Peixe, pero moi rebozado

Peixe, pero moi rebozado

O peixe rebozado é todo un clásico entre os ultraconxelados. Os máis veteranos son os filetes ou os pauciños de pescada, pero hoxe podemos atopar moitas máis opcións, con distintos formatos e diferentes peixes. Para elixir ben, o primeiro que deberiamos considerar é o tipo de peixe:

• Peixe branco. Caracterízase polo seu baixo contido de graxa (non supera o 3 %). Tamén ten un sabor suave, polo que adoita ser mellor aceptado por persoas ás que non lles gusta moito o peixe. Neste tipo de produtos adóitase utilizar a pescada, aínda que tamén hai outras opcións, como o bacallau (Filetes de Bacalao Findus) ou o abadexo de Alaska (Fish and Chips Findus).
• Peixe azul. O contido graxo é maior (ao redor do 8 %) e o sabor máis intenso. Podemos atopar produtos elaborados a base de diferentes especies, como salmón (Peskitos Pescanova) ou bocartes (Delfín).

Polo xeral, o tipo de peixe móstrase claramente na parte frontal do envase. Ocorre así en todos os produtos, agás en Fish & Chips Findus, no que se indica “Filetes de peixe rebozado”. Na lista de ingredientes especifícase que está elaborado con abadexo de Alaska, unha especie menos valorada comercialmente que a pescada ou o bacallau.

Canto peixe conteñen?

Na maioría dos produtos a cantidade de peixe rolda o 50 %-55 %. Destacan as Varitas de merluza Findus, que teñen o contido máis alto (60 %) e, no outro extremo, os Palitos de merluza Pescanova (35 %) e Peskitos de salmón Pescanova (38 %). Estes dous produtos parecen ser os únicos destinados especificamente ao público infantil, a xulgar polo seu deseño: no envase de ambos os dous inclúense debuxos infantís e en Peskitos as pezas teñen forma de peixe. Estes últimos, ademais, conteñen cabaza asada como terceiro ingrediente. Tendo en conta a súa cor e a súa textura, poderíase pensar que esta se utiliza para que pareza que o produto contén máis peixe do que realmente leva.

Que máis levan?

Ademais do peixe, estes produtos están constituídos polo rebozado. Xeralmente esta cobertura está composta por unha mestura de fariña, auga e aceite, normalmente de xirasol ou de colza. O rebozado non contén ovo, o que pode parecer estraño, xa que é un ingrediente fundamental cando rebozamos na casa. Con todo, non se utiliza por varias razóns: é máis caro, non queda ben cando se conxela, é delicado desde o punto de vista microbiolóxico e tamén é un alérxeno de declaración obrigatoria.

Tamén conteñen outros ingredientes que cumpren funcións tecnolóxicas, como o sal e as especias, que melloran ou potencian o sabor; a cúrcuma, a riboflavina, o extracto de remolacha ou os azucres, que lles dan cor; ou o amidón, a goma de guar, o carbonato de sodio ou os lévedos, que melloran a súa textura.

Canto hai de rebozado?

A cantidade de rebozado só se mostra en dous produtos: Boquerones Delfín (cun 50 % de tempura) e Merluza empanada Cocinarte (cun 45 % de empanado). No resto non se especifica, a pesar de que debería facerse, de nos atermos á lexislación (Reg. 1169/2011), que obriga a mostrar a cantidade dun ingrediente ou unha categoría de ingredientes cando figure na denominación do alimento ou cando se destaque na etiquetaxe.

Nalgúns destácase expresamente o rebozado, como na Merluza empanada Pescanova, os Filetes de bacalao Findus, as Varitas de merluza Findus ou os Palitos de merluza Pescanova, mentres que no resto, forma parte da denominación do produto.

As proteínas e a cantidade do peixe

O peixe é un alimento principalmente proteico, polo que a cantidade de proteínas é significativa. Na maioría dos casos rolda o 10 %, aínda que hai excepcións, como os Palitos de merluza Pescanova, con tan só un 6,8 %, ou as Varitas Pescanova e os Filetes de bacalao Findus, que son os que máis achegan, cun 13 % e un 12 %, respectivamente.

