Anula a viaxe en cruceiro e o seguro contratado un mes antes do seu inicio, pero só lle devolven unha parte dos cartos adiantados

Logo de contratar nunha axencia de viaxes un cruceiro para as vacacións de toda a familia e mais un seguro ante a posibilidade de que xurdise un imprevisto, arrepentinme. Por iso, un mes antes da saída anulei a viaxe e informei da anulación como correspondía á axencia e á aseguradora enviándolles toda a documentación. A axencia devolveume o 50% dos cartos e o seguro, o 30%. Como considero que me deben devolver a totalidade do diñeiro que lles adiantei, iniciei unha reclamación. Non obstante, a aseguradora remíteme a outras oficinas no estranxeiro e dende alí non me contestan. Non sei onde me dirixir, xa que, ata dende o Ministerio de Economía, me invitan a que traslade as miñas queixas ás oficinas no estranxeiro.

  O texto refundido da Lei de consumidores e usuarios di, en relación ás viaxes combinadas, que o consumidor poderá anular os servizos contratados, con dereito á devolución das cantidades aboadas, sempre que se indemnice ao organizador nos seguintes supostos:

• O cliente é responsable de aboar os gastos de xestión e de anulación.
• A penalización que se lle impón é do 5% do importe total da viaxe se a cancelación se efectúa con máis de dez e menos de quince días de antelación á data de inicio; do 15% se se produce entre os días tres e dez, e do 25% se o fai nas corenta e oito horas anteriores á saída. No caso de non acudir á viaxe e non avisar con antelación, o usuario afrontaría o pagamento do importe total.
• Sempre que a viaxe combinada estivese suxeita a condicións económicas especiais de contratación, tales como o frete de avións, buques ou tarifas especiais, os gastos de cancelación estableceranse de acordo coas condicións acordadas entre as partes.

Neste caso non hai por que pagar unha penalización, aínda que si lle corresponde ao afectado aboar os gastos de cancelación. Pero antes debería ler o contrato e solicitarlle á axencia e por escrito unha aclaración sobre os cálculos practicados para descontar o 50% do importe total e a súa xustificación. Por outra banda, o seguro cobre a totalidade da multa cargada ao consumidor ata chegar ao importe máximo indicado na póliza, aínda que en caso de renuncia á viaxe por enfermidade se descontaría o 20% do total da multa, non do custo da viaxe. Se se verifica este último suposto, recoméndase reclamarlle ao seguro a corrección á alza da súa indemnización. Tamén se pode acudir a unha Oficina de Información ao Consumidor para a tramitación e coordinación das dúas reclamacións e, en última instancia, para optar á celebración dun xuízo verbal.

Relacións deste contido