Caldos de peixe. Diferenzas en peixe, sal e prezo
Os caldos de peixe precociñados levan xa décadas no mercado, pero nos últimos anos sufriron unha notable transformación. Polo xeral, teñen unha mellor composición que no pasado, con máis peixe, menos sal e sen potenciadores de sabor. Ademais, dispoñemos dunha maior variedade, polo que non sempre é fácil elixir.
Algúns caldos elabóranse exclusivamente con peixe, mentres que noutros utilízase só marisco ou unha mestura de ambos. Este aspecto determina o sabor e o aroma, e pode influír sobre o prezo. Dos caldos analizados, só hai dous elaborados exclusivamente con peixe (Aneto e Ferrer) e un que ten só marisco (Gallo). No resto utilízanse ambos os ingredientes.
Para realizar esta guía seleccionáronse 9 caldos de peixe, elaborados por marcas líderes no mercado, nos que se analizou:
- Puntuación Nutri-Score. A valoración co algoritmo actualizado en 2024 vén determinada polo sal e a baixa proporción de proteínas, fibra e verduras.
- Ingredientes. Para coñecer a calidade comercial do produto, especialmente no que respecta á cantidade de peixe.
- Información comercial.Analizamos se proporciona información valiosa, se pode ser confusa ou enganar o consumidor.
- Prezos Recollidos en febreiro de 2026. Non foi un criterio para avaliar a calidade, ben que no ránking se tivese en conta a a relación calidade-prezo.
- Etiquetaxe. Analizouse se cumpre a lexislación vixente.
Ingredientes máis habituais
Na elaboración destes produtos utilízanse especies de peixe branco. As máis comúns son o peixe sapo (Aneto, Aneto fumet, Ferrer, Ferrer fumet, Gallina Blanca e Gallina Blanca gourmet); o bacallau (Aneto, Gallina Blanca e Eroski fumet); a cabra de altura (Gallina Blanca gourmet e Itsasoko), e a pescada (Aneto e Aneto fumet). Este último produto elabórase ademais con outras especies, como congro, rapante e escarapote.
En canto ao marisco, o que atopamos con máis frecuencia nestes produtos é a gamba, seguida do lumbrigante, a cigala e o camarón. A gamba atópase en Gallo, Aneto fumet (gamba vermella) e Gallina Blanca; o lumbrigante, en Gallina Blanca gourmet, Itsasoko e Eroski fumet; a cigala, en Eroski fumet e Itsasoko, e o camarón, en Eroski fumet e Ferrer fumet. Aneto fumet contén ademais caranguexo e mantis
Un dos elementos máis importantes é a cantidade de peixe ou marisco coa que se elaboran. Destacan Aneto (30 %), Ferrer (20 %) e Gallo (20 %). Na parte media atópanse Ferrer fumet (14 %), Itsasoko (10 %) e Eroski fumet (7,2 %). Os produtos que menos peixe e marisco empregan son Gallina Blanca gourmet (5,2 %) e Gallina Blanca (5,1 %).
Ademais da auga e do peixe ou marisco, que son imprescindibles, nos caldos tamén se utilizan vexetais. Os máis habituais son a cebola, que se emprega na elaboración de todos os produtos analizados, a cenoria, o tomate, o allo e o porro. Nalgúns tamén se utilizan outros vexetais, como pataca, que axuda a espesar (Ferrer, Ferrer fumet e Gallina Blanca), apio (Aneto, Aneto fumet e Gallo) ou fiúncho (Aneto e Aneto fumet).
A cantidade de vexetais utilizada para elaborar o caldo só se indica en tres produtos: Aneto, no que se mostra de forma sucinta (por exemplo, unha cenoria ou medio tomate), e nos de Gallina Blanca, nos que se especifica de forma máis concreta (0,4 % de apio, 0,2 % de tomate ou 0,1 % de cenoria). Nestes últimos produtos faise deste modo porque é obrigatorio cando se destaca algún ingrediente no envase, como é o caso.
