Cóbranlle durante un ano e medio por un servizo de telefonía móbil que nunca contratou

A operadora de telefonía móbil coa que asinei un contrato hai case ano e medio estívome a cobrar por un servizo -a restrición de SMS Premium- que xamais solicitei. Reclamei, pero repítenme que só me devolverán os últimos seis meses. Que podo hacer?

  Neste caso procede a devolución íntegra das cantidades pagadas de máis, xa que a Lei do consumidor establece entre os dereitos dos consumidores o de "reclamar con eficacia en caso de erro, defecto ou deterioración, e obter a devolución equitativa do prezo de mercado do produto ou servizo". Se a devolución é parcial, non se cumpriría con este dereito. Por iso, debe continuar coa súa reclamación, solicitar o número de referencia desta e, en caso de non obter solución satisfactoria no prazo dun mes, enviar a súa reclamación á Secretaria de Estado de Telecomunicacións ou á Xunta Arbitral de Consumo. Para iso é de utilidade acudir en primeiro lugar á Oficina de Información ao Consumidor do seu concello.

Por outra banda, esta reclamación tamén se podería apoiar no artigo 1.895 do Código Civil por cobramento indebido, vinculado cun suposto relacionado co enriquecemento inxusto ou sen causa. Neste caso, a xurisprudencia establece unha marxe de quince anos para que a persoa afectada solicite a devolución da cantidade. Tras ese prazo, a acción prescribe.

Relacións deste contido