: Guraso banandu batek semearen mantenu-kuota ordaindu behar al dio beste gurasoari, berarekin oporraldietan dagoen bitartean ere?

Bananduta nago 2001 urteaz geroztik eta zazpi urteko semea dut, guraso-agintea partekatuta. Umearen mantenua nik ordaintzen dut hilero. Umeak nirekin hilabete eta erdia oporretan eman duelarik, epe honetakoa ere ordaindu behar ote diot amari? Horrelakorik ez egitea agintzen omen du logikak, epe honetan gastuak ene konturakoak izan baitira. Dena den ez dakit legezkoa den, sententziak horrelakorik ez baitu xedatzen.

/imgs/20041001/img.consultorio.01.jpgBanantze edo dibortzioan adin txikiko seme-alaben zaintza gurasoetako baten eskuetan uzten denez, besteak bisitatzeko obligazio eta eskubidea du. Asko-askotan eta adin txikikoen oporraldiei dagokienez, bisitatzeko eskubide hori, zaintza ez duen gurasoarekin umeak oporren erdia ematean gauzatzen da. Hortik dator kontua: adin txikikoak zaintza ez duen gurasoarekin eman duen oporraldi horietako mantenua ere ordaindu behar ote zaio beste gurasoari, egun horietako elikagaiak zaintza ez duen gurasoaren konturakoak izan direla gogoan izaki. Kontu horri, beraz, erantzuna emateko, kontuan izan behar da "legezko elikagaiak" eguneko edo hileko elikadura hutsa baino askoz ere gehiago direla. Elikagaiengatiko pentsioak seme-alabak bere oporretan izan ditzakeen gastuak baino premia gehiago estaltzen ditu. Adibidez, badira urtebeteko maiztasuneko (edo, gutxienez, hilabete baino maiztasun handiagoko) gastuak ere. Espainiako Kode Zibileko 42. artikuluak dioenez, elikagaitzat jotzen da umea elikatzeko, janzteko, bizitzeko, hezteko eta sendatzeko behar duen guztia, atal horiek maiz oporretako janez kanpokoak badira ere. Beste alde batetik, pentsio horren munta finkatzearen oinarria beharturiko gurasoaren urteko diru-sarreren eta urte osoko gastuen ponderazioan datzanez, pentsioa finkatuz gero, hilean horrenbeste ordaintzea xedatzen da. Gure iritziz, egokiena banantze-kasuan interesak defendatu zituen abokatuarekin kontsultatzea izango da. Nolanahi ere, seme-alaben interesak gurasoenei lehenesten zaizkienez, epaitegi gehientsuenek horrelako eskabideei ezezkoa ematen diete, arauak ahalik eta seme-alaben alderago gerturatzearren.