: A caldeira do piso no que vive de alugueiro estragouse e o propietario non se fai cargo do arranxo

Hai pouco aluguei unha vivenda. Estragouse a caldeira e o propietario dime que eu teño que pagar o arranxo porque no contrato que asinei di que o inquilino se fai cargo de todas as reparacións. É iso legal?

A Lei de arrendamentos urbanos di no seu artigo 21 que o arrendador está obrigado a realizar, sen dereito a elevar por iso a renda, todas as reparacións que sexan necesarias para conservar a vivenda nas condicións de habitabilidade co fin de servir ao uso convido, salvo cando o estrago sexa imputable ao arrendatario. Tamén engade que as pequenas reparacións que esixa o desgaste polo uso ordinario da vivenda serán a cargo do arrendatario.

Se a avaría non é imputable ao inquilino, a reparación debe ser aboada polo propietario, aínda que no contrato se indique que o arrendatario se fai cargo de todas as reparacións. O artigo 21 da Lei de arrendamentos urbanos é aplicable de xeito imperativo e as partes non poden modificalo pola súa propia vontade. Conforme ao establecido no artigo 6 da norma, son nulas as estipulacións que modifiquen en prexuízo do arrendatario ou subarrendatario as normas do título segundo da lei, título no que se encadra o artigo 21.