Un veciño quere saber como se calcula a cota de participación nunha comunidade de veciños

Gustaríame saber cal é a cota de participación que lle corresponde a cada veciño na miña comunidade. Dos datos da Declaración de Obra Nova comprobei que o cálculo para a obtención do coeficiente de cada vivenda non é correcto, xa que vivendas con máis superficie ca a miña teñen menor coeficiente. Que podo facer para corrixir eses coeficientes? Quen os confecciona? A quen podo reclamar?

  O artigo 5 da Lei de propiedade horizontal di que no título se fixará a cota de participación que lle corresponde a cada piso ou local, determinada polo propietario único do edificio ao iniciar a venda de pisos, por acordo de todos os propietarios, por laudo ou por resolución xudicial. Para a súa fixación tomarase como base a superficie útil de cada piso ou local, en relación co total do inmoble, a localización interior ou exterior, a situación e mais o uso que se coida que se vai efectuar dos servizos ou elementos comúns. Neste caso, están sinalados no título polo promotor-vendedor, propietario único do edificio no seu día. Para corrixir os coeficientes pódeselle propor á Xunta de propietarios que lle solicite a un técnico -arquitecto ou aparellador- un informe sobre a oportunidade de corrixilos e, de ser así, pódense propor novos coeficientes adaptados á realidade arquitectónica. Así que dispoñan deste informe, poderán votalo na seguinte Xunta, aínda que se requirirá o voto unánime dos propietarios para realizar o cambio. En caso de non o obter, hai que consultar cun avogado a conveniencia de acudir aos Tribunais.

Relacións deste contido