: Contrata un paquete de telefonía e ADSL polo desconto e deixan de aplicarllo na segunda factura

Contratei na miña casa o ADSL cunha compañía telefónica. Chamáronme por teléfono e ofrecéronme contratar nun paquete o ADSL e a telefonía móbil cun desconto de dez euros e unha permanencia. Para iso, debía portar o meu número móbil e aceptar a oferta por teléfono, cousa que fixen. A primeira factura chegou ben, pero a segunda chegou sen o desconto. Por máis que reclamo, non consigo nada.

Suxerímoslle que comprobe no seu contrato as condicións da tarifa á que se acolleu. Se non dispón del, solicite que lle envíen unha copia. Aínda así, busque tamén na web do operador e en folletos publicitarios as condicións do paquete ao que se acolleu. Se o seu contrato e/ou a publicidade recollen a oferta do desconto para o paquete ADSL+móbil, realice unha nova reclamación e esixa que se cumpra a oferta e, polo tanto, a aplicación do desconto. Solicite, ademais, o número de incidencia. Tamén pode acudir aos servizos de consumo do seu municipio ou comunidade autónoma e solicitar unha mediación. Teña en conta e alegue que, por lei, o contido da oferta, da promoción ou da publicidade, as condicións xurídicas ou económicas e as garantías ofrecidas son esixibles polos consumidores e usuarios, aínda cando non figuren de forma expresa no contrato rexistrado. E se lle conviñese algunha proba do contido da oferta, pode alegar que ten dereito ao desconto porque llo aplicaron o primeiro mes.