Auga de sabores. Non é auga, é un refresco

Auga de sabores. Non é auga, é un refresco

Ata hai pouco eran unha rareza, pero este tipo de bebidas está cada vez máis presente no mercado. A primeira vista parecen ser similares á auga mineral, pero se nos fixamos, non son tan sinxelas como aparentan. Por exemplo, nalgunhas bebidas hai elementos que poden levarnos a pensar que están compostas só por auga mineral, aromas e zumes: destacan no seu envase as palabras “agua mineral natural”, pertencen a marcas que asociamos coa auga e teñen un aspecto parecido. Pero, aínda que leven este ingrediente, realmente non o son. E só dous dos produtos analizados o aclaran na parte frontal do seu envase: Maison Perrier (“bebida aromatizada a base de auga con gas carbónico engadido e sabor a limón”) e a de Eroski, que pon, en gran tamaño “bebida refrescante”.

Que tipo de bebidas son

Se estas bebidas estivesen compostas só por auga e aromas, poderían comercializarse como “auga aromatizada”. Pero non é o caso, porque xeralmente conteñen outros ingredientes, como zumes, edulcorantes ou azucres. Por iso, entran dentro da categoría de bebidas refrescantes. Así o sinalan na denominación de venda todos os produtos, salvo Maison Perrier e Vichy Catalán, que indican “bebida aromatizada”, cando deberían poñer “bebida refrescante aromatizada”.

En definitiva, estamos ante unha bebida refrescante elaborada, en principio, con auga mineral. Neste sentido é importante facer outra aclaración porque, aínda que adoitamos chamarlles “auga mineral” a todas as augas envasadas, en realidade existen diferentes tipos:

• Auga mineral natural. Trátase de auga microbioloxicamente sa, que ten orixe nun estrato ou xacemento subterráneo. Distínguese doutras polo seu contido en minerais, oligoelementos e outros compoñentes, por ter unha composición química constante e pola súa pureza orixinal, que fai que se poida beber sen ser sometida a un tratamento de potabilización.
• Auga de manancial. Tamén ten unha orixe subterránea e unhas características naturais de pureza que permiten o seu consumo, pero a súa composición pode non ser constante nin particular.
• Auga preparada. Trátase de auga que pode ter calquera tipo de procedencia e que se somete aos tratamentos fisicoquímicos para que sexa potable. Segundo a súa orixe pode tratarse de auga potable preparada de orixe subterránea ou superficial, ou ben, auga de abastecemento público preparada.

Todas as bebidas están elaboradas con auga mineral natural, salvo Maison Perrier,, que emprega auga común, como a que se utiliza habitualmente noutros tipos de bebidas refrescantes. Todos os produtos que conteñen auga mineral natural o indican na denominación de venda. Algúns tamén o destacan na parte dianteira. (FontVella ananás, FontVella laranxa y San Benedetto). Tamén Maison Perrier indica a presenza de auga carbonatada na súa parte dianteira. Por iso deberían indicar a súa cantidade, pero isto só se fai en Maison Perrier (99,9 %), San Benedetto (78 %) e Eroski (99,61 %).

Con gas ou sen gas?

Tres das bebidas teñen gas (Maison Perrier, Pedras e Vichy Catalán), , porque na súa elaboración se utiliza auga carbonatada, é dicir, auga con dióxido de carbono. O gas inflúe sobre o sabor, xa que achega un toque ácido, e, sobre todo, fai que a bebida nos pareza máis fresca. Pero por outra parte, pode causar inchazo e molestias dixestivas, sobre todo en persoas que sofren hernia de hiato. Ademais, encarece o produto.

Cando se trata de auga mineral natural, a lexislación obriga a indicar se o gas está presente de forma natural ou se foi engadido. Isto móstrase en Pedras (“auga mineral carbónica natural”), que ademais o destaca no seu envase, e en Maison Perrier, que indica “auga con gas carbónico engadido”. En Vichy Catalán, no entanto, non se sinala, o que incumpre a lexislación.

