Viaxar: perdas e danos na equipaxe: Adeus maletas, adeus

Avión

• Se a chegada da súa maleta se atrase, cubra un Parte de Irregularidade de Equipaxe (PIR) e efectúe, se cómpre, unha segunda protesta nos 21 días seguintes á data na que a debería recibir, reclamando unha compensación. O máximo da indemnización é de 1.160 euros.
• Se foi vítima do roubo de artigos do interior da súa maleta, denúncieo na policía do aeroporto, e encha o PIR coa descrición dos obxectos subtraídos, amais de tramitar, se procede, unha segunda protesta nos sete días seguintes.
• A compañía aérea non se fai responsable de rodas e asas rotas, nin de cortes e golpes. Só admite a súa responsabilidade sobre estragos maiores.
• Reclame, se é o caso, por danos morais relacionados cos trastornos que lle causou a perda da equipaxe ou o roubo do seu contido.

Autobús

• Se a equipaxe se perde ou deteriora, a empresa transportista indemnizarao cun máximo de 14,50 euros por quilogramo. Como o habitual é descoñecer o peso das maletas, adóitase fixar arredor de 20-30 quilos.
• Se a súa maleta contén obxectos de valor, solicítelle á compañía un aumento da responsabilidade. Saiba que lle custará un pagamento extra.
• A equipaxe de man é responsabilidade do viaxeiro, salvo cando ao quedar baleiro o vehículo e coas portas abertas se produce un roubo. Nese caso, os criterios de indemnización son os mesmos que coa equipaxe do maleteiro.

Tren

• Verifique que pode facturar as súas maletas.
• Se non se pode, saiba que a compañía ferroviaria só se fai responsable dos danos e roubos que sofre a equipaxe facturada. Dos de man, non.
• Nos incidentes coas maletas facturadas, a compensación económica é de 14,50 euros por quilo que falte ou se dane, ata un máximo de 600 euros por viaxeiro.