Muskuluak indartu, burua sendotu

Muskuluak indartu, burua sendotu

Lehen Mundu Gerran Joseph Pilates fisioterapeuta alemaniarrak, soldadu lesionatuak birgaitzeko hainbat ariketa mantso eta kontrolatuek osaturiko metodoa asmatu zuen. Bera preso harturik, denboran zehar indarra, erresistentzia eta malgutasuna buru-kontrolarekin konbinatzen zituen gimnasia metodo hura bere buruari aplikatu eta beste 500 ariketa erantsi zizkion. Handik urte batzuetara fisioterapeuta haren gimnasia-taulak, ariketa psikikoen laguntzaz, (batez ere, sorbalda edo bizkarra lesionatua zuten eta, ornoekin batera, morala ere sendatu eta osatu behar zuten) atleten entrenamenduan aplikatuak izan ziren. Joan den mendearen kondarrean Pilates metodoa ospetsu bihurtu zen modelo, aktore eta kantarien artean. Glamourez inguraturik egon arren, lehen mailako aldizkari zientifikoek, prebentziozko ariketan alternatibaren bila ari direnentzat aukera aholkagarri gisa goretsi dute eta Estatu Batuetan eta Erresuma Batuan errehabilitazio-terapien osagarri gisa baliatzen da.

Sakoneko muskulatura lantzea

Puristenak bostehun ariketak -“Mat Kahiera” izenekoa- pisu eta zoru labaingarriez hornituriko aulkian egitea aholkatzen duten arren, hori bezain ortodoxoa da koltxoi soil bat baliatzea. Norbaitentzat diziplina kategoriara iristen den metodo honen kontu nagusia bereziki prestaturiko adituak gidari hartu eta haiek adierazitako bidetik joatea da. Prozedura mediko hutsa ez bada ere, teknika delikatu eta konplexua den aldetik, irakatsi eta ikasi egin behar da.

Kinesiologiako elementuak dituenez (muskuluen banan banako ebaluazioa, bakoitzak bildu duen estres-maila ezagutzeko) zuhurra izan behar da, lesioak ondoriozta ditzaken praktika indiskriminatu edo gaizki gidaturik ez aplikatzeko. Entrenamenduak agintzen duen kontzentrazio sakonari esker nor bere gorputzaz, honen funtzionamenduaz eta ahuleziez kontziente bihurtzen da; horrela areagotuko dira kontrola eta fisikoaren zainketa. Ezinbestekoak dira arnasketa-ariketak, horiei esker esfortzua eta erlaxazioa konbinatzen direlako. Pilates-en arabera, hamar saiotan nabaritzen da aldea, hogei saiotan ikusten da aldea eta hogeita hamar saiotan gorputza aldatu egin da. Nolanahi ere, azpian datzan gorputz-heziketaren helburua azaleko muskuluak ez ezik, sakoneko muskulatura ere lantzea da.

Burua eta gorputza kontrolatzea

Metodoko mugimenduen funtsean sei oinarri dira: kontzentrazioa, kontrola, zentralizazioa, mugimendu-malgutasuna, zehaztasuna eta arnasketa. Horrekin guztiarekin sistema linfatiko eta zirkulazioa aktibatzen laguntzen da, ariketa-multzo baten arabera muskulu eta tendoi guztiak tiratuz gorputza lubrifikatzeko xedez, arnasketa kontrolatzen delarik. Metodo hori praktikatzeak gorputzaren indar, kontrol eta malgutasuna areagotzen ditu, junturak eta sorbalda errespetatuz.

Perfekzioaren bila

Pilates metodoa zorrotza da, perfekzionista. Hasi aurretik, monitoreak kirolariaren egoera fisikoa, desorekak, ahuldadeak, arazoak eta premiak aztertu behar ditu. Faseak pixkanaka gaindituz joateko arnasketa kontrolatzea ezinbesteko tresna da muskulu bakoitza berariazko helburuaren arabera aktibatzeko. Gorputzaren atal bakoitza xehekapen osoz lantzen da, galduriko funtzionaltasuna itzuli eta ahalik eta emaitza hobeak ateratzeko. Mugimenduak mantsoak dira, leunak; yogan ohikoa den kontzentrazioaz jardun behar da eta, horri esker tentsio eta arazoetatik askatzen da kirolaria.

Baita posturak zuzentzeko terapia ere

Entrenamendu honen beste ezaugarrietako bat, postura okerrak zuzentzeko gaitasuna da. Kontua, hein handi batean, gorputzaren lerrokatze egokia da, muskulu abdominalak, lapranak, sorbaldaren azpialdea eta gluteoak (hau da, pertsonaren euskailu nagusiak) indartuz. Metodoa praktikatzen dutenek malgutasun eta mugikortasun handiagoa sentitzeaz gainera, hobeki lo egiten dute, metodo honek gorputzak eta buruak erlaxatzen dituelako.

Nork praktika dezake?

Bizimodu sedentarioko gazteentzat eta gorputzaren zurruntasunari aurre egin nahi dioten pertsona adintsuentzat komenigarria bada ere, kontrako adierazpen medikorik ez duen edonork praktika dezake. Ingalaterran, adibidez, errehabilitazio prozesuetan dabiltzan pazienteek eta istripua nozitu dutenek (horien lesioa bizkarrezur, belaun edo lepauztaian baldin badago, gehienbat) praktikatu ohi dute. Kirol praktikaren ondoriozko lesioak sendatzen eta osteoporosiari aurre egiten ere laguntzen du Pilates metodoak.

Ez da ororen konponbidea

Pilates metodoaren onurak bistan dira eta, gainera, sendagile espezialista eta fisioterapeuten bermea dute baina, dena den, mugimendu-segida horiek ez ditugu gorputza zizelkatzen duen miraritzat jo behar. Zenbaitetan, zelulitisaren kontrako sistema gisa edo gorputzak nahi erara moldatu eta egungo modeloaren pareko bihurtzen dituen metodotzat aldarrikatu izan da, baina hori ez da inondik ere metodoaren helburua. Muskuluak oxigenatzeko eta pertsonak junturez kontziente bihur dadin balio du. Praktika horrek gorputza eta gogoa sendotzen, indartzen ditu baina, osasunari dagokion guztia bezala, pazienteari seriotasun, konpromiso eta profesionaltasuna eskatzen dizkio, onurarik aterako bazaio.