Saltar o menú de navegación e ir ao contido

EROSKI CONSUMER, el diario del consumidor

Buscador

Boletíns

| Baixa | Máis opcións |

Canles de EROSKI CONSUMER

Cambiar idioma

Outras utilidades

  • enviar a outra persoa

Os datos, informacións, interpretacións e cualificacións que aparecen nesta información corresponden exclusivamente ao momento en que se realizaron e teñen, xa que logo, unha vixencia limitada.

Canceiras: analizadas as instalacións xestionadas, contratadas ou subvencionadas en 18 capitais españolas: As canceiras ofrecen un servizo aceptable, pero precisan melloras en información e servizos

- A limpeza e a seguridade, o mellor destas instalacións.
- O abandono dun animal pódelle custar ao seu dono ata 210 euros e a adopción, 85 euros.
- Atopáronse grandes diferenzas entre unhas cidades e outras.
- Só en catro centros dos 18 visitados recoñecen sacrificar os animais.

Condicións para adoptar unha mascota e táboas comparativas

  O 40% dos animais que se abandonaron no 2008 nas 15 cidades que lle proporcionaron datos a esta revista atopou un novo fogar. A maior proporción dáse en Vitoria, onde o 91% dos animais abandonados foi adoptado por unha nova familia; en Valladolid, un 80%; e en Barcelona son tres de cada catro animais. Agora ben, estas proporcións son significativamente menores noutros lugares como Málaga e Murcia, onde se adopta só un de cada cinco mascotas abandonadas.

En tres de cada catro dos centros municipais pídese que a persoa que vaia adoptar teña un mínimo de 18 anos (unha condición que non se esixe nos albergues visitados na Coruña, Málaga, San Sebastián, Cádiz e Granada). A sinatura dun contrato onde figuran as obrigas e coidados que require ter un animal na casa así como unha licenza previa para animais catalogados como perigosos son os outros dous trámites administrativos que se seguen na maioría de adopcións de mascotas.

No 100% dos casos entrégase o animal convenientemente desparasitado, vacínase en dous de cada tres centros (non así en Valladolid, Sevilla, Alacante, Oviedo, Granada e Córdoba) e na mesma proporción colócaselle o microchip (non se fai en Valladolid, Sevilla, Alacante, Granada, Córdoba e Vitoria). A adopción non é gratuíta. Só se atoparon dous centros nos que levar un animal non custa nada: os de Murcia e Valladolid. Nas outras cidades, hai que pagar a instalación do microchip (se é que é obrigatorio e non o leva) e os servizos veterinarios que se realizaran (vacinación, esterilización, desparasitación, etc.). As tarifas, polo tanto, poden variar.

Os técnicos desta revista valoraron, tras a súa visita, a información e o trato dispensado polo persoal que os atendeu no centro de protección animal e mais a impresión acerca de como se atopan os animais alí acollidos. Traducido en notas, a media nacional da información facilitada tanto dende os Concellos como nos propios centros queda nun 'aceptable', aínda que foi moi boa en Madrid e Barcelona e boa na Coruña, Bilbao, Murcia, San Sebastián, Sevilla, Vitoria e Valencia. Os que peor información ofreceron foron os albergues de Alacante, Cádiz e Granada ('mal'), tanto pola nula información facilitada por parte do concello como polas escasas explicacións dadas polos traballadores do centro durante a visita dos técnicos, que se facían pasar por cidadáns interesados en adoptar unha mascota.

Levar un animal á casa: unha decisión meditada

Adoptar ou, no seu caso, mercar un animal de compañía implica a asunción dunha responsabilidade. Unha mascota non é un boneco, senón un ser vivo que pasa a estar ao noso cargo e que precisa unha serie de atencións. Por iso, antes de levar un animal á casa, convén responder a varios interrogantes que poden axudar a tomar unha decisión atinada:

