Os propietarios dos baixos tamén deben custear o pagamento do ascensor e do seu mantemento

 Unha comunidade acordou por maioría de tres quintos a instalación de dous ascensores a cargo de todos os propietarios, incluídos os das vivendas baixas, así como a exoneración dos gastos de reparación, substitución e mantemento ao dono do local ao que ía afectar a súa colocación. Pero a propietaria dunha das vivendas baixas demandou a comunidade e solicitou a nulidade de ambos os dous acordos para non ter que contribuír ao gasto. Non obstante, perdeu o xuízo. O Tribunal Supremo, en sentenza de decembro do 2008, confirmou a validez dos dous acordos e argumentou que non precisan a unanimidade para ser efectivos. Citou a norma específica que regula a instalación do servizo de ascensor, co engadido de que a súa interpretación se debe efectuar de acordo coa realidade social do tempo en que vaia ser aplicada (artigo 3 do Código Civil) e as normas sobre nova construción esixen a súa existencia cando nun edificio se elevan tres ou máis andares, e, con referencia a terreos antigos, á parte de satisfacer as necesidades de persoas minusválidas, é un elemento que redunda no beneficio, sen excepción, dos propietarios dun inmoble, tanto en benestar material como no valor do terreo no seu conxunto.

Relacións deste contido