Saltatu nabigazio-menua eta joan edukira

EROSKI CONSUMER, kontsumitzailearen egunkaria

Bilatzailea

Fundazioaren logotipoa

EROSKI CONSUMERen kanalak


Kokaleku honetan zaude: Azala > Papereko argitalpena >

Los datos, informaciones, interpretaciones y calificaciones que aparecen en esta información corresponden exclusivamente al momento en que se realizaron y tienen, por tanto, una vigencia limitada.

Inkesta egin diegu 65 eta 80 urte arteko 1.200 pertsonari, eta galdetu diegu zer-nolako ohiturak eta zailtasunak dituzten elikagaiak kontsumitzeko garaian : Adinekoak: badute kezka elikadurarekin eta zaindu egiten dute

  • %90 inguruk egunero jaten dute ogia, zerealak eta esnea. %85ek fruta ere bai. %86k ez dute jaten zizka-mizkarik, azukrerik eta opil industrialik, eta %74k ezta aurrez prestatutako produkturik ere.
  • %51k elikagai funtzionalekin edo moldatuekin osatzen dute beren dieta bizi-kalitatea hobetzeko eta gaixotasunei aurre hartu edo horien eragina arintzeko
  • %5ek bakarrik adierazi dute arazoak dituztela modu egokian elikatzeko, nahiz eta %10ek onartzen duten otorduren bat huts egiten dutela noizean behin.

Zer jaten dute zehazki adinekoek?

Ogia, zerealak, esnea eta fruta egunero

Inkestan, erantzun duten adineko pertsonen %95ek adierazi dute egunero jaten dituztela ogia eta zerealak, eta %91k esnea ere bai. Gainera, %85ek fruta ere sartzen dute eguneroko dietan. Berdurak, barazkiak eta tuberkuluak, berriz, %57k jaten dituzte egunero, eta %29k astean hiru edo lau aldiz jaten dituzte. Lekaleak astean behin edo bitan izaten dituzte (halaxe adierazi dute %79k). Haragia eta haren eratorriak eta arraina eta itsaskia, berriz, astean behin edo bitan jaten dituzte gehienek: %61ek eta %55ek hurrenez hurren. Eta arrautzak, astean bat edo bi.

Azkenik, aurrez prestatuta dauden produktuak ez zaizkie interesatzen. Hain zuzen, %74k adierazi dute ez dutela halakorik hartzen. Eta zizka-mizkak, azukreak eta opil industrialak ere ez dira sartzen haien erosketen artean. %86k sekula ez dituzte jaten, edo noizean behin baino ez.

Osatu egiten dute dieta

Zenbaitetan, adinekoek produktu funtzionalak edo moldatuak hartzen dituzte beren dieta osatzeko. Inkestari erantzun dioten pertsonen %51k hartzen dituzte beren bizi-kalitatea hobetzeko eta gaixotasunen sintomei aurre hartzeko edo horiek arintzeko.

Dieta osatzeko joera hori hedatuagoa dago gazteenen artean, 65 eta 69 urte artekoetan alegia. Gero, 70 urtetik aurrera, beherantz egiten du. Sexuka, emakumeek ageri dute interes gehien halakoak hartzeko, eta diru sarreren arabera, hilean errenta handiena dutenek.

Eta zer-nolako produktuek eragiten dute interes gehien? Gatz gutxiko produktuek (dieta osatzen duten adinekoen %25ek hartzen dituzte) eta gantz gutxikoek (%23k). Horietaz gain, beste batzuek ere badute garrantzia kontsumitzaile horientzat: kaltzioarekin edo omega-3arekin aberastuta daudenak, kolesterolari aurre egiten laguntzen dutenak eta defentsak hobetzen dituztenak.

Zailtasun gutxi

Galdekatu ditugun adineko herritar gehienek adierazi dute ez daukatela arazorik hainbat elikagai talde konbinatzen dituen dieta egiteko. Erantzun duten herritarren %5ek bakarrik aipatu dute mugaren bat.

Modu egokian elikatzeko arazoak dituzten adineko pertsonen profila ezaugarri hauek irudikatzen dute: emakumeak gehiago dira gizonak baino, hileko errenta txikia du (600 eurotik beherakoa), bere osasun egoera txartzat edo oso txartzat jotzen du, ez du ikasketarik eta hainbat kidetako familian bizi da, ondorengo zuzenak ez direnekin, edo bestelako bizikidetza formulak dituen familian.