  1. Están todos os membros do fogar de acordo en que o animal veña á casa? Ás veces, adoptar unha mascota responde a un impulso (xeralmente dun neno), sen ter en conta a responsabilidade que supón ter un ser vivo na casa ao que coidar e educar. Tamén hai que estar ao tanto de se na familia hai alguén que padeza alerxias ou asma: o pelo (concretamente, os ácaros que habitan nel) de gatos, cans, roedores e cabalos, por exemplo, pode producir alerxia.
  2. Ten tempo abondo para atender a mascota e sacala a pasear? Aos animais non lles vale como escusa que o seu dono estea canso ou anoxado. Hai que atendelos todos os días, pórlles a comida e a auga, sacalos polo menos tres veces ao día se son cans, levalos a facer exercicio, pasar un anaco con eles, etc. Entre outras cousas, convén procurarlles un ambiente de vida integrado dentro da familia, darlles unha dieta sa e facilitar que fagan exercicio físico. Por suposto, lembre que tamén nas vacacións os hai que atender.
  3. Está disposto a asumir os gastos que supón ter un animal? Terá unha serie de gastos en comida, accesorios... Ademais, os animais deben acudir á revisión co veterinario unha vez ao ano como mínimo (sen ter en conta enfermidades, operacións, tratamentos...). É un compromiso de por vida e non hai que esquecer que a lei establece obrigas, como inscribir o animal no censo da cidade, colocarlle o microchip, brindarlle a atención veterinaria necesaria e mantelo en condicións dignas. O gasto medio anual no caso dun can rolda os 400 euros, desembolso que descende á metade nun gato.
  4. Está disposto a convivir cun animal? Para que a convivencia co animal de compaña sexa un éxito é imprescindible adestralo, preferiblemente cando é un cachorro. Vivir cunha mascota supón crear e manter fortes lazos de afecto, pero tamén sentimentos negativos (por exemplo, a súa morte ou que nos anoxe co seu comportamento).
  5. Que tipo de animal quere ter na casa? Analice ben que é o que está a buscar e cales son as súas motivacións. Un can acompañarao nos seus paseos con entusiasmo, pero se é unha persoa moi caseira, é mellor un gato. Seleccione con coidado a raza, cada unha ten os seus trazos de conduta. Elixa cachorros a partir dos dous meses cumpridos, xa que antes precisan do alimento da nai. Consulte que vacinas se lle aplicaron e cales non. Antes de levalo para a casa e para coñecer o estado físico do seu novo amigo, asegúrese de que lle entregan o animal co microchip implantado e desparasitado. De non ser así, acuda canto antes a un veterinario para que o animal estea ao día coas súas necesidades de saúde.
  6. É preferible un cachorro ou un animal adulto? Non hai mellor ou peor opción. As preferencias baséanse en criterios moi persoais. Non obstante, o habitual é decantarse por cachorros porque os animais adultos adquiriron uns hábitos que poden dificultar o seu adestramento e aprendizaxe.

TÁBOA COMPARATIVA

Valoración global e por categorías dos centros de protección animal (segundo CONSUMER EROSKI)
CIDADE Infraestruturas do centro1 Servizos e coidados aos animais2 Limpeza e mantemento instalacións3
A Coruña Aceptable Ben Moi ben
Alacante Ben Aceptable Moi ben
Barcelona Moi ben Moi ben Moi ben
Bilbao Ben Moi ben Mal
Cádiz-Rota Ben Ben Ben
Córdoba Aceptable Regular Mal
Granada Aceptable Aceptable Moi ben
Madrid Moi ben Moi ben Moi ben
Málaga Aceptable Regular Moi ben
Murcia Ben Aceptable Ben
Oviedo Ben Regular Mal
Pamplona Ben Aceptable Aceptable
San Sebastián Moi ben Ben Moi ben
Sevilla Ben Ben Moi ben
Valencia Ben Aceptable Moi ben
Valladolid Aceptable Aceptable Moi ben
Vitoria Aceptable Ben Ben
Zaragoza Ben Aceptable Moi ben
Media Ben Aceptable Ben
CIDADE Seguridade das instalacións 4 Información facilitada5 Valoración global
A Coruña Mal Ben Regular
Alacante Aceptable Mal Aceptable
Barcelona Moi ben Moi ben Moi ben
Bilbao Aceptable Ben Regular
Cádiz-Rota Ben Mal Aceptable
Córdoba Ben Aceptable Regular
Granada Ben Mal Aceptable
Madrid Moi ben Moi ben Moi ben
Málaga Aceptable Aceptable Aceptable
Murcia Ben Ben Ben
Oviedo Mal Aceptable Regular
Pamplona Ben Aceptable Aceptable
San Sebastián Moi ben Ben Moi ben
Sevilla Moi ben Ben Ben
Valencia Moi ben Ben Ben
Valladolid Moi ben Aceptable Aceptable
Vitoria Ben Ben Ben
Zaragoza Moi ben Aceptable Ben
Media Ben Aceptable Aceptable

1. Infraestruturas do centro: avaliouse a dotación de habitáculos e gaiolas do centro, o horario de atención ao público, se o centro recibe razas perigosas e se conviven co resto de animais do recinto, se dispoñen de zona exterior para o paseo ou o exercicio dos animais ou se ten sala veterinaria.

2. Servizos e coidados aos animais: trátase dun dos apartados máis importantes; nel tomáronse en conta os controis sanitarios que realizan, a frecuencia na alimentación das mascotas, se as gaiolas eran amplas ou os animais non se atopaban atados e mais a dotación de persoal ao cargo destes animais domésticos abandonados.

3. Limpeza e mantemento: comprobouse a limpeza de habitáculos e zonas comúns (así como a súa frecuencia), amais da temperatura, luminosidade, amplitude e mantemento do centro de protección de animais abandonados.

4. Seguridade das instalacións: os técnicos da revista comprobaron se o centro tiña un valado correcto, se había cámaras de seguridade, vixiantes durante a noite, así como todo tipo de medidas para a extinción de incendios.

5. Información facilitada: tívose en conta a información e axuda facilitada tanto polo Concello como polos responsables do propio centro. Amais do interese e disposición dos empregados desta instalación en amosar a zona (os técnicos da revista acudiron como cidadáns interesados en adoptar unha mascota).

