Hiru geruzakoak garestiagoak dira baina ez leunagoak
Bederatzi komuneko paper-lagin laborategian aztertu dira eta, gainera, erabiltzaile-panel batek epaitu ditu; lagin horietako zazpi bi geruzakoak dira eta beste bi, berriz, hiru geruzakoak. Biribilkien luzeran (baita zerbitzu kopuruan ere) lagin batetik bestera alde handiak daudenez, prezioak konparatu ahal izateko ematen duten paperaren luzera hartu da aintzat. Horrela, denetan merkeena Foxy da (8 zentimo kostatzen da 10 metroko tartea) eta 17 zentimo, aitzitik, Scottex Acolchado lagina. Foxy, merkeena izateaz gainera, kalitate hobereneko lau paperetako bat da: hortaz, bera da kalitatea eta prezioaren arteko erlazio egokiena eskaintzen duena.
Gramaje urrienekoak bi geruzako Renova klasikoa (33,1 g/m2) eta Foxy (34,7 g/m2, meheena, aldi berean). Scottex Acolchado eta Colhogar Resistant, biak ere hiru geruzakoak, pisu handiagokoak dira metro karratuko (51,5 g/m2 eta 48,3 g/m2) baita lodiera handiagokoak ere (495 µm eta 618 µm). Dena dela, proba objektibo honetako emaitzak ez datoz bat kontsumitzaileen iritziarekin. Lagin horien leuntasuna, lodiera eta zimurtasuna baloratu zituzten hamabi erabiltzailek eta, irudi lezakeenaz beste aldera, hiru geruzako bi laginak izan ziren kalifikazio txarrenak jaso zituztenak: Colhogar Resistant-ek 10 puntutik 6,7 eraman zituen eta Scottex Acolchado-k 6,9 puntu. Kontsumitzaileen iritziz, beraz, lagin denetan leunena Renova Progress XXL (“oso egokia” erdietsi duen bakarra) eta ondotik datozkio Colhogar Dermia, Scottex Acolchado eta Scottex Megarollo (“egokiak”); gainerakoak “zuzen” hutsean geratu dira.
Lagin bakoitzaren erresistentzia neurtu zuten, bai lehor, bai heze zeudela ere, luzeran eta zeharka. Renova Clásico eta Foxy dira erresistentzia handienekoak eta horien atzetik Colhogar Resistant eta Renova Progress XXL datoz, “egokia” kalifikazioa eskuratuta. Scottex eta Colhogar Extra Largo “zuzen” baizik ez zuten lortu eta Colhogar Dermia-k ez zuen proba hau gainditu.
Xurgatzeko gaitasuna kalkulatzeko, zerbitzu bakoitzeko zenbat mililitro atxiki ditzaketen neurtu da, lagin bakoitzaren xurgapen koefizientea eta hezean agertzen duen jokamoldea aintzat jota. Foxy eta Scottex Megarollo laginek jokaera bikaina agertu zuten eta Renova Progress XXL laginak, aldiz, gainditzeke utzi zuen proba.
Aztertutako lagin denetan Scottex Megarollo da handiena: astunena (140 g), luzeena (40,8 m) eta diametro handienekoa (12,6 cm). Hori dena ez da beti mesedegarria, aparatu askotan horren tamainako biribilkiak kabitzen ez direlako. Diametrorik txikienekoa Renova Clásico da (9,9 cm). Bere burua “trinko” gisa agertzen duten lau laginek (antzeko diametroan metro gehiago bildurik) luzera handiagoa ematen dutenak dira.
Biribilkiak ematen dituen zerbitzu-kopuruak, zeharka bada ere, erabileren kopurua adierazten du, gutxi-asko. Trinko ez direnak dira atal honetan motzenak: 130 zerbitzuetatik (Colhogar Dermia, Colhogar Resistant eta Renova Clásico) 144 zerbitzuetara (Scottex Acolchado) doaz prestazioak. Trinkoen arteko aldeak ere esanguratsuak dira: Scottex Megarollo-k 326 zerbitzu ematen ditu eta, beste muturrean, Colhogar Extra Largo laginak berrehun baino gehiagorik ez. Zerbitzuen tamainak, aitor dezagun, biziki desberdinak dira: handienak Foxy, Colhogar Resistant eta Scottex markako hiru laginak dira (bostek ere 117,5 cm2 dituzte). Zerbitzu txikiena Renova Progress XXL laginak du: 112,5 cm2 baino ez.
