Nunha comunidade de propietarios desexan renovar os ascensores, pero hai veciños que se negan

Na miña vivenda hai catro ascensores, dous en cada escaleira, pero hai cinco anos decidimos inhabilitar dous deles polo excesivo gasto que supuñan. Agora querémolos volver pór en funcionamento e renovalos. O problema é que hai dous inquilinos dos 40 que compoñen a comunidade de propietarios que están en contra. Se se arranxan os antigos, están obrigados a pagar?

  Tanto o establecemento como a supresión dos servizos de ascensor requiren o voto favorable das tres quintas partes do total dos propietarios que, á súa vez, representen as tres quintas partes das cotas de participación. De acordo coa Lei de propiedade horizontal, os acordos adoptados (art. 17) obrigan a pagar a todos os propietarios, aínda que votasen en contra. Se no seu día suprimiron o servizo de dous ascensores e agora pensan na posibilidade de restablecelos, precisarán de novo unha maioría de tres quintas partes favorable ao acordo.

No tocante ao xeito de restablecer este servizo, xa sexa mediante a reparación ou substitución dos ascensores, convén que se valore esta decisión de acordo aos criterios técnicos e consellos da empresa e da Consellería ou do Ministerio de Industria. Dentro do concepto de reparación non entra só a corrección ou arranxo dos defectos, senón tamén as modificacións ou substitucións impostas pola necesidade técnica para o funcionamento e continuidade do servizo, e polo organismo competente de Industria, responsable de velar pola seguridade de uso. Polo tanto, se se decide reparar os ascensores estragados deben pagar todos os propietarios. E se o substitúen tamén, non sendo que dende o punto de vista técnico se acredite que non é necesario para a súa conservación e funcionamento.

Relacións deste contido