O contido de proteínas non sempre garda relación coa cantidade de peixe. Por exemplo, Peskitos Pescanova leva tan só un 38 % de peixe, pero unha cantidade bastante elevada de proteínas (9,4 %), similar á doutros produtos cun 55 % de peixe. Isto explícase porque en Peskitos se utiliza proteína de chícharo.

Máis graxas do esperado

Nestes produtos podemos atopar dúas fontes de graxas. Unha é a que achega o propio peixe. Por iso, os produtos elaborados con peixe azul conteñen máis cantidade de graxas: Delfín, con bocartes (16 % de graxas) e Peskitos, con salmón (13,3 %).

Outra fonte de graxas é o aceite. Isto explica que a cantidade deste nutriente sexa tan importante no resto dos produtos, a pesar de estaren elaborados con peixe branco, que non contén máis dun 3 % de graxas. Para facérmonos unha idea, o contido medio de graxas é do 8 %, con valores que van desde o 13 % de Fish&Chips de Findus ata o 6,6 % das Varitas Eroski ou o 4,1 % dos Palitos de merluza Pescanova. A partir de todos estes valores poderiamos deducir que a cantidade de aceite engadida estaría entre o 5 % e o 10 %.

Pero non todas as graxas son iguais. Por exemplo, en Delfín, proceden dos bocartes, así que se trata de graxa de peixe azul, que resulta interesante polo seu contido en ácidos graxos insaturados, sobre todo, omega 3. Pero nos produtos elaborados a partir de peixe branco, a maior parte desas graxas proceden do aceite de colza ou de xirasol. O primeiro contén un bo perfil de ácidos graxos, aínda que peor que o aceite de peixe. O aceite de xirasol ten pouco interese nutricional.

Os hidratos e o sal

En produtos a cantidade de hidratos de carbono tamén é significativa, con cifras que roldan o 20 %. Isto explícase, sobre todo, pola fariña do rebozado. Por iso, se o produto contén unha cantidade elevada de hidratos, pode ser sinal de que ten moito rebozado e pouco peixe, como sucede nos Palitos de merluza Pescanova, cos valores máis altos de hidratos de carbono (30,4 %) e o menor contido de peixe (35 %).

Doutra banda, nalgúns produtos a cantidade de sal é excesiva, é dicir, supera o 1 %. Concretamente nos Palitos de merluza Pescanova (1,1 %) e en Delfín (1,3 %). No resto, a media sitúase no 0,8 %.

Calorías e Nutri-Score

A achega calórica está directamente relacionada co contido de graxas: os máis calóricos son os máis graxos (Peskitos, 257 kcal; Delfín, 248 kcal, e Fish & Chips, 238 kcal) e viceversa (Eroski, 180 kcal; Palitos Pescanova, 190 kcal, e Varitas Pescanova, 195 kcal). Para facérmonos unha idea, 100 g de salmón á prancha achegan unhas 180 kcal e 100 g de pescada á prancha, unhas 90 kcal.

En canto a Nutri-Score, a maioría dos produtos obtén un B, pero hai excepcións. Tres deles puntúan cun C (Peskitos, Merluza empanada Pescanova e Palitos Pescanova), un obtén un A (Varitas Pescanova) e outro un D (Delfín). As diferenzas están determinadas principalmente pola cantidade de sal e pola cantidade de proteínas.

Relación calidade-prezo

Existen importantes diferenzas, que van desde os 0,94 euros de Cocinarte ou os 0,95 euros de Eroski ata os 1,87 euros de Fish & Chips Findus. É dicir, o máis caro custa o dobre que os máis económicos, aínda que contén cantidades similares de peixe (55 %-56 %). Isto lévanos a pensar que as diferenzas de prezo non parecen estar xustificadas pola composición, dado que non están relacionadas co tipo de peixe nin coa súa cantidade.