Aínda que a simple vista poidan parecer moi similares, caldo e fumet non son iguais nin cumpren exactamente a mesma función na cociña:
- Ingredientes. Os caldos elabóranse con recortes de peixe, espiñas e mesmo anacos enteiros, mentres que no fumet utilízanse sobre todo espiñas e cabezas de peixe.
- Tempo de cociñado. O caldo adoita ter unha cocción máis longa que o fumet. Entre 30-45 minutos, fronte aos 20-30 minutos do segundo.
- Sabor. O caldo ten un sabor e un aroma máis suaves que o fumet, que está máis concentrado.
- Uso. O caldo utilízase sobre todo para cociñar sopas ou guisos, mentres que o fumet emprégase como base para arroces, mollos e cremas.
Nos produtos comerciais estas diferenzas tamén se notan, aínda que ás veces de forma máis sutil.
Potenciadores, aromas ou extractos
Hai anos, na elaboración destes produtos era habitual utilizar glutamato monosódico para potenciar o sabor. É unha substancia segura, pero con mala reputación. Ademais, achega un aroma moi característico que predomina sobre os demais, enmascarando os aromas de peixes e mariscos. Por iso, actualmente apenas se utiliza, aínda que está autorizado na Unión Europea ao considerarse un aditivo seguro nas doses habituais. De feito, non está presente en ningún dos analizados. Aínda que ás veces se utilizan alternativas para lograr o mesmo resultado, como ocorre en Eroski fumet, que contén extracto de fermentos.
Con todo, habitualmente empréganse outros ingredientes que tampouco adoitan gozar de moi boa imaxe, como aromas, extractos ou ingredientes concentrados. Non teñen nada de estraño nin supoñen un risco para a saúde, así que non deben preocuparnos, pero si poden darnos unha pista da calidade comercial do produto. As materias primas orixinais, neste caso, o peixe ou o marisco, achegan unha maior riqueza de aromas e sabores. En principio, desde o punto de vista gastronómico é preferible o peixe, despois os extractos e, por último, os aromas. Os únicos produtos que non conteñen aromas, extractos nin concentrados son Aneto, Aneto fumet e Itsasoko. Nalgúns produtos, como Ferrer, tamén se empregan ingredientes con funcións tecnolóxicas, como o xarope de glicosa ou a maltodextrina, que equilibran o sabor e melloran a textura.
O tipo de aceite
Na elaboración utilízanse diferentes aceites. O de oliva virxe extra, en Aneto, Eroski fumet e Gallina Blanca gourmet. Tamén en Itsasoko, xunto con aceite de oliva, e Gallo, xunto con aceite de xirasol. O de oliva atopámolo en Aneto fumet e Gallina Blanca, e o de xirasol, en Ferrer fumet.
Agora ben, as cantidades de aceite adoitan ser escasas. Para facernos unha idea, Gallina Blanca, o único caldo que indica a cantidade, utiliza un 0,1 % de aceite de oliva, é dicir, para elaborar un litro utilízase un mililitro de aceite, unha cantidade que é equivalente á quinta parte dunha culleriña. Así que, en principio, o seu impacto sobre a nosa dieta non sería significativo.
Achega de nutrientes moi escasa
Aínda que na receita de partida se utilice un número considerable de ingredientes e estes poidan atoparse en proporcións significativas, a maioría deles son sólidos que se retiran ao final do proceso. Por iso, teñen pouco impacto sobre a composición nutricional. Para facernos unha idea, 100 ml de caldo achegan unhas 11 kcal, unha cantidade equivalente á que achegan dúas culleriñas de iogur natural sen azucre.
Tamén podemos aprecialo na cantidade de nutrientes: os valores de graxas, hidratos de carbono, fibra e proteínas son moi baixos e na maioría nin sequera chegan ao 1 %. Así, nunha ración (250 ml) cada un destes nutrientes apenas chega a 2 g. Só destacan Ferrer fumet, con 3,5 g de graxas, e Gallo, con 4 g de proteínas por ración, aínda que seguen a ser valores moi baixos.