Renova markako bi laginak lauak ziren, besteak ez bezalakoak (apainduak zeuden gainerakoak). Koloreaz ari garela, zortzi lagin zuriak dira eta bederatzigarrena (Colhogar Resistant Perfumado) arrosa kolorekoa. Lagin zuri guztiek zuritasun-gradu egokia agertzen badute ere, denetan zuri hutsetik “urrunena” Renova bi geruza klasiko da. Renova markako biak dira substantzia zuritzaileak dauzkaten bakarrak (argi ultramorearen bidez ikus daitezke horiek). Erabiltzeko erraztasunari dagokiola, Scottex Megarollo da “egokia” kalifikazioa eraman duen bakarra; jokaera traketsena (“ez da egokia”), berriz, Renova klasikoak agertu du. Gainerako laginak “zuzen” apalean geratu dira. Itxura hobereneko lagina Colhogar Dermia da, ondotik Scottex Megarrollo, Scottex Acolchado eta Foxy datozkiola. Gainerakoek emaitza “zuzenak” baizik ez dute jaso.
Hortaz, eginiko saiakera guztietako emaitzak neurturik eta komuneko paper bat edo beste bat aukeratzean eragin biziena duten irizpideak lehenetsita (%53 leuntasunagatik, %19 xurgatzeko gaitasunagatik, %18 erresistentziagatik, %7 baliagarritasunagatik eta %3 itxuragatik) lagin bakar bat ere “oso egokia” ez dela egiaztatu da; Scottex Megarollo, Foxy, Renova Progress XXL eta Scottex Acolchado hiru geruzakoa “egokiak” dira eta gainerakoak, berriz, “zuzen” baino ez.
Komuneko paper guztiak egurrez eginda dauden arren, hastapeneko pasta lortzeko hainbat prozedura baliatzen dira. Sistemak sistema, pasta horizta izango denez, zuntzak zuritu beharko dira. Colhogar, Renova Progress XXL, Foxy eta Scottex Megarollo laginen pastak zelulosa hutsekoak dira, gainerakoak baino hobeak. Horien atzetik zelulosazkoak datoz (Scottex Máxima Suavidad y Consistencia eta Scottex Acolchado) eta atzenik, kalitate kaskarrenekoa, zelulosa nahasizkoa da (Renova Clásico).
Gure gizarteak kontsumitzen duen komuneko paper kopuru itzel hori asetzeko arbola asko eta asko ipurditik ebaki behar dira. Ebakitze prozesu hori geldiarazteko, ordea, sektore kontserbazionistek baso iraunkorretatik ateratako pastak baliatzea edo, are eta hobeki, kartoi, aldizkari, egunkari eta antzekoak birziklatzetik erdietsitakoak erabiltzea proposatu izan dute behin baino gehiagotan. Gurean azterturiko bederatzi laginetatik bakar batek ez du erabili pasta birziklaturik, Renova Clásico laginak izan ezik (bertan, birziklatuen presentzia kopuru ñimiñoa baizik ez da).
Laburbilduz eta konparaketako taula
Laburbilduz
- Bederatzi komuneko paper aztertu dira oraingoan, horietako zazpi bi geruzakoak eta bi hiru geruzakoak; horien prezioak, 10 metroko, 8 zentimotik (Foxy) 17 zentimoraino doaz (Scottex Acolchado). Bilduma bakoitzean dautzan biribilkien kopurua (“oparikoak” salbuetsita) dezente aldatzen da: 9 aletik (Scottex Acolchado) 25 aleraino (Colhogar Extra Largo).
- Biribilki trinkoek (antzeko diametrodun biribilkian paper metro gehiago ematen dituztela diotenak, alegia) konbentzionalek baino dezente paper gehiago ematen dute. Renova eta Scottex trinkoek gainerakoen bi halako daukate. Scottex Extra Largo laginak, berriz, besteek baino %50 gehiago baizik ez du (etiketak dioena).
- Erabiltzaileek ez dute atzeman hiru geruzako paperak besteak baino leunagoak direla; izan ere, hiru geruzakoek kalifikazio eskasagoak eraman zituzten.
- Colhogar Dermia ez da behar bezain erresistente, Renova bi geruza klasikoak baliagarritasunean huts egin du eta Renova Progress XXL laginak ez du gutxien-gutxienekoa xurgatzen. Renova Progress XXL da denetan leunena, Colhogar Dermia itxura hoberenekoa eta Renova bi geruza eta Foxy, berriz, erresistentzia handienekoak. Xurgatzeko gaitasun handiena Foxy eta Scottex Megarollo laginek agertzen dute.
- Bederatzi laginetatik bakar bat ere ez da “oso egokia”: Scottex Acolchado, Scottex Megarollo, Renova Progress XXL eta Foxy “egokiak” dira eta gainerakoak “zuzenak” baino ez.
