Vacacións a un clic

Vacacións a un clic

/imgs/20030701/img.internet.01.jpg
Internet pon ó alcance do turista todo o preciso para organizar unha viaxe. Desde a primeira etapa ata a última, e desde o máis intranscendente ó imprescindible. E en dous niveis: obter información e adquiri-lo servicio. Coa axuda da Rede pódese conseguir información sobre, por exemplo, cómo facer ben as maletas, e obter todo tipo de referencias sobre o lugar de destino: clima, sitios de interese, mapas e rutas, cambio de moeda, festas e costumes locais, gastronomía, vacinas, etc. Pero tamén, un paso máis alá, é posible mercar doadamente o billete de avión ou de tren, reservar unha habitación de hotel ou alugar un coche.

As reticencias sobre a seguridade das transaccións virtuais levan o usuario a frear, en moitas ocasións, no momento en que lle solicitan datos persoais ou o número da tarxeta de crédito. Sen embargo, o sector turístico é un dos máis rendibles na Rede. As particularidades da súa oferta -‘servicios puros’, con alto valor e perecedoiros dunha industria moi informatizada- convertérona nun dos motores do comercio electrónico: supón entre o 30% e o 40% das vendas totais a particulares. O ano pasado as vendas en Europa occidental medraron un 53%, ata os 7.300 millóns de euros, e agárdase que este ano suban outro 32% ata facturar 9.700 millóns de euros, segundo estimacións doCentre for Regional and Tourism Research.

En España as cifras non son tan espectaculares no tocante a compras, pero si hai un bo número de persoas (máis de dous millóns a finais do ano pasado) que se achegan a Internet para ‘planear’ a viaxe, é dicir, para realizar buscas e comparar prezos.

Paso a paso

Para comezar, o usuario indeciso pode acudir a páxinas como Webviajes.com ou a foros -como os da famosa guía Lonely Planet (www.lonelyplanet.es/forum), onde os internautas comparten consellos e experiencias viaxeiras- para recibir suxestións na elección de destino.

Á hora de escoller aloxamento, a Rede tamén serve de grande axuda. Quizais o único problema sexa a cantidade e variedade da oferta. O máis atinado é acudir a un buscador xeral (tipo Google.com ou Alltheweb.com) ou comeza-la travesía desde un portal onde buscar hotel (como en Interhotel.com ou Hotelsearch.com), hostal (Hostels.com), casa rural (Toprural.com) ou apartamento. As páxinas máis completas, amais de contar con listaxes por localización xeográfica e toda a información sobre características e prezos do aloxamento, ofrecen a posibilidade de ver fotografías exteriores e interiores do lugar seleccionado.

Para moverse polo lugar de destino, o turista tamén poderá aluga-lo coche desde a casa, un servicio que ofrecen os máis dos portais de viaxes ou dos sitios web das propias compañías de alugamento (Avis.com ou Hertz.com, por exemplo). E acudir á Rede para obter información sobre os sitios de interese turístico ou sobre as actividades que se poden realizar, ou para consultar mapas e anotar rutas.

Pero sen dúbida a oferta máis atraente de Internet é a posibilidade de merca-lo billete desde o ordenador, rápida e comodamente (os billetes de avión supoñen preto do 80% das vendas online do sector turístico). Aínda que o internauta tamén ten a opción de rastrexa-la Rede á caza das ofertas máis substanciosas para despois acudir á axencia de toda a vida.

Sen grandes diferencias

As grandes ofertas que antes inundaban os sitios de viaxes, embarcados en promocións para se abriren camiño na ateigada Rede, foron deixándolles paso a ofertas máis semellantes ás do mundo real, nas que se fai fincapé nos servicios engadidos (paquetes turísticos) e, en xeral, se coida máis o cliente.

De tódolos xeitos, a competencia segue sendo fera no sector, e non é estraño atoparse con grandes ofertas, sobre todo en voos de última hora (nos sitios das propias compañías ou webs específicas como Lastminute.com) nos que sae máis rendible ‘regalar’ o billete na Rede antes de deixar un asento baleiro. Hai que ter en conta que Internet recorta nun 75% as custas medias de distribución dun billete.

Para adquiri-lo billete as opcións tamén son múltiples. Tralo éxito das axencias online, como Travelocity ou Expedia, as axencias ‘reais’ tamén montaron o seu mostrador virtual. E máis tarde foron as propias compañías aéreas as que, cada unha pola súa conta ou en grupo (Orbitz e Opodo), decidiron que xa non precisaban intermediarios para despacharen os asentos dos seus avións.

Para unha mellor comparativa de prezos sempre é mellor acudir a unha axencia que inclúa voos de tódalas compañías, aínda que logo o cliente decida saltar ó sitio web da compañía en cuestión se é que lle ofrece maior confianza ou se se beneficia dalgún programa de puntos. Moitas axencias presentes na Rede comparten a tecnoloxía dos sistemas centrais de reserva (como Amadeus ou Galileo) co que as diferencias nos resultados de busca de voos son mínimas.

Normalmente, mercar un billete de avión por Internet é tan sinxelo como selecciona-las opcións da viaxe (orixe, destino, número de pasaxeiros, idade, clase, etc.), elixi-lo voo, o xeito de pagamento (tarxeta ou contrarreembolso) e de recollida do billete (pódese recibir na casa ou recollelo na axencia ou no aeroporto). O habitual é que as axencias virtuais, como Rumbo.es, Viaxar.com, eDreams.es ou eBookers.es, acepten reservas cun mínimo de tres días de antelación.