EN IMAXES: Hortas de sol

Pasear por unha horta solar é facelo á sombra de inmensos paneis distribuídos de xeito cartesiano nunha grande explanada erma. Entre os corredores reina o silencio absoluto e o instinto empurra a ollar para o ceo na procura do sol. Os seus raios non se ven pero sábese que quedan atrapados na alfombra artificial e xiratoria que conforman os seguidores. Neles transfórmase a enerxía solar en enerxía eléctrica. Este proceso acádase sen xerar residuos e mediante un medido impacto ambiental -paisaxístico sobre todo-. Trátase dunha nova tecnoloxía que precisa aínda de numerosas hectáreas para conseguir os vatios destinados á rede eléctrica xeral; a rendibilidade calcúlase a longo prazo e son necesarias axudas públicas para renovar o sistema. Pero a humanidade inaugura o século XXI sabendo como recoller a enerxía que ofrece o sol todos os días.

  
Ruben García Blázquez

A luz que move electróns

O Sol envía á Terra enerxía luminosa a xeito de fotóns, partículas portadoras da radiación electromagnética capaces de xerar o efecto fotovoltaico. Ao impactaren sobre a superficie de cada unha das celas dos paneis solares, os electróns do silicio que as conforman excítanse e escapan da súa posición, producindo unha enerxía que circula a xeitode electricidade. As celas conéctanse entre si nun circuíto en serie, o que aumenta a súa tensión.

  
Ruben García Blázquez   
Ruben García Blázquez

Seguidores do sol da alborada ao solpor

Ancoradas sobre unha columna, as estruturas horizontais poden chegar aos oitenta metros cadrados e, malia aos seus 1.700 quilos, móvense seguindo o movemento do sol. A superficie non supera temperaturas de 25 graos centígrados e está preparada para aturar ventos de 80 quilómetros á hora. A enerxía discorre en paralelo nos módulos que a conducen cara ao inversor.

  
Ruben García Blázquez   
Ruben García Blázquez

Inversores de continua a alterna

Na coroa da columna a alta tecnoloxía materialízase en tarxetas de control que inverten a corrente de natureza continua a alterna. Esta modificación é necesaria para que a enerxía se integre inmediata e directamente na rede eléctrica.

  
Ruben García Blázquez

Contadores e mantemento

Disposta entre grupos de oito terrazas reflectintes atópase unha caseta de contadores para cada un dos seguidores solares. É alí onde se rexistran os quilovatios xerados e enviados á rede. A actividade non depende da calor e nin sequera das horas de sol, senón da radiación solar que alcanza os paneis. Unha horta de 800 seguidores do sol dá xerado unha media de 14,28 quilovatios á hora anuais. É dicir, a enerxía necesaria para o consumo de 6.500 fogares. Os estudos aseguran que evita a emisión de 13.000 toneladas de dióxido de carbono (CO2), o que equivale ao traballo depurativo que se lograría cunha fraga de oitocentas mil árbores.

  
Ruben García Blázquez

Subestación eléctrica

A poucos metros da horta solar érguese unha subestación eléctrica que adapta o nivel de tensión para inxectar a electricidade xerada na rede xeral. O usuario non percibe ningún cambio no servizo eléctrico que recibe, pero sabe que cada quilovatio que produce o xerador fotovoltaico é un menos que xerarán as centrais contaminantes.

  
Ruben García Blázquez

Hortas en edificios

Na busca do desenvolvemento sostible e para apoiar as fontes limpas de enerxía, o Código Técnico da Edificación aprobado no 2006 e modificado no 2007 obriga a instalar paneis solares nos edificios novos. Non se trata de xeradores de enerxía fotovoltaica senón termoeléctricos: utilizan a radiación do sol para acadar auga quente sanitaria. Tamén cabe a posibilidade de trasladar a tecnoloxía das hortas aos edificios. Varía a súa escala e a produción, pero o sistema está igualmente conectado á rede en paralelo e a electricidade producida véndese tamén á rede. Estímase que este tipo de infraestruturas teñen unha vida útil de 30 anos sempre que se realicen os labores de mantemento preventivo e correctivo estipulados.

  
Ruben García Blázquez

Outras fotorreportaxes que che poden interesar

• A cereixa: algo máis ca un froito
• Mercadorías que voan
• Sobre os alicerces da palabra
• Esquí alpino adaptado: reto e sacrificio vestidos de branco
• O camiño da electricidade
• A viaxe dun bo desexo
• O ensino musical: unha sinfonía de catro movementos
• A cidade flotante do transporte
• Un bocado con suspense
• Un caramelo esculpido no corazón do Pirineo
• Cultivo de rosas, a paisaxe máis impresionista
• Labregas do mar
• Como se reciclan os aparellos eléctricos?
• Recunchos de vida
• A receita da eterna xuventude
• Iluminar máis para ver menos
• De alimento básico a manxar de reis
• Unha luz na escuridade
• A pel da devesa
• Ocaso e esplendor nos humedais
• Moito máis ca apagar lumes
• Ir por la e saír rapada
• O mar entre catro paredes
• Operación: a viaxe da arte
• Unha xornada nunha estación de esquí