: Non lle detectaron a avaría e cobráronlle a revisión durante a garantía

Adquirín un xerador de gasolina que se avariou ó pouco tempo de mercalo. Aínda en garantía, leveino ó servizo oficial da marca e dous días despois dinme que o probaron e que non lle pasa nada, pero que lles teño que pagar o tempo que empregaron en revisalo: 24 euros. Díxenlles que me fixesen factura e só me deron un recibo con número pero sen cabeceira da empresa e sen IVE. A miña impresión é que me tomaron o pelo porque o xerador segue facendo o mesmo ruído anómalo de antes. É correcto que me cobren dicindo que non lle pasa nada?

/imgs/20050201/consultorio.01.jpg Segundo a Lei que regula a garantía de bens mobles, o vendedor debe responder ante o consumidor de calquera falta de conformidade que exista no intre da entrega do ben, e o consumidor debe informar ó vendedor da falta de conformidade no prazo de dous meses desde que tivo coñecemento dela, como aconteceu neste caso. Do relato do sucedido despréndese que a avaría non foi reparada nin diagnosticada correctamente, polo que o vendedor e o Servizo Técnico incumpriron as súas obrigas legais de reparar. Ademais, durante o período de garantía cobrouse a intervención no produto, amparándose nunha distinción entre revisión e reparación. A Audiencia Territorial de Palma de Mallorca, en sentencia do 18 de xaneiro de 1988, dixo que aceptar distintas ordes de reparación durante a garantía (gratuítas), aínda que o produto non teña avaría que reparar, responde a un comportamento correcto do vendedor, ó repasar e probar o produto antes as queixas do comprador.

No caso que nos ocupa, o comportamento foi incorrecto por parte do Servizo Técnico. A revisión no período de garantía é necesaria, pois deste xeito permíteselle ó consumidor comprobar as condicións en que se atopa un produto que presenta ruídos anómalos. Suxerimos dirixirse de novo ó Servizo Técnico, solicitar a reparación gratuíta e a devolución do cobrado. Ademais, sería bo esixir unha Folla de Reclamacións e acudir á Oficina Municipal de Información ó Consumidor. Se as xestións non dan resultado, o mellor é acudir a xunta un perito para que informe por escrito do estado do xerador, co fin de continuar as reclamacións en xuízo ou en arbitraxe de consumo.