Como se reciclan os aparellos eléctricos?
Por lei, todos os aparellos electrónicos deben reciclarse en plantas autorizadas. Aquí despóxanse de elementos tan nocivos como o fósforo, o mercurio ou os gases refrixerantes. O resto de compoñentes (plástico, aluminio, cobre ou vidro) procésanse para fabricar novos produtos.
Do fogar ao Punto Limpo
Os vertedoiros ou os colectores de lixo non son o lugar idóneo para depositar electrodomésticos, televisores ou calquera outro aparello electrónico. O seu destino debe ser os Puntos Limpos. Os consumidores poden entregar tamén na tenda o vello aparello para a súa reciclaxe, sempre e cando merquen un produto de similares características.
O almacén e a planta de reciclaxe
Os aparellos trasládanse dende o Punto Limpo ata as plantas autorizadas para a súa reciclaxe. Á súa chegada, o transporte pésase na báscula. A lei esixe documentar e declarar a orixe e cada movemento e procesado dos residuos.
Oito horas reciclando televisores
Nas cadeas de reciclaxe, como a localizada en Osorno (Palencia), a chegada dos residuos activa un protocolo preciso de despezamento e reciclaxe. O persoal traballa parapetado tras máscaras e roupas de seguridade. A liña de televisores e monitores apenas descansa durante oito horas. Primeiro toca separar a carcasa da pantalla e despois o resto dos compoñentes eléctricos. Detrás da cadea hai colectores para cada tipo de peza onde se recompilan cables, bobinas de cobre, placas base, etc.
Chumbo, cadmio e fósforo
Da pantalla sepáranse o vidro de chumbo e o de cadmio. Estes materiais utilízanse despois como materia prima para a industria da porcelana. O elemento máis nocivo é o fósforo que recobre o interior da pantalla. Hai que aspiralo e envialo a un xestor autorizado para o seu correcto tratamento.
A taxa ecolóxica
Os roubos en Puntos Limpos e a xestión ilegal dos residuos tóxicos, como os contaminantes gases CFC presentes nos frigoríficos, provocan a liberación de grandes cantidades de dióxido de carbono á atmosfera. Estas prácticas delituosas atentan ademais contra os consumidores, xa que por cada aparello se paga unha taxa ecolóxica, incluída no prezo, destinada a cubrir as custas da súa posterior reciclaxe legal.