Saltar o menú de navegación e ir ao contido

  • Bienvenido (ES) | Ongi etorri (euskarazko bertsioa) | Benvingut (versió en català) | Benvido (versión en galego)
  • Bienvenido (ES)
  • Boletines
    •  | Baixa  | Máis opcións |
  • Portadas anteriores

EROSKI CONSUMER, el diario del consumidor

Buscador

logotipo de fundación

Canles de EROSKI CONSUMER


Estás na seguinte localización: Portada > Edición impresa > Alimentación

Λ

A remolacha vermella | As calorías da froita | Dieta hipocalórica equilibrada | Propiedades das batatas | Alimentos contra as náuseas do embarazo

A despensa: a remolacha vermella

  O verán é unha das tempadas propicias para enriquecer a dieta con froitas e hortalizas antioxidantes, doadas de identificar polas súas rechamantes cores. A remolacha é un destes vexetais ricos en antocianinas, pigmentos con calidades antioxidantes e responsables da súa rechamante cor vermella intensa con tinguiduras granates. A este valor nutritivo súmase a escasa achega enerxética (o seu maior peso é auga) e mais o seu contido en fibra e vitaminas, como os folatos, recomendados para os rapaces na idade de medrar e para as mulleres embarazadas en pleno verán. Os folatos interveñen na produción de glóbulos vermellos e brancos, na síntese de material xenético e na formación de anticorpos. A súa achega axeitada prevén malformacións do tubo neural no futuro bebé, como a espiña bífida, que pode carrexar a invalidez física e/ou mental permanente. As follas da remolacha tamén se poden aproveitar para mesturalas con outras verduras no puré ou nas ensaladas, e son ricas en betacaroteno (provitamina A) e minerais como o ferro e o calcio. Estes minerais, xunto co potasio e o iodo, tamén forman parte da remolacha.

Máis ca na ensalada

Aínda que a remolacha se pode mercar ao longo de todo o ano cocida en conserva, o verán é a mellor época para degustar a maior concentración de sabor e nutrientes da remolacha fresca.

Os exemplares lisos, firmes, redondos, carnosos e de cor vermella intensa, mellor se aínda ten follas verdes, son os de mellor calidade e os máis frescos. As súas calidades mantéñense case intactas entre dúas e tres semanas se se conservan no frigorífico.

Entre as receitas máis apetitosas para degustar este nutritivo vexetal durante o verán destacan as seguintes: ensalada de remolacha con cenoria, tomate, millo cocido e tacos de queixo; ensalada rusa con remolacha; con endivias e salsa rosa; sopa fría de remolacha (unha especie de gazpacho refrescante); un dixestivo de mousse de remolacha como entrante ou cortante (aperitivo entre prato e prato); ou gornición de remolacha e pataca asada, entre outras.

É conveniente que a remolacha se engada un minuto antes de presentar o prato, non antes. Deste xeito evítase que o resto dos ingredientes se tingan de vermello.

Menú tipo: Hipocalórico equilibrado (1.500 Kcal aprox.)

  • Almorzo: Pan integral con sésamo untado de tomate, unhas pingas de aceite e xamón montañés magro. Infusión ou café con leite desnatado. Un kiwi, unha tallada de sandía ou un zume dunha laranxa e medio limón.
  • Petisco d media mañá: Minisándwich de atún ao natural e vexetais. Abundante auga durante a mañá.
  • Xantar: Gazpacho. Coroa de arroz integral (dous cazos rasos) con pisto (opcional: tacos de pavo á prancha). Iogur desnatado.
  • Merenda: Té xeado con limón. Espeto de melón, mazá e pexego. Abundante auga durante a tarde.
  • Cea: Unha boa cunca de ensalada de tomate, remolacha, cenoria, millo, endivias en xuliana, media mazá, ovo duro relado, tres noces en cachos, esparexer sementes de sésamo. Iogur desnatado.

O consello: Petiscar nos momentos de fame alimentos lixeiros de azucres e graxas como os xeados caseiros elaborados con froitas batidas (polo natural de amorodos batidos, xeado de iogur desnatado e plátano batido); froita fresca torada con dados de queixo fresco; zumes naturais de froita de tempada (de sandía, melón, mazá ou cenoria, cos que tamén se poden preparar refrescantes e saudables refrescos xeados) ou infusións frías como o té con limón. Se se toma arroz, pasta, patacas ou legume na comida, recoméndase prescindir do pan.

O dato: 120-200 gramos.

