O banco non me concede o crédito e podo perder a metade do sinal

Hai un tempo asinei un contrato de reserva de vivenda, pero agora que se achega o momento de asinar o contrato definitivo o banco non me concede a hipoteca. Xa me resignei a non mercar a casa, pero o contrato especifica que de se botar atrás ela a promotora débeme devolver os cartos máis xuros, mentres que de renunciar eu perdo 3.000 euros, a metade do que entreguei. Podería impugnar a cláusula?

  Segundo o texto refundido da Lei de consumidores, considéranse cláusulas abusivas as estipulacións non negociadas de xeito individual que, en contra das esixencias da boa fe, causen, en prexuízo do consumidor e usuario, un desequilibrio dos dereitos e obrigas das partes que se deriven do contrato. E especifica a Lei que son abusivas, entre outras, as cláusulas que determinen a falta de reciprocidade no contrato, así como as que supoñan a retención de cantidades aboadas polo consumidor e usuario por renuncia, sen contemplar a indemnización por unha cantidade equivalente de se botar atrás o empresario, e mais a imposición dunha indemnización desproporcionadamente alta ao consumidor que non cumpra as súas obrigas. A consecuencia do carácter abusivo é que serán nulas de pleno dereito.

Neste caso hai que ter en conta que declarar nula a modalidade de cálculo da penalización que se lles impón ás partes non significa que non vaia haber penalización ningunha para o consumidor, nin tampouco que se vaia impor automaticamente unha penalización baseada no pagamento dos xuros por igual para ambas as dúas partes. Un contrato debe ser cumprido e, en caso de incumprimento, a Lei -en ausencia de pactos válidos no contrato para regular as súas consecuencias- establece o pagamento das perdas e danos reais que acredite a parte prexudicada. Por iso é conveniente notificar o seu desistimento de xeito fidedigno e procurar un acordo coa promotora para reducir a penalización. En caso de non o conseguires, hai que valorar mediante un avogado a posibilidade de ir a xuízo.

Relacións deste contido