Contratan unha estancia nun hotel de cinco estrelas e alóxanos nun de categoría inferior

 Un matrimonio contratou e pagou a través dunha axencia de viaxes unha estancia nun hotel de cinco estrelas. Agora ben, ao chegaren constataron que o establecemento era de catro estrelas. Dado que pagaran por unha categoría superior, tramitaron unha reclamación na axencia de viaxes almacenista. O caso chegou aos tribunais e, en sentenza do 6 de novembro do 2007, o xulgado do mercantil de Oviedo condenou a axencia de viaxes a indemnizar os usuarios con 900 euros, xa que no catálogo e mais na publicidade se especificaba que o hotel era de cinco estrelas. Mesmo se revelou que con anterioridade xa se realizaran outras reclamacións polo mesmo motivo, o que para o Xulgado reforzaba a credibilidade dos demandantes e obrigaba a que a demandada advertise desta circunstancia aos clientes co fin de que valorasen a oportunidade de efectuar a contratación ou ben se decantasen por outro dos hoteis ofertados.

Relacións deste contido