Os operarios dunha compañía aérea axudan a embarcar unha persoa minusválida de xeito inadecuado

O pasado verán viaxei en avión co meu irmán minusválido. Antes de comezar a viaxe xa lle advertira á compañía que un de nós precisaba axuda para embarcar, polo que paguei o billete en concepto de "prioridade de embarque". Dous empregados embarcaron o meu irmán e erguérono a pulso nunha pequena cadeira especial de rodas pola empinada e alta escaleira de acceso ao avión. Gustaríame saber cales son os dereitos específicos dos usuarios en cadeira de rodas no momento de embarcar ou desembarcar do avión e en que medida os consumidores poderiamos obrigar ás compañías aéreas ou a Aena para que aumentasen os protocolos de seguridade no embarque destes pasaxeiros

  As Compañías Aéreas están obrigadas a lles prestaren asistencia ás persoas minusválidas ou con mobilidade reducida a bordo do avión, mentres que as entidades xestoras dos aeroportos (AENA) deben, de xeito directo ou a través de terceiros, prestar asistencia no aeroporto e nos trámites de embarque e desembarque. Para iso están obrigadas a dispor de cadeiras de rodas, de elevadores ou de calquera outro tipo de asistencia que cumpra para as persoas que o precisen e que avisaran con tempo. Cando unha persoa minusválida ou con mobilidade reducida considere que non foi debidamente atendida pode cubrir unha Folla de Reclamacións de AENA, dirixíndose aos mostradores de información dos aeroportos. Tamén por correo electrónico sinbarreras@aena.es. Este tipo de asistencia é gratuíta, aínda que as compañías aéreas e as entidades xestoras dos aeroportos poden convir a prestación dunha asistencia de nivel superior á fixada de acordo ao regulamento e, nese caso, si poden impoñer unha tarifa.

Nos voos hai que comunicarlle, polo menos con 48 horas de antelación, á compañía aérea a necesidade de asistencia e especificar as limitacións concretas, xa que tanto estas compañías como os operadores turísticos están obrigados a adoptar as medidas necesarias para recibir as notificacións de necesidade de asistencia das persoas que sofren algún tipo de minusvalideza ou mobilidade reducida en todos os seus puntos de venda, incluídas as vendas por teléfono e Internet. De xeito opcional, tamén se lle pode notificar a AENA. Se o fai, solicite a confirmación. Para iso cómpre presentarse no punto de encontro que lle especifique AENA á hora indicada ou polo menos dúas horas antes do voo.

Relacións deste contido