Merca un móbil rebaixado, pero a operadora cambia as condicións e obrígano a pagar máis

Asinei un contrato cunha operadora de telefonía móbil. O documento marcaba unha permanencia de 18 meses con esta compañía, que me obrigaba a realizar un consumo mínimo de 9 euros ao mes. Baixo estas condicións merquei un móbil novo a prezo reducido. Pero poucos meses despois a empresa informoume dun cambio nas condicións do contrato deixando fóra do cálculo dos 9 euros determinadas chamadas, aínda que me aseguraron que podía resolver o contrato sen penalización. Non obstante, na seguinte factura e malia a rexistrar un consumo superior aos 9 euros, cobráronme case tres euros máis. Reclamei no servizo de atención ao cliente para darme de baixa e dinme que si, pero a cambio de pagar a diferenza do teléfono que merquei. Pódenme esixir realizar este pagamento?

  O Real Decreto 899/2009, do 22 de maio, polo que se aproba a Carta de dereitos do usuario dos servizos de comunicacións electrónicas, di que os contratos de servizos de comunicacións electrónicas só se poderán modificar de acordo aos motivos válidos previstos con anterioridade no contrato. E que o usuario final terá dereito a resolver anticipadamente e sen penalización ningunha o contrato nos devanditos supostos. Polo tanto, as penalizacións non son esixibles cando o motivo da baixa ou cambio de operador é o incumprimento da compañía operadora e/ou as modificacións contractuais impostas por ela. Xa que logo, é conveniente seguir adiante cos trámites de reclamación. Para iso pódese acudir aos servizos de consumo máis próximos e solicitar a súa intermediación. Outra opción é a solicitude dos formularios nestes centros para acudir ás Xuntas Arbitrais de Consumo, onde convén amosar toda a documentación dispoñible (contrato, publicidade, facturas, etc.) e indicar o numero de incidencia da chamada efectuada aos servizos de atención ao cliente e a resposta recibida.

Relacións deste contido