Calidade de imaxe e son sen saír da casa

Calidade de imaxe e son sen saír da casa

O Home Cinema ou cine na casa está de moda e revolucionou o lecer e a electrónica de consumo dos fogares. Trátase dun sistema de imaxe e son composto dun DVD, un amplificador A/V (audio/vídeo) e altofalantes, que tenta recrear o cine na casa permitíndonos obter no noso salón unha elevada calidade de audio e de vídeo. Os fabricantes ofrecen modelos para todos os gustos e petos. A continuación propóñense algunhas claves para tirarlle o mellor partido ó sistema de cine na casa.

O prezo inflúe moito

• Antes de mercalo, decida canto está disposto a desembolsar. Os prezos dos Home Cinema varían tanto que limitar a cantidade destinada a este gasto é fundamental e será a primeira peneira entre uns modelos e outros. Unha vez decidido, busque un establecemento que mereza a súa confianza e onde lle expliquen claramente os conceptos básicos que debe saber para instalar e utilizar o Home Cinema correctamente e para tirarlle o máximo rendemento.
• Para poder conectar o Home Cinema a un televisor, este debe contar con polo menos un euroconector (os aparellos de menos de 10 anos inclúeno), a ser posible con saída conmutable RGB (sistema de conexión de vídeo de alta calidade que separa as tres cores básicas). No tocante ó tamaño, é aconsellable que sexa de 25 polgadas ou máis. O máis axeitado, así e todo, é un televisor de 32 polgadas ou máis, en formato panorámico.
• Hai varios anos os Home Cinemas mercábanse por compoñentes: elixíase un DVD e o resto de elementos (amplificador e altofalantes) ata acadar o sistema completo, e mercar os compoñentes por separado permite decantarse polo mellor de cada casa, pero o gasto tamén aumenta notablemente.

Combos ou todo nun

• O mercado ofrece tamén a posibilidade de adquirir un conxunto completo, tamén coñecido como combos, que incorpora todos os elementos (amplificador, DVD e altofalantes). Estes sistemas todo nun son a mellor opción para quen se inicia no mundo do Home Cinema sen esixir a mellor calidade e sen pretender amplialo. Amais de resultaren moito máis económicos que se mercásemos os compoñentes por separado, os combos combinan estética e prestacións, e diminuíron notablemente o tamaño dos compoñentes. Como aspectos negativos destacan as súas limitacións tanto en conexións coma en potencia ou calidade sonora, aínda que para quen acaba de iniciarse isto non adoita supor un impedimento. Para facérmonos cun bo combo, resulta fundamental non se deixar abraiar polas gangas, pois os equipos que ofrecen moitas prestacións a moi baixo prezo a miúdo agachan compoñentes de baixa calidade.

Colocación das caixas

• Canle central. Débese situar enriba ou debaixo da pantalla de televisión. Debe ter blindaxe magnética, para que o imán do altofalante non altere a imaxe, sobre todo en TV de tubo. Se aparecen manchas de cores no lado do televisor onde se colocou a caixa central, arrédea deste polo menos 30 ou 40 centímetros.
• Caixas frontais. O tweeter (altofalantes de agudos) débese situar á altura dos oídos, orientados cara ó oínte, a uns 60 cm a cada lado da pantalla, e á mesma profundidade có central.
• Caixas traseiras. Para poder aprezar o son envolvente que proporcionan, colocaranse atrasadas con respecto á posición de escoita como mínimo arredor dun metro. Se isto non é posible, situaranse a ambos lados do oínte. En ambos os casos, débense situar a unha altura de aproximadamente 30 centímetros por riba da cabeza do oínte sentado, e orientados cara ao mesmo.
• Subwoofer. Ó non ser o son grave direccional, a súa colocación non é primordial. Probe distintos emprazamentos, e colóqueo onde mellor realce as frecuencias baixas sen distorsionar, que adoita ser esquinado na parede frontal.

Acústica da sala

• Mellore a acústica da sala na que vai instalar o seu sistema de cine na casa. Saiba que os cristais e o pladur son o peor inimigo para un son claro e natural. O chan de madeira natural tamén crea reflexións do son. Evite que o son que sae dos altofalantes distorsione ou teña eco colocando alfombras e cortinas, que absorben o son no canto de reflectilo.
• Os mobles con tapicería, como sofás e cadeiras de brazos, e os cadros pequenos, teas ou tapices das paredes, tamén contribúen a mellorar a acústica.
• Non instale as caixas acústicas nun moble que teña portas ou baldas de cristal. Evite os mobles que conteñan cristalería.
• Evite que o son retumbe, separando as caixas da parede polo menos 50 centímetros.