Pode resultar sorprendente que o contido de nutrientes de caldos e fumets sexa tan escaso, pero non esquezamos que non se utilizan pola súa achega nutricional, senón para achegar sabor e aroma. Isto ocorre tamén nos caldos caseiros.
- Peixe e marisco. Canto maior sexa a súa cantidade, mellor. Pero non polo seu valor nutricional, que é baixo, senón por sabor e calidade comercial.
- Aceite. É mellor o de oliva virxe ou virxe extra, pero podería encarecer o produto. Aínda así, as cantidades son tan pequenas que o seu impacto é mínimo.
- Sal. A achega por 100 ml non é excesiva, pero nunha ración (250 ml) pode ser notable. Convén elixir as opcións con menos sal.
- Extractos, aromas e concentrados. Son seguros, pero se aparecen en exceso poden ser indicio de menor calidade comercial. É preferible que o sabor proveña do peixe e marisco.
- Prezo. Para valoralo, convén comparalo coa cantidade e o tipo de peixe ou marisco e co uso de extractos ou aromas.
Sal e Nutri-Score
Considérase que un alimento ten moito sal cando supera o 1,25 %. Os produtos analizados atópanse por debaixo desa cifra, aínda que hai dous que se achegan: Gallo (1,2 %) e Itsasoko (1,06 %). O contido de sal nunha ración (250 ml) destes dous caldos pode ser considerable, xa que está ao redor dos 3 g e así sería fácil acadar os 5 g de sal que se recomenda non superar nunha inxestión diaria. No resto dos produtos a proporción media de sal é do 0,76 %, o que supón case 2 g por ración. Destaca Eroski fumet, que é o produto con menos sal, cun 0,65 %, é dicir, 1,6 g por ración.
Todos os produtos analizados obteñen un C no sistema Nutri-Score. Isto explícase sobre todo polo contido de sal, que penaliza, e pola súa escasa achega de nutrientes, que non suman puntos positivos.
Relación calidade-prezo
Se observamos o prezo por litro atoparemos importantes diferenzas que van desde os 2,15 euros de Gallina Blanca ata os 7,87 euros de Aneto fumet. É dicir, o máis caro custa case catro veces máis que o máis barato. Na maioría dos casos as diferenzas parecen deberse á cantidade de peixe e marisco: os máis baratos elabóranse cunha cantidade de peixe menor que o resto (ao redor do 5-7 % fronte ao 20-30 %). Noutros casos, como en Itsasoko ou Ferrer fumet, as diferenzas poderían deberse a outros motivos, como o tipo de marisco ou o envase de vidro.
O que máis diferencia a uns caldos e fumets doutros é a cantidade de peixe ou marisco que levan. Esa cifra cambia moito segundo a marca e explica boa parte das diferenzas de sabor e de prezo. A súa achega nutricional é moi pequena, algo normal, porque moitos deses ingredientes retíranse tras a cocción e o caldo úsase sobre todo para darlle sabor.
En canto ao sal, en xeral os valores non son moi altos por 100 ml, pero unha ración completa si pode achegar unha cantidade considerable. Por iso, ao final, todos obteñen un C en Nutri-Score. Tamén atopamos diferenzas no uso de aromas ou extractos: son seguros, pero mostran diferenzas na calidade comercial do produto.
E, por último, os prezos varían moito entre marcas. Isto adoita ter que ver coa cantidade e o tipo de peixe ou marisco que se utiliza. Nun mercado tan variado, a mellor ferramenta para orientarse segue sendo ler ben a etiqueta e entender que estamos a comprar.
Se temos en conta estes criterios, a mellor opción sería Aneto, seguida de Aneto fumet e Gallo. Se ademais temos en conta o prezo, as mellores eleccións serían Caldo casero de pescado Gallina Blanca, Caldo de pescado Aneto e Eroski fumet.