal selado dunha xunta, etc.). Maniféstanse sobre a parede ou o teito afectado a xeito de auréolas concéntricas que se van facendo máis grandes a medida que a auga se acumula.
- A auga empregada para mesturar os materiais utilizados na construcción (formigón, xeso, morteiro, etc.) adoita exsudar cara á superficie provocando lixeiras humidades que aparecen, indistintamente, en chans, paredes, teitos, etc.
Como combater a condensación
- Emita menos vapor de auga.
- Manteña a temperatura da auga quente a menos de 50º C.
- Cociñe sempre coas potas tapadas.
- Sempre que sexa posible, seque a roupa no exterior da súa vivenda.
- Peche as portas das estancias máis húmidas, sobre todo cociña e baño.
- Evite o funcionamento continuado de aparellos de combustión sen evacuación, sobre todo as estufas catalíticas.
- Na cociña e no baño, procure conducir os vapores cara ó exterior mediante extractores.
- Aumente a temperatura das paredes frías.
- Evite as portas e ventás metálicas.
- Instale dobre cristal nas fiestras.
- Mellore o illamento exterior das paredes e elimine as pontes térmicas.
- Utilice un deshumidificador, mellor se é eléctrico.
- Asegure unha boa ventilación. Abra todos os días as ventás durante dez minutos. Dará reducido a porcentaxe de humidade relativa do aire do interior.
- Separe os armarios e librerías das paredes frías. Os armarios arrimados a paredes exteriores proporcionan un espazo restrinxido onde se pode producir a condensación.
Mans á obra
- Ante o primeiro síntoma de humidade, busque axiña o método adecuado para solucionalo e, deseguido, impermeabilice en superficie para evitar que se repita. Non deixe que o problema medre.
- Repare as fendas, por mínimas que sexan, así que aparezan. É posible que detrás haxa un cano da auga que co tempo poida ter filtracións que pasarán á fenda e posteriormente a toda a parede.
- Repare canto antes as filtracións producidas pola chuvia ou pola neve. Pola contra, a humidade acabarase convertendo nun continuo goteo.
- Non intente impermeabilizar unha superficie sen secar antes a mancha de humidade.
- Para secar a mancha de humidade debe quentar a habitación de modo constante durante varios días.