Animais recollidos, abandonados e adoptados durante o 2008 nas cidades analizadas
Cidade Animais recollidos no 2008 Evolución animais recollidos 2007-2008 Animais recollidos por día no 2008 Animais abandonados no 2008
A Coruña 899 -3,95% 2,46 788
Alacante Non facilitado Non facilitado Non facilitado Non facilitado
Barcelona 2.103 10,35% 5,76 1.522
Bilbao 851
  • -1,7% (perros)
  • 14% (gatos)
 2,33 707
Cádiz(1) Non facilitado Non facilitado Non facilitado Non facilitado
Córdoba 4.392 -8,40% 12,03 4.125
Granada Non facilitado Non facilitado Non facilitado Non facilitado
Madrid 5.222 -10% (perros)
14,6% (gatos)		 14,31 4.119
Málaga 3.004 18,38% 8,23 3.004
Murcia 4.979 -8% 13,64 3.126
Oviedo(1) 1.150 5% 3,15 1.150
Pamplona(1) 592 0% 1,62 536
San Sebastián(1) 748 1,90% 2,05 748
Sevilla 1.740 20% 4,77 1.919
Valencia 3.388 -9,60% 9,28 3.240
Valladolid 816 0,80% 2,24 506
Vitoria(1) 1.599 1% 4,38 1.599
Zaragoza 1.628 -0,70% 4,46 1.302
TOTAL 33.111 - 90,72 28.391
Cidade Animais abandonados no 2008 por día Animais adoptados no 2008 % de adopción no 2008 (2)
A Coruña 2,16 267 34%
Alacante Non facilitado Non facilitado Non facilitado
Barcelona 4,17 1.141 75%
Bilbao 1,94 416 59%
Cádiz(1) Non facilitado Non facilitado Non facilitado
Córdoba 11,30 1.473 36%
Granada Non facilitado Non facilitado Non facilitado
Madrid 11,28 1.481 36%
Málaga 8,23 574 19%
Murcia 8,56 631 20%
Oviedo(1) 3,15 340 30%
Pamplona(1) 1,47 121 23%
San Sebastián(1) 2,05 493 66%
Sevilla 5,26 938 49%
Valencia 8,88 1.091 34%
Valladolid 1,39 406 80%
Vitoria(1) 4,38 1.461 91%
Zaragoza 3,57 587 45%
TOTAL 77,78 11.420 40%

1. Os centros de Oviedo, Cádiz, San Sebastián e Vitoria danlle servizo a toda a provincia e o de Pamplona, á Mancomunidade de Pamplona.

2. Porcentaxe de adopcións: a proporción de adopcións en relación ao número de abandonos.

Prezo por abandonar un animal no Centro de Protección
Cidades Prezo polo abandono do animal no refuxio
A Coruña 49,06 euros (inclúe recollida, transporte e, se cómpre, incineración)
Alacante Non facilitado
Barcelona Non é posible abandonalo no refuxio
Bilbao Entre 74,95 e 142,65 euros (cans) e entre 64,25 e 107 euros (gatos)
Cádiz Non facilitado
Córdoba Gratuíto
Granada Non facilitado
Madrid 32,75 euros
Málaga Gratuíto
Murcia Gratuíto
Oviedo Gratuíto
Pamplona 50 euros
San Sebastián 210 euros (aínda que se o dono non pode pagalo, admítese igual o animal)
Sevilla Gratuíto
Valencia Non é posible abandonalo no refuxio
Valladolid Gratuíto
Vitoria 86,70 euros (adulto) e 24,77 euros (cachorro)
Zaragoza Gratuíto (de se pedir a eutanasia, 17,95 euros)
Prezo por adoptar un animal no Centro de Protección
Cidades Prezo por adoptar un animal
A Coruña 52,57 euros (identificación, vacina e desparasitación)
Alacante Non facilitado
Barcelona 30 euros (identificación e servizos sanitarios)
Bilbao Gratuíto
Cádiz Non facilitado
Córdoba 18 euros (microchip e desparasitación)
Granada Non facilitado
Madrid 24 euros (microchip e vacina)
Málaga 41,71 euros (identificación e vacinación antirrábica)
Murcia Gratuíto
Oviedo 45 euros aproximadamente (microchip e vacinas)
Pamplona 10 euros (taxa por adoptar o animal)
San Sebastián 85 euros (cans: microchip+vacina+esterilización); 65 euros (gatos: só esterilizar)
Sevilla 36,78 euros (microchip, vacina e cartilla)
Valencia 40 euros
Valladolid Gratuíto
Vitoria 24,99 euros (microchip)
Zaragoza Segundo os servizos veterinarios

Paginación

Recursos desta páxina

Validaciones desta páxina

  • : Conformidad co Nivel Triplo-A, das Directrices de Accesibilidad para o Contido Web 1.0 do W3C-WAI
  • XHTML: Validación do W3C indicando que este documento é XHTML 1.1 correcto
  • CSS: Validación do W3C indicando que este documento usa CSS de forma correcta
  • RSS: Validación de feedvalidator.org indicando que os nosos titulares RSS teñen un formato correcto