Modu egokian elikatu ezinik dabiltzan adineko pertsonek horretarako ematen dituzten arrazoi nagusiak hauek dira: bizitza garestitu egin dela (halaxe nabarmendu dute zailtasunak dituzten pertsonen %52k), apetiturik ez dutela edo anorexia dutela (%21ek).

Argudio horiek aldatu egiten dira sexuaren arabera. Gizonen artean, apetitu falta eta janariarekiko interesa galdu izana aipatzen dira, baita jakiak prestatzen ez jakitea ere; emakumeek, berriz, zailtasun ekonomikoak aipatzen dituzte muga nagusitzat.

Baraualdiak

Nutrizio gabezien eragilea baraua ere izan daiteke. Inkestan parte hartu duten hamar herritarretatik ia batek onartu du otorduren bat huts egin izan duela (arazo hori hedatuagoa dago 70 urtetik gorakoen artean).

Badira faktore psikosozialak eguneko otordu nagusiak huts egitera daramatenak, bakarrik bizi diren pertsonetan ageri baita joera gehien horretarako, eta hainbat kidetako familietan bizi direnen artean ere bai. Baita osasuna hondatuena dutenen artean ere.

Oinarrizko otordu bat egiteari uzten dioten gehienek noizbehinka egiten dute, nahiz eta %15ek egunero edo ia egunero uzten dioten produktu batzuk jateari. Arrisku talde hori ez da oso handia; zehazki, inkestari erantzun dioten guztien %1,4 dira.

Otordu bat huts egiteko arrazoia, nagusiki, apetitu falta izaten da eta janaria norberarentzat bakarrik prestatu behar izateak sortzen duen nagia. Digestio arazoek ere badute zerikusia: afaldu gabe gelditzeko, eta digestio txarra dela medio lo hartzeko izaten diren zailtasunengatik ere huts egiten da afaria.

Saltoki handiak: irisgarriagoak eta moldatzeko errazagoak

Adin batetik aurrera, 65 urtetik 75 urtera bitartean hain zuzen, gero eta nekezagoa izaten da erosketak egitea, apaldu egiten direlako ikusmena, mugikortasuna eta indarrak. Saltokien irisgarritasunak eta horietan moldatzeko erraztasunak sortzen du arazo gehien. Honako atal hauek nabarmendu dituzte inkestari erantzun dioten herritarrek:

Bezeroarentzako informazioaren irisgarritasuna

  • Adinekoen %43k adierazi dute noizbait arazoak izan dituztela produktuen informazioa irakurtzeko, eta %41i berdin gertatu izan zaie prezioen etiketak irakurtzeko garaian.
  • Etiketa jartzeko sistema eta eskaintzen eta sustapenen kartelak gero eta konplexuagoak iruditzen zaizkie, eta, ondorioz, lautik batek ulertzeko arazoak izan ditu aldiren batean.

Merkataritza gunea

  • Adinekoen %20k izan dute komunak erabiltzeko beharra, eta %17k atseden hartu behar izan dute erosketak egiten ari zirela.

Garraioa eta produktuen irisgarritasuna

  • %25ek adierazi dute zenbaitetan ezinezkoa gertatu izan zaiela apalen beheko aldean dauden produktuak hartzea, eta %32k goialdeko produktuekin izan dituzte arazoak.
  • Erantzun duten adinekoen %24k nabarmendu dute arazoak eduki izan dituztela produktuak gurditxoetan edo saskietan garraiatzeko.
  • %20k zailtasunak dituzte saskiko produktuak ordainlekuko zintetan jartzeko.
  • Erosketak etxera eramatea ere muga izaten da %22rentzat.

Produktuen ontziak

  • %22k arazoak izaten dituzte ontzi batzuk irekitzeko, indarra eta trebetasuna falta zaizkielako (adibidez, kontserbak eta latak).
  • %15k aipatu dute trabagarria gertatzen zaiela gainazal laua duten ontzi batzuei heltzea heldulekurik ez dutenean.
  • %57k ez dituzte hartzen produktu freskoak erretiluetan edo errazio ontziratuetan.

Eduki honen barruko orrialdekatzea

Hau interesa dakizuke:

Infografiak | Argazkiak | Ikerketak