- Kalitatea eta prezioaren arteko erlazio egokiena Foxy Super soft laginak ematen du: bera da denetan merkeena eta kalitate hoberena erakutsi duten lauetako bat.
| Marka | Foxy Super Soft | Scottex Megarollo | Colhogar Extra largo | Renova Progress XXL | Colhogar Dermia |
|---|---|---|---|---|---|
| Mota | 2 geruzako trinkoa | 2 geruzako trinkoa | 2 geruzako trinkoa | 2 geruzako trinkoa | 2 geruzako klasikoa |
| Biribilki kopurua | 12 | 12 | 32 (25+7) | 16 (12+4) | 12 (10+2) |
| Prezioa (euro, 10 metroko) | 0,08 | 0,11 | 0,10 | 0,12 | 0,12 |
| Osagaien ezaugarriak * | |||||
| Pasta mekaniko edo CTMP (%) | Aztarrenak | Aztarrenak | Ez datza | Ez datza | Ez datza |
| Pasta birziklatuak (%) | ND | ND | ND | ND | ND |
| Izendapena | Zelulosa hutsa | Zelulosa hutsa | Zelulosa hutsa | Zelulosa hutsa | Zelulosa hutsa |
| Ezaugarri orokorrak | |||||
| Biribilkiaren diametroa (cm) | 11,1 | 12,6 | 11,7 | 11,4 | 11,2 |
| Biribilkiaren luzera (m) | 34,4 | 40,8 | 25 | 35,6 | 16,2 |
| Biribilkiaren pisu garbia (g) | 115,3 | 139,9 | 86,8 | 115,5 | 55,2 |
| Geruza kopurua | 2 | 2 | 2 | 2 | 2 |
| Zerbitzu kopurua | 280 | 326 | 200 | 285 | 130 |
| Azalera, zerbitzuko (cm2) | 118,1 | 117,5 | 116,4 | 112,5 | 114,1 |
| Ezaugarri orokorrak | |||||
| Leuntasuna | Zuzen | Egokia | Zuzen | Oso egokia | Egokia |
| Resistencia | Oso egokia | Zuzen | Zuzen | Egokia | Ez da egokia |
| Xurgatzeko gaitasuna | Oso egokia | Oso egokia | Egokia | Ez da egokia | Zuzen |
| Erabiltzeko erraztasuna | Zuzen | Egokia | Zuzen | Zuzen | Zuzen |
| Itxura, begietara | Egokia | Egokia | Zuzen | Zuzen | Oso egokia |
| Osoko kalitatea | Satisfactoria | Satisfactoria | Zuzen | Satisfactoria | Egokia |
| Marka | Renova Komuneko paper | Scottex Máxima suavidad y consistencia | Colhogar Resistant perfumado | Scottex Acolchado |
|---|---|---|---|---|
| Mota | 2 geruzako klasikoa | 2 geruzako klasikoa | 3 geruzako klasikoa | 3 geruzako klasikoa |
| Biribilki kopurua | 24 | 16 (12+4) | 12 | 9 |
| Prezioa (euro, 10 metroko) | 0,12 | 0,14 | 0,15 | 0,17 |
| Osagaien ezaugarriak * | ||||
| Pasta mekaniko edo CTMP (%) | 17 | 8 | Aztarrenak | 10 |
| Pasta birziklatuak (%) | Kopuru ñimiñoa | ND | ND | ND |
| Izendapena | Zelulosa mezclada | Zelulosa | Zelulosa hutsa | Zelulosa |
| Ezaugarri orokorrak | ||||
| Biribilkiaren diametroa (cm) | 9,9 | 10,2 | 11,7 | 11,5 |
| Biribilkiaren luzera (m) | 16,3 | 17,5 | 16,3 | 18 |
| Biribilkiaren pisu garbia (g) | 50,2 | 63,6 | 73,7 | 86,9 |
| Geruza kopurua | 2 | 2 | 3 | 3 |
| Zerbitzu kopurua | 130 | 140 | 130 | 144 |
| Azalera, zerbitzuko (cm2) | 116,25 | 117,5 | 117,5 | 117,5 |
| Ezaugarri orokorrak | ||||
| Leuntasuna | Zuzen | Zuzen | Zuzen | Egokia |
| Resistencia | Oso egokia | Egokia | Zuzen | Zuzen |
| Xurgatzeko gaitasuna | Zuzen | Egokia | Zuzen | Egokia |
| Erabiltzeko erraztasuna | Ez da egokia | Zuzen | Zuzen | Zuzen |
| Itxura, begietara | Zuzen | Zuzen | Zuzen | Egokia |
| Osoko kalitatea | Egokia | Egokia | Zuzen | Egokia |
*”Zelulosa hutsezko” paper-pastak kalitate hoberenekoak dira komuneko papera fabrikatzeko; “zelulosazkoak” kalitate ertainekoak dira eta “zelulosa nahasizkoa”, emaitza kaxkarrenekoak.
