Un veciño leva o seu Concello aos tribunais polo elevado nivel de ruído dos servizos de limpeza

 Un cidadán púxolle unha reclamación ao seu Concello polos niveis de ruído que sufría no seu domicilio por mor do servizo de limpeza viaria cada domingo dende as 6:30 h ata as 8-8:30 h. Como o Concello non comezou ningunha actividade para reducir os ruídos, acudiu aos tribunais e alegou a vulneración do seu dereito á inviolabilidade do domicilio, o dereito á intimidade e á integridade física durante máis de dous anos. No xuízo probouse que o servizo consistía na limpeza mediante máquinas varredoras -que producen ruído co seu sistema de aspiración- e cun camión cisterna ao que se adapta unha mangueira moi ruidosa. O Tribunal Supremo, en sentenza do 26 de novembro do 2007, ditaminou que escoller a solución máis económica por parte das administracións públicas non só é posible, senón aconsellable, pero non cando esa elección supoña pór en risco a saúde ou a intimidade do domicilio dos cidadáns. Coida, xa que logo, que se produciu a vulneración do dereito á intimidade domiciliaria, de acordo ao artigo 18 da Constitución. Por iso, condena o Concello a indemnizar o afectado con 10.000 euros.

Relacións deste contido