Uns amigos pídenlle que lles avale un crédito persoal

Unha amiga íntima e mais o seu mozo pedíronme que lles afiance un crédito persoal ante o banco. Tamén me propuxeron que un familiar del avale o préstamo a canda min. Que riscos asumo?

  En termos xerais, a fianza é unha ferramenta de garantía pola que se obriga a asumir a conta pendente en caso de que os debedores principais deixasen de pagar as cotas pactadas. Tamén convén ter en conta que o fiador que acaba pagando pode reclamarlle o pagado á persoa que solicitou o préstamo.

Nos empréstitos bancarios fíxase que a entidade poderá requirir o impagado ao fiador sen que este se poida opor, aínda que alegue a existencia de bens dos debedores principais, dado que nas condicións das pólizas de empréstitos persoais se inclúe a renuncia a esta posibilidade.

En caso de dúbidas, aconséllase que debedores e fiadores lle soliciten información a un avogado para coñeceren os seus dereitos e obrigas. En caso de que a relación dos debedores non estea consolidada, as posibilidades de que se produzan desacordos sobre quen ou en que porcentaxes se seguirán atendendo as cotas do empréstito aumentan. Este tipo de desavinzas poden acabar prexudicando ao fiador.

No tocante á posibilidade de dous fiadores, supón un aumento das garantías para o banco que, en caso de non pagamento, poderá dirixirse polo total da débeda indistintamente contra calquera dos fiadores ou contra os dous á vez.

Relacións deste contido