Saltar o menú de navegación e ir ao contido

EROSKI CONSUMER, el diario del consumidor

Buscador

logotipo de fundación

Canles de EROSKI CONSUMER


Estás na seguinte localización: Portada > Edición impresa > Entrevista

^

EDICIÓN IMPRESA.
Xuño 2017

Alejandro Perales, asesor da Asociación de Usuarios de Televisión: "A televisión ten que reinventarse para sobrevivir"

 

Alejandro Perales é un xornalista apaixonado da televisión, desa que se ve en familia sentado no sofá. Un medio que, porén, afronta grandes retos na era crecente de Internet. "A televisión necesita apostar pola actualidade e polos contidos inmediatos se quere sobrevivir", admite este informador e asesor da Asociación de Usuarios de Televisión. Perales é, ademais, defensor da televisión pública de interese público e asegura que "a televisión en aberto de calidade garante a cohesión social".

Cada día, os españois dedicamos unha media de 7 horas, 39 minutos e 30 segundos ao consumo de medios. A televisión segue sendo a raíña, con case 4 horas, pero Internet avanza a gran velocidade. De feito, segundo o Estudo xeral de medios, xa é o terceiro medio máis consumido, moi preto xa da radio, con 1 hora e 42 minutos ao día. Cre vostede que a Rede desbancará a televisión?

O consumo de contidos audiovisuais está cambiando. Pero Internet non é un medio, senón un ámbito que integra todos os medios, é unha maneira distinta de acceder aos contidos. Aínda que cada vez hai máis vídeos creados de forma específica para a Rede, o certo é que moita xente ve en Internet contidos televisivos creados para a televisión. Esta plataforma de acceso aos contidos audiovisuais que é Internet si pode chegar a substituír o televisor que hoxe coñecemos.

Televisión á carta, televisión en liña, ordenadores, teléfonos intelixentes, tabletas... Cada vez hai máis opcións para ver a televisión. No entanto, a televisión que se consome no sofá segue sendo a pantalla favorita dos españois. Como explica este liderado?

Aínda existe unha cultura de ver a televisión. Para moitas persoas forma parte do lecer, xa que valoran o menor esforzo que supón. Ademais, hai programas que son moi específicos da televisión, coma os informativos, os concursos e os programas de variedades; xéneros ambos que non funcionan ben na televisión á carta ou na televisión en liña.

Os ingresos da televisión de pago disparáronse un 33,2 % no último ano, segundo a Comisión Nacional dos Mercados e a Competencia. Tamén crece o número de abonados, que xa son 5,84 millóns. É este o modelo de televisión cara ao que nos movemos?

E a isto únense plataformas de distribución de contido audiovisual por Internet, como Netflix. O modelo cara ao que nos movemos engloba ofertas para todos os públicos. Ofertas distintas mesmo para os diferentes públicos que somos cada un de nós en cada momento. Un pode descargar unha tempada completa dunha serie en Internet e poñer a televisión para ver os informativos ou un programa de variedades. No entanto, preocúpame que a televisión en aberto, a televisión de servizo público, non teña capacidade de supervivencia. A televisión de servizo público garante a cohesión social, o acceso á cultura, a información e o lecer.

Pero a televisión IP, por Internet, crece. Logrou 1,1 millóns de abonados novos no último ano, xunto coa televisión por cable.

Neste momento, a oferta das plataformas dixitais non substitúe a televisión en aberto; de feito, elas son as grandes distribuidoras dos contidos de ficción, como series e cinema. Pero os contidos audiovisuais masivos, coma informativos, concursos e eventos, necesitan da televisión tradicional. Iso si, a televisión ten que reinventarse se quere sobrevivir no longo prazo, xa que necesita unha sucesiva especialización dos seus contidos.

Nove de cada dez menores ven a televisión nas zonas comúns da casa. É a televisión aínda o punto de encontro familiar?

Si. Os contidos de lecer familiar con audiencias masivas son difíciles fóra dun modelo como a televisión dixital terrestre (TDT). As plataformas dixitais non poden competir coa televisión no consumo en familia.

Pero os nenos españois destinan xa máis tempo a ver vídeos por Internet que a ver a televisión, segundo o Observatorio da Produción Audiovisual da Universitade Pompeu Fabra. Que ten Internet que non lles ofrece a televisión?

Internet ten a interactividade e a dispoñibilidade. Permítelles ver o que queren, cando e onde queren, e coa comodidade do formato pequeno dunha tableta ou dun smartphone.

Entón, estamos ante un cambio histórico na maneira de consumir contidos audiovisuais?

Totalmente. A miña filla ve máis vídeos polo smartphone que a través da televisión. A ubicuidade dos novos terminais permite que vexamos televisión en espazos e momentos que antes eran impensables. Pero tamén hai unha parte negativa, cando falamos de menores. En Internet, o control dos contidos non é tan fácil. A materia pendente da Rede é a etiquetaxe e a cualificación dos contidos, claves para que os sistemas de control parental funcionen.

Cal é o gran desafío da televisión?

O reto da televisión é reinventar o seu contido. Debe apostar pola inmediatez, a actualidade e os contidos de lecer afastados da ficción. Este tipo de contidos, que non funcionan ben nas plataformas dixitais, son os que poden facer sobrevivir a televisión.


Outros servizos


Buscar en

Información de Copyright e aviso legal

Visita nuestro canal Eroski Consumer TV

En EROSKI CONSUMER tomámosnos moi en serio a privacidad dos teus datos, aviso legal. © Fundación EROSKI

Fundación EROSKI

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto