A Universidade na encrucillada

Respostas ás preguntas máis frecuentes sobre o proceso de Bolonia

  Como calquera outro cambio a grande escala ou reforma estrutural, o auspiciado pola Declaración de Bolonia xerou suspicacias e dúbidas, focalizadas nun principio en sectores estudantís e académicos vinculados con titulacións que ven perigar a súa continuidade, en especial algunhas filoloxías ou disciplinas como Historia da Arte, pero que se espallaron a ámbitos máis amplos. Velaquí as respostas que tanto as propias universidades como o Ministerio de Educación están a dar ás preguntas máis comúns que orixina a adaptación ao marco europeo:

Que sucederá coa validez dos títulos actuais?

Os títulos actuais non perderán valor nin oficialidade fronte aos adaptados. As súas competencias profesionais non cambiarán, aínda que se modifique a estrutura das titulacións e dos títulos. Así consta no Real Decreto de Ordenación de Ensinanzas Universitarias, aprobado en outubro do 2007 e que foi o texto que fixou as bases para que as universidades españolas comezasen a adaptar as súas ensinanzas ao novo Espazo Europeo de Educación Superior (EEES).

Afectará o Espazo Europeo de Educación Superior aos actuais estudantes universitarios? Será posible cambiarse dun curso do plan antigo a un curso de Grao do Plan Bolonia?

Os estudantes poderán continuar co mesmo plan de estudos co que iniciaran a súa carreira. Polo tanto, os universitarios actuais poderán rematar o plan de estudos que empezaron sen que iso leve consigo ningún tipo de variación na súa estrutura, contidos ou desenvolvemento. En calquera caso, os estudantes que comezaran estudos conforme a anteriores ordenacións universitarias poderán tamén acceder ás novas ensinanzas previa admisión pola Universidade correspondente, de acordo co establecido no RD 1393/2007 e na normativa da propia Universidade.

Todos os Graos terán unha duración de 4 anos?

O certo é que non todos os Graos durarán 4 anos. Determinadas ensinanzas reguladas por directrices europeas deben contar cun número maior de créditos. Titulacións como Medicina (360 ECTS), Veterinaria (300 ECTS) e Arquitectura (300 ECTS + Traballo de Fin de Grao) requiren un número superior de créditos polo que se dilatan máis no tempo.

Haberá que estudar un Máster para acceder ao mercado laboral?

Nos máis dos casos non será así. A titulación de Grao permite obter unha preparación axeitada e abonda para o exercicio profesional. Aínda que é certo que existen másteres que son necesarios para habilitar o estudante no exercicio dunhas determinadas actividades profesionais reguladas en España. Son os casos da avogacía, das enxeñerías superiores e do profesorado de ensinanzas de secundaria.

Desaparecerán as bolsas e serán substituídas por empréstitos para financiar os estudos?

Bolonia non fixa criterio ningún con respecto ás bolsas. Os empréstitos-renda, creados xa no 2007, son un concepto diferente ás bolsas actuais e o máis importante é que non as van substituír. Permítenlle ao estudante que non poida solicitar unha bolsa porque supera o mínimo de renda pagar os seus estudos de Máster, a xuro cero devolvendo o préstamo cando xa estea traballando.

Relacións deste contido