Banan-banan
Bederatzi paperak, banan-banan
Foxy Super Soft
/imgs/20070101/img.analisis2.rollo.01.jpg Komuneko paper zuria, 2 geruza trinkoz osatua. 12 biribilki- 0,08 euro 10 metroko: denetan merkeena
- Osoko kalitatea: egokia
- Kalitatea eta prezioaren arteko erlazio egokiena. Zelulosa hutsez egina (pastarik hoberena).
- Aldekoak: itxura, erresistentzia eta xurgatzeko gaitasuna.
Scottex Megarollo
/imgs/20070101/img.analisis2.rollo.02.jpg Komuneko paper zuria, 2 geruza trinkoz osatua. 12 biribilki- 0,11 euro 10 metroko
- Osoko kalitatea: egokia
- Zelulosa hutsez egina (pastarik hoberena).
- Aldekoak: leuntasuna, itxura, baliagarritasuna, xurgatzeko gaitasuna zerbitzuko.
Colhogar Extra Largo
/imgs/20070101/img.analisis2.rollo.03.jpg Komuneko paper zuria, 2 geruza trinkoz osatua. 25 biribilki (gehi zazpi, opari gisa)- 0,10 euro 10 metroko (bigarren merkeena)
- Osoko kalitatea: zuzen
- Zelulosa hutsez egina (pastarik hoberena).
- Aldekoa: xurgatzeko gaitasuna
- Hobetu beharrekoak: zerbitzu kopurua eta paperaren luzera. Biribilki trinko laburrena da (25 m) eta zerbitzu kopuru urrienekoa (200).
Renova Progress XXL
/imgs/20070101/img.analisis2.rollo.04.jpg Komuneko paper zuria, 2 geruza trinkoz osatua. 12 biribilki (gehi lau, opari gisa)- 0,12 euro 10 metroko
- Osoko kalitatea: egokia
- Zelulosa hutsez egina (pastarik hoberena).
- Aldekoak: leuntasuna eta erresistentzia
- Kontrakoak: xurgatzeko gaitasuna
Colhogar Dermia
/imgs/20070101/img.analisis2.rollo.05.jpg Komuneko paper zuria, 2 geruza trinkoz osatua. 10 biribilki (gehi beste bi, opari gisa)- 0,12 euro 10 metroko
- Osoko kalitatea: zuzen
- Zelulosa hutsez egina (pastarik hoberena).
- Aldekoak: leuntasuna eta itxura
- Kontrakoak: erresistentzia ahulenekoa, bai lehor, bai heze zegoela
Renova
/imgs/20070101/img.analisis2.rollo.06.jpg Komuneko paper zuria, 2 geruzakoa. 24 biribilki- 0,12 euro 10 metroko
- Osoko kalitatea: zuzen
- Zelulosa nahasiz egina (kalitate apalagokoa).
- Aldekoa: erresistentzia
- Kontrakoak: uretako dispertsio-denbora luzeenekoa. Erabiltzeko erraztasuna ez da egokia.
Scottex Máxima Suavidad y Consistencia
/imgs/20070101/img.analisis2.rollo.07.jpg Komuneko paper zuria, 2 geruzakoa. 12 biribilki (gehi lau, opari gisa)- 0,14 euro 10 metroko
- Osoko kalitatea: zuzen
- Zelulosaz egina (tarteko kalitatekoa).
- Aldekoa: xurgatzeko gaitasuna.
Colhogar Resistant Perfumado
/imgs/20070101/img.analisis2.rollo.08.jpg Komuneko paper zuria, 3 geruzakoa- 0,15 euro 10 metroko (bigarren garestiena)
- Osoko kalitatea: zuzen
- Zelulosa hutsez egina (kalitate hoberenekoa).
- Aldekoa: erresistentzia
- Hobetzeko modukoak: paperaren alderdietako bat zimurtsua gertatzen da, ukitzean ez da oso malgua.
Scottex Acolchado
/imgs/20070101/img.analisis2.rollo.09.jpg Komuneko paper zuria, 3 geruzakoa. 9 biribilki- 0,17 euro 10 metroko (denetan garestiena)
- Osoko kalitatea: egokia
- Zelulosaz egina (kalitate ertainekoa).
- Aldekoak: leuntasuna, itxura eta xurgatzeko gaitasuna