Ofrécenlle unha indemnización moi pequena pola perda da equipaxe

A miña parella e mais eu contratamos un voo de ida e volta para unha semana de vacacións, pero as maletas non chegaron. Así que ao día seguinte mercamos algo de roupa, toallas de praia, traxes de baño, o que precisabamos para gozar desa semana. Pola noite entregáronnos as maletas e agora ofrécenme unha indemnización irrisoria. Podo reclamar todos os gastos?

  Se se produce un extravío da equipaxe, convén presentar de inmediato unha protesta ante a compañía aérea, cumprindo para iso o Parte de Irregularidade de Equipaxe (PIR), do que haberá que conservar unha copia. De apareceren as maletas, cómpre redactar unha segunda reclamación pola demora e polos danos causados antes de que transcorran 21 días dende a entrega da equipaxe. Se a persoa seguiu estes pasos e a resposta que recibiu non lle parece satisfactoria, pode intentar negociar un acordo insistindo nos prexuízos, acreditados con facturas. En caso de que non se chegue a un acordo e se recorra á vía xudicial, terá que presentar a súa demanda ante os Xulgados do Mercantil no prazo de dous anos dende a chegada do seu voo.

Para fixar a indemnización, o sistema resarcitorio baséase nunha cantidade fixa por unidade de peso extraviada (17 euros por quilo), co tope máximo dos 1.000 Dereitos Especiais de Xiro (DEX), unidade utilizada no Convenio de Montreal sobre tráfico aéreo de pasaxeiros que equivale a uns 1.200 euros.

Esta cantidade poderíase obter no suposto máis grave dos legalmente previstos, pero cando o dano causado é moito menos grave, como o atraso dun día na entrega da equipaxe, a indemnización será menor, pero debe ter en conta tamén os prexuízos sufridos.

Relacións deste contido