  É o peso equivalente a unha porción saudable de froita fresca. Recoméndase comer tres porcións diarias. A cantidade máis pequena resérvase para as froitas que concentran máis azucres (algo máis de 10 g/100 g de froita) e calorías como o plátano (20 g/100 g), as uvas (15-17 g/100 g), o caqui ou pau santo, os figos, as cereixas, as ameixas e a granada. A maior cantidade recoméndase para o resto de froitas que teñen máis auga na súa composición, como a sandía e o melón, que son as menos enerxéticas.

Consultorio

 

Hai algún alimento que alivie as náuseas dos primeiros meses de embarazo?

  O 75% das mulleres embarazadas sofren estes síntomas durante as primeiras semanas. O substancial incremento de hormonas femininas, como os estróxenos e a gonadotropina coriónica, é a explicación fisiolóxica deste malestar común e pasaxeiro.

En situacións extremas, nas que apenas se poida comer, hai que acudir ao médico para que prescriba algún medicamento. No resto dos casos, o mellor tratamento baséase en probar distintos alimentos e ser conscientes de que, aínda que son momentos desagradables, son pasaxeiros. En xeral, toléranse mellor os alimentos sólidos e algo pastosos como o pan torrado ou as galletas, e os que son suaves de sabor e olor.

É normal que as náuseas se sintan a primeira hora da mañá, despois de estar tantas horas durante a noite sen comer nada. Por iso aconséllase comer algo sólido na cama e erguerse con moito coidado.

Consellos dietéticos contra as náuseas:

  • Pode consumir comprimidos ou cápsulas de xenxibre ("Zingiber officinale"). Demostrou ser un remedio efectivo para reducir a frecuencia dos vómitos durante o embarazo.
  • Minutos antes de erguerse, tome unha galleta, unha torrada ou unha manchea de froitos secos e pasas que deixara na mesiña de noite. O exceso de salivación, sialorrea, que aparece polas mañás como consecuencia do xaxún favorece as náuseas. Esa sensación pódese aliviar se se come algo antes de erguerse e cambiar de postura.
  • As primeiras tomas para o almorzo serán moi pequenas en cantidade. Pódese fraccionar o almorzo en tres tomas ao longo da mañá.
  • O cheiro de certos alimentos, como pode ser o café, tan apetitoso días antes, pode causar náuseas. Nese caso, substitúa o café por infusións suaves ou tome iogur ou queixo no canto de leite.
  • Polo mesmo motivo, evite cociñar pratos que desprendan moito olor (coliflor, lentellas ou estufados) mentres continúen as náuseas.

Que propiedades teñen as batatas e que pratos se poden preparar con eles?

  A batata é coñecida por distintos nomes: batata, moniato, camote ou pataca doce. A súa particularidade nutritiva radica no contido en hidratos de carbono, lixeiramente superior á pataca (23 g por 100 g, fronte aos 15 g na pataca), e na súa maior proporción de azucres (10 veces superior), o que explica o seu particular sabor doce. Destaca pola súa achega en fibra (3 g/100 g), en especial cando se come coa pel moi ben lavada. Das vitaminas hai que subliñar a achega de vitamina C (25 mg/100 g), ácido fólico (52 mcg/100 g; o triplo ca na pataca), vitamina E (4 mg/100 g) e o betacaroteno, precursor da vitamina A (4000 mcg/100 g), máis abundante nas batatas de carne amarela intensa ou laranxa.

Con cen gramos de batata cóbrese case a metade dos requirimentos de vitamina C, un terzo da vitamina E, unha cuarta parte do ácido fólico e supéranse as necesidades de carotenoides. Todos eles (agás o ácido fólico) teñen unha función antioxidante, o que contribúe á prevención das enfermidades cardiovasculares e do cancro. Este tubérculo é ademais unha boa fonte de potasio, fósforo e magnesio.

O inconveniente é que contén oxalatos, que se poden combinar co calcio e formar cálculos no ril ou na vesícula. Por iso, nestes casos non se recomenda o seu consumo habitual. Por outra banda, se sempre se come fritido, resulta moi enerxético e indixesto. As receitas de cociña que se poden elaborar a partir da batata son numerosas, como a crema de batata doce, a batata en papillote, batata salteada con verduras ou guiso de batata con verduras e polo ao curry. Estas receitas e outras máis pódense consultar en http://www.consumer.es/alimentacion/recetas/.


Outros servizos


Buscar en

Información de Copyright e aviso legal

Visita nuestro canal Eroski Consumer TV

En EROSKI CONSUMER tomámosnos moi en serio a privacidad dos teus datos, aviso legal. © Fundación EROSKI

Fundación EROSKI

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto