Valentin Martinez-Otero, Psikologian eta Pedagogian doktorea eta Madrilgo Complutense Unibertsitateko irakaslea Hezkuntza Fakultatean

"Ikastetxeek inplikatu egin behar dute udan kontziliazioa lortzeko"

1 junio de 2016
Img entrevista 2 listado 313

Espainian zaila da lana eta familia bateratzea, eta horren adierazgarri da ia alderdi politiko guztiek txertatu izana kontziliazioaren inguruko neurriak ekainaren 26ko hauteskundeetarako programetan. Udan lana eta familia bateratzea are zailagoa al da?

Bai. Haurrek ez dute eskolara joan beharrik eta gurasoen ardura da une orotan haiei arreta eskaintzea. Udak gatazkak eragiten ditu familia askorentzat, kezka eta zailtasun gehiago.

Udan haurrentzat egiten diren proposamenik gehienak, kirol edo hizkuntza udalekuak adibidez edo eskolako lanetan laguntzeko klaseak pribatuak eta garestiak izaten dira. Hori al da bide bakarra udan lana eta familia bateratzeko?

Ez. Administrazioek gizarte hezitzaileak eta animatzaileak eduki behar lituzkete, udan zerbitzu publiko bat eskain dezaten. Zerbitzu hori hezigarria izan daiteke, baina baita ludikoa ere. Administrazioek elkarrekin harremanetan egoteko eremu bat jarri behar dute haurren esku, non segurtasunez eskainiko dieten arreta.

Ez al dago arriskurik haurrek ikasturte osoan izaten duten egutegi estresatzaile bera errepikatzeko udan ere?

Haurrek ez dute aspertu behar udan eta gomendioa da jarduerak eginez probetxu atera diezaiotela denborari, adibidez hizkuntzak ikasiz, kirola eginez edo udalekuetara joanez. Horrek ez du baztertzen ez atsedena eta ez jostaketa ere. Haurraren adina kontuan hartzea da formula, haren interesak eta iritziak.

Baina sormena neurtzen duten probek diote uste baino garrantzitsuagoa izan daitekeela aspertzea.

Arazoa da gaur egun dena hain dagoela prestatua, hain egituratua eta lotua, ezen askotan haurrei ez diegu uzten mugitzeko tarterik. Neurriko asperdurak ez du deus txarrik, baina ez da komeni haurra bere kasara uztea, zereginik gabe eta zertan ibili ez dakiela. Poetak esango lukeen bezala, dena da neurri kontua. Udan, leku handia utzi behar zaio jolasari eta ongi pasatzeari, haurrak modua izan dezan bere sormena askatzeko. Egokiena da udari probetxua ateratzeko eskaintza bat proposatzea eta, zergatik ez, eskolako ikasgai batzuk sendotzeko ere erabiltzea.

Zure ustez, haurrek eskolako lanak egin behar al dituzte udan? Gero eta irakasle gehiagok egiten du kontrako apustua.

Ez zait gaizki iruditzen. Udan egitekoak diren eskolako lanek zentzu pedagogiko bati erantzun behar diote, ez baitute zentzurik zigor gisa jarriz gero. Helburu hezigarria duten etxeko lanak onak izan daitezke. Uda oso luzea da eskolan, baina ikaskuntzak sendotzeko erabil dezakegu, haurrari jolaserako eta atseden hartzeko denbora kendu gabe.

Espainiako haurren uda luzeegia dela iruditzen al zaizu, Guraso Elkarteen Espainiako Konfederazioak dioen bezala?

Ez. Udako oporrek, ongi aprobetxatuta, aukera ematen dute haurren bizitzan oso baliagarriak diren atalei arreta eskaintzeko. Udak erraztu egiten du haurren atsedena, sendotu egiten ditu pertsona arteko harremanak familiarekin eta lagunekin, eta haurren bilakaera intelektuala, fisikoa eta emozionala laguntzen duten jarduerak egiteko garaia da.

CISen barometroaren arabera, Espainiako herritarren %45i zaila gertatzen zaie etxeko zereginak egitea, eta hirutik batek egunean hiru ordu baino gutxiago ditu libre. Egoera horretan, zein da zure osagai sekretua udan lana eta familia bateratuko dituen errezeta on bat lortzeko?

Ikastetxeek esku hartu behar dute udan egingarria izan dadin lana eta familia bateratzeko zeregina, errefortzuko profesionalekin eta aisialdiko eta formazioko aukerekin. Horixe da osagaia oporrek familientzat zama astuna izateari utz diezaioten.

Zehazki, zer-nolako proposamenak egiten dituzu udan lana eta familia bateratzeko?

Naturarekin harremanetan egoteko aukera eskaintzen duten udalekuak oso interesgarriak dira haurrentzat, eta, gainera, lagunak egiteko eta gizarte harremanak sendotzeko aukera ematen diete. Haurrekin bidaiak egitea ere oso gomendagarria da. Baina, berriz ere, ez dezakegu ahaztu familia askok arazo ekonomikoak dituela. Horregatik, ikastetxeek inplikatu egin behar dute: bidaiak eta udalekuak taldean egitea merkeagoa da.

Udan lana eta familia bateratzea zer da, aukera bat edo ezinezko kontua?

Udan bateratu daitezke lana eta familia, eta lortu daiteke. Familia askorentzat udan lana eta familia bateratzea ezinezkoa ez, baina zaila izaten da. Horregatik, administrazioek eta eskola erakundeek inplikatu egin behar dute lana eta familia bateratzeko zailtasunak dituztenei laguntzeko.