A banca "engánchase" ás redes sociais

As entidades financeiras utilizan as redes sociais como un medio para captar novos públicos, coñecer mellor os seus clientes e lanzar ofertas
1 Xuño de 2011
Img internet

A banca "engánchase" ás redes sociais

Ata hai ben pouco dicíase que alguén estaba anticuado se aínda utilizaba unha desas entrañables máquinas de escribir, os carismáticos “cassetes” ou os nostálxicos discos de vinilo. Esta idea, en termos financeiros, equivalería a gardar os aforros debaixo do colchón ou pagar sempre en efectivo. Hoxe, a popularidade das redes sociais como unha canle prioritaria de comunicación non pasa desapercibida no mundo financeiro, onde xa numerosas entidades bancarias teñen as súas propias contas. Os aforros e os investimentos, polo tanto, tamén teñen o seu sitio nestas novas canles de comunicación. Os cartos tamén teñen moito que dicir nas redes sociais.

Un mercado moi “goloso”

Entender por que á banca lle interesa estar nas redes sociais é sinxelo cando se estudan os números de seguidores das máis famosas plataformas. Facebook conta con máis de 800 millóns de usuarios rexistrados en todo o planeta, Twitter, con 200 millóns, e Youtube, con 100 millóns de socios. Para a banca, isto supón un enorme filón para captar novos clientes e fidelizar os actuais. Os grandes banqueiros, asesores e expertos en xestión de patrimonios viron como estas redes lles poden axudar a gañar a confianza dos seus usuarios, conseguir un trato máis próximo, coñecer as súas demandas e preocupacións e mesmo adiantar as tendencias dos mercados e así deseñar as estratexias de investimento.

No campo da banca polo miúdo, a influencia das redes sociais pode ser crucial para manter un cliente. Nestes momentos de especial volatilidade e incerteza nos mercados financeiros, numerosos aforradores convertéronse en expertos en “poxas”, é dicir, van buscando a mellor oferta en función das condicións do mercado. Frear a alta rotación de clientes, que saen e entran de entidades en busca do mellor depósito, por exemplo, é un dos obxectivos de máis éxito das entidades que dan convencido aos seus usuarios, potencialmente infieis, mediante a palabra, o chateo ou o blogueo.

Oferta de bancos e caixas: un a un

Proximidade e confianza son dous dos valores insignia que intentan transmitir os bancos e caixas que están presentes nas redes sociais. Das súas funcionalidades, velaquí as que se poderían salientar en particular:

  • Comunicación. A través das redes, a banca consegue un fío de comunicación directo cos seus clientes. O chateo cos seus clientes permítelles coñecer, de primeira man, as súas necesidades, opinións sobre os produtos, a atención ou a calidade de servizo.
  • Produtos exclusivos. Mediante as mensaxes privadas, muro no caso do Facebook, o asesor responsable da entidade pode ofrecer produtos con condicións privilexiadas, como depósitos ou hipotecas. En ocasións, permiten subscribir os seus produtos a través das redes, seguindo unhas sinxelas instrucións dadas polo community manager da entidade financeira.
  • Servizos punteiros. Ofertan instrumentos ou servizos exclusivos, como as cotizacións en tempo real da Bolsa. BBVA é un dos bancos máis activo neste sentido.
  • Barómetro de satisfacción. Compartir opinións con outros clientes sobre os produtos do banco permite cotexar o nivel de satisfacción dos usuarios e coñecer tendencias e pautas de comportamento.
  • Campañas comerciais. As redes son unha canle ideal para lanzar campañas de mercadotecnia e comerciais axustadas ás características dos clientes potenciais en cada mercado.

Oferta actual

As grandes entidades españolas xa están nas redes sociais máis populares ou contan con proxectos propios de relación cos seus clientes a través de “blogs” e chats en Internet.

Caja Navarra, pioneira e fan das redes sociais no mundo da banca, conta coa comunidade de «blogs» de Banca Cívica, unha especie de “diario on-line”, no que a entidade plasma o que hai acotío. Ademais, puxeron en marcha Cancha 24, un programa no que os clientes poden recibir asesoramento financeiro, a través do Twitter, de conversas de Messenger e Skype, ou do Facebook.

En BBVA teñen o portal actiBva.com, aínda que tamén están presentes en Facebook, Youtube e Twitter. Unha das súas últimas iniciativas foi o desenvolvemento do «blog» Aforro e Investimento, no que os seus clientes poden compartir as súas opinións sobre os produtos contratados no banco. A través de Twitter, pola súa banda, BBVA ofréceselles servizos exclusivos aos seus usuarios, como as cotizacións en tempo real da Bolsa española, unha prestación moi aplaudida polos clientes.

La Caixa, por exemplo, dispón dun «blog» que lle permite ao usuario recibir novas da entidade e opinar sobre os produtos ou servizos que se van lanzando. Dende a canle de Youtube desta caixa de aforros, pódense ver máis de 320 vídeos sobre a caixa de aforros.

Caja Madrid tamén se apuntou á moda das redes sociais. En Twitter conta con tres canles distintas, sobre a súa Obra Social, as actividades de La Casa Encendida e sobre a Fundación Caja Madrid.

Banco Sabadell ten un servizo de atención ao cliente en Twitter. A través desta web promove a participación dos clientes e anímaos a plasmar as súas solicitudes e queixas.

Bankinter creou a canle Bankinter Labs que lles dá a posibilidade aos clientes de que comenten proxectos propios que poderían ser desenvolvidos polo banco. Tamén dispón de conta en Twitter (@BankinterLabs).

Bankia, o grupo bancario que se acaba de crear, formado por Caja Madrid, Bancaja, Caixa Laietana, Caja Segovia, Caja de Ávila, Caja de Canarias e A Rioxa, tamén está presente en Facebook dende o día mesmo da súa creación, o pasado 2 de marzo do 2011.