Zume, azucres e edulcorantes

Outro dos ingredientes que podemos atopar é o zume. En total, cinco dos produtos o levan: FontVella laranxa, FontVella ananás, San Benedetto, Vichy Catalán e Pedras. O zume atópase en cantidades entre o 2,3 % de Pedras e o 20 % de San Bnedetto. En todos os casos trátase de zume a base de concentrado, é dicir, a partir de zume de froitas deshidratado e reconstituído.

Ademais de zume, o sabor doce explícase polo uso de azucres, edulcorantes ou unha combinación deles. Maison Perrier é o único que non engade ningún. FontVella Sensación e Eroski tamén destacan a ausencia de azucres, pero levan edulcorantes. San Benedetto e Vichy Cataláninclúen a declaración “sen azucres engadidos” porque utilizan edulcorantes. Tamén conteñen zumes de froitas, así que teñen azucres naturalmente presentes, tal e como indican na etiquetaxe. No entanto, esta mensaxe pode confundir, dado que o produto contén azucres libres procedentes do zume.

Pedras é a única adozada só cun azucre (frutosa), mentres que FontVella laranxa e FontVella ananás usan combinacións de azucre con edulcorantes.

Composición nutricional

Estas bebidas non achegan graxas, proteínas nin fibra e o contido en sal é practicamente nulo. O único salientable é o azucre que procede dos zumes de froitas, como en San Benedetto (3 %) y Vichy Catalán (0,6 %) ou dunha combinación destes con azucres engadidos, como en Pedras (5,6 %), FontVella naranja (3 %) e FontVella piña (3 %). Así, nun vaso de 250 ml podemos atopar ata 14 g de azucres (Pedras), que é unha cantidade considerable e equivale a máis de tres culleriñas. Iso explica por que Pedras tamén é o produto con máis calorías (68 kcal). Nas bebidas sen zume nin azucres engadidos, a cantidade de calorías é practicamente cero: Maison Perrier, FontVella Sensación e Eroski.

Aínda que son bebidas refrescantes, presentan algunhas diferenzas con respecto aos refrescos convencionais. A maioría contén auga mineral natural en lugar de auga convencional e as que conteñen azucres teñen valores máis baixos (Pedras contén 14 g, mentres que un refresco de cola, 27 g). As que conteñen edulcorantes son equiparables a un refresco convencional con edulcorantes e as que non levan nin azucres nin edulcorantes, son unha mellor opción. En calquera caso, ambos os tipos de bebidas deberían destinarse a un consumo ocasional e non substitúen a auga.

Nutri-Score: catro notas

Este sistema aplica uns criterios específicos para as bebidas, de maneira que penaliza o contido de azucres e edulcorantes. Por iso Pedras obtén un E, xa que é a bebida con máis azucres. Séguena, cun D, o resto das bebidas con azucres –FontVella laranxa, FontVella ananás e San Benedetto–, , e logo, cun C, as bebidas con edulcorantes ou poucos azucres: Vichy Catalán, FontVella Sensación e Eroski. La bebida con mellor nota é Maison Perrier, que obtén un B por non conter azucres nin edulcorantes. Nalgúns envases aparecen notas diferentes ás desta guía, porque algunhas marcas aínda non aplicaron o algoritmo Nutri-Score actualizado en 2024.

Relación calidade-prezo

Hai importantes diferenzas no prezo. Se temos en conta o que custa o litro, as cifras van dende 0,82 euros de Eroski ata 3,35 euros de Pedras. É dicir, o produto máis caro custa catro veces máis que o máis económico. Os produtos máis caros son Maison Perrier (2,16 euros), San Benedetto (2,40 euros), Vichy Catalán (2,78 euros) e Pedras (3,35 euros). Estes teñen algunhas características que poden encarecer o seu prezo: unha cantidade significativa de zume(San Benedetto), auga carbonatada (Maison Perrier, Vichy Catalán e Pedras) ou envase de vidro (Pedras). Pero a diferenza cos máis económicos parece demasiado grande para que se poidan xustificar.