Zonas peonís: estudadas 100 das principais rúas restrinxidas ao tráfico de 18 cidades: Mobiliario urbano, limpeza e invasión de vehículos, carencias de unha de cada cinco rúas peonís

Insuficientes papeleiras, bancos e taboa comparativa

Unha rúa peonil debe ter un mobiliario urbano axeitado. Son imprescindibles papeleiras, farois e sumidoiros, e considérase conveniente contar con árbores e xardineiras. En liñas xerais, os técnicos que visitaron o cento de vías peonís valoraron o mobiliario urbano cun 'aceptable'. Valencia, Oviedo, Pamplona, San Sebastián, Vitoria e Zaragoza cualificáronse cun 'ben', pero Almería, Barcelona e Murcia suspenderon cun 'mal' nos dous primeiros casos e cun 'regular' na capital murciana.

Este tipo de vías, pola maior frecuencia de paso dos peóns, requiren un mantemento do mobiliario e unha limpeza de residuos máis frecuente ca outros espazos urbanos. Unha mala conservación ofrece unha imaxe de abandono que reduce o atractivo e que aumenta a sensación de inseguridade. A valoración global non pasou dun 'aceptable'. As cidades mellor valoradas son Córdoba, Madrid, Pamplona, San Sebastián e Valladolid (obteñen un 'ben'); mentres que Almería, Barcelona, Málaga e Zaragoza suspenden cun 'regular'. O resto, na media xeral.

Nun 20% das rúas atopouse sucidade nalgunhas zonas (excrementos, lixos, papeis e outros desperdicios) e nunha de cada tres vías o pavimento amosaba irregularidades, baldosas e lastras soltas ou ben buratos que propician a formación de pozas, ou que poden supor un risco de caída para os peóns (este problema percibiuse especialmente en Barcelona, Zaragoza, Alacante e Oviedo). Neste último aspecto, a situación variou moito en cinco anos, xa que no 2004 só o 16% das vías presentaba este tipo de irregularidades, a metade ca na actualidade. Como elemento positivo, o pavimento era antiescorregadizo no 86% das rúas analizadas.

No tocante ás papeleiras, só nun 59% das rúas peonís visitadas o seu número se considerou apropiado. En Almería, por exemplo, dúas das cinco vías analizadas non contaban con ningunha papeleira. Con todo, hai cinco anos a situación era aínda peor, xa que esta proporción descendía a un 40%. Atopar papeleiras de reciclaxe (con dous ou tres espazos para dividir o papel e o cartón, o plástico, os envases e o lixo orgánico) non foi doado: só se localizaron en Almería e en Sevilla. En unha cada de cada cinco rúas observáronse papeleiras estragadas por actos vandálicos (pintadas), lixo e roturas, e nun 15% había lixo guindado a carón das papeleiras (atopouse especialmente en Barcelona).

Outra cuestión importante (por seguridade e comodidade) é a iluminación: ao igual ca no 2004, máis do 90% das vías peonís incluídas no estudo conta coa suficiente e só nun 4% se atoparon farois en mal estado. Ademais, o 70% das rúas dispoñen de farois específicos para as zonas peonís (unha porcentaxe similar á de hai catro anos).

Menor é a dotación de bancos. Ao igual ca no estudo do 2004, no 60% das rúas non había (destacan Granada e Murcia, onde non se atopou ningún) e en unha de cada dez onde si había, algúns estaban estragados. Así e todo, cómpre aclarar que, igual que acontece co resto do mobiliario urbano (agás coas papeleiras e farois, sempre imprescindibles), a ausencia de bancos nalgunhas zonas peonís vén motivada pola carencia do espazo necesario para colocalos de xeito que non dificulten ou entorpezan o tránsito dos peóns.

O mesmo acontece coas árbores, ausentes en máis da metade das rúas. Nun 37% das vías onde se atoparon, algunhas estaban danadas e, só na metade, contaban con enreixados na súa parte inferior para evitar tropezos e facilitar a conservación do espazo no que están plantadas (en todas as vías de Córdoba, Madrid, Pamplona, Sevilla, Valladolid e Vitoria).

As fontes de auga potable tamén son elementos relevantes. Non obstante, non se viron nun 85% das rúas visitadas, unha porcentaxe superior á do informe do 2004 (un 77%), aínda que as que existían se atopaban en bo estado xeral. Tamén é moi útil contar cun aseo público. Agora ben, só se atopou nunha rúa coruñesa. Iso si, o seu estado era óptimo e non había que pagar para facer uso del.

TÁBOA COMPARATIVA

Cidade	Limpeza e mantemento(1)	Mobiliario Urbano (2)	Sinalización, accesibilidade e seguridade(3)	Infraccións (4)	Valoración final (5)	Valoración 2004
A Coruña	Aceptable	Aceptable	Aceptable	Aceptable	Aceptable	Moi ben
Alacante	Aceptable	Aceptable	Aceptable	Regular	Aceptable	Aceptable
Almería	Regular	Mal	Bien	Moi ben	Regular	Mal
Barcelona	Regular	Mal	Bien	Bien	Regular	Mal
Bilbao	Aceptable	Aceptable	Bien	Aceptable	Aceptable	Aceptable
Córdoba	Bien	Aceptable	Bien	Moi ben	Bien	-
Granada	Aceptable	Aceptable	Regular	Bien	Aceptable	-
Madrid	Bien	Aceptable	Bien	Bien	Bien	Regular
Málaga	Regular	Aceptable	Regular	Bien	Regular	Mal
Murcia	Aceptable	Regular	Aceptable	Aceptable	Aceptable	Mal
Oviedo	Aceptable	Bien	Bien	Bien	Bien	Bien
Pamplona	Bien	Bien	Bien	Mal	Regular	Aceptable
San Sebastián	Bien	Bien	Bien	Regular	Aceptable	Bien
Sevilla	Aceptable	Aceptable	Aceptable	Moi ben	Aceptable
Valencia	Aceptable	Bien	Moi ben	Regular	Aceptable	Mal
Valladolid	Bien	Aceptable	Bien	Aceptable	Bien	-
Vitoria	Aceptable	Bien	Bien	Regular	Aceptable	Aceptable
Zaragoza	Regular	Bien	Bien	Bien	Bien	-
MEDIA	Aceptable	Aceptable	Bien	Bien	Aceptable	Aceptable

1. Limpeza e mantemento: neste apartado, analizouse o estado de mantemento no que se atopaba a rúa peonil, así como o seu pavimento, sinalización e mobiliario urbano.

2. Mobiliario urbano: comprobouse se a dotación de papeleiras, farois, bancos, sumidoiros, árbores, fontes de auga potable, etc. era a axeitada.

3. Sinalización, accesibilidade e seguridade: estudouse se existía a sinalización imprescindible nunha rúa peonil (sinais de circulación restrinxida, semáforos sonoros en caso de cruzamento, sistemas para delimitar as rúas peonís, sinal de velocidade máxima, permitida, etc.), se o mobiliario urbano, terrazas ou obras non obstaculizaban o paso de peóns, se existía algún perigo para o peón (tránsito de vehículos, pavimento con irregularidades, etc.).

4. Infraccións: observouse se había vehículos aparcados fóra do horario de carga e descarga (no caso de que existise) nas rúas peonís. Realizouse unha proba práctica, na que os técnicos da revista comprobaron se era posible circular co coche polo cento de vías peonís seleccionadas para o estudo.

5. Valoración global: Media das valoracións dos catro apartados.

Relacións deste contido