Unha casca nunha ensalada rómpelle dúas endodoncias ao pasaxeiro dun cruceiro, pero ninguén se fai cargo

O pasado ano durante as miñas vacacións nun cruceiro sufrín o seguinte contratempo: nunha das ceas a bordo mastiguei unha casca de noz cando comía unha ensalada e estragoume dúas endodoncias. Acudín á enfermería porque me informaron de que o médico era especialista en estomatoloxía. Pero non era certo e ademais non contaban con ningún tipo de material para estes casos no cruceiro. Alí mesmo tramitei unha denuncia asinada polo médico na que detallaba polo miúdo o que acontecera en presenza do grupo de comensais que nos acompañaban. Ademais, cando regresei a España denunciei tamén a axencia de viaxes para que se fixese cargo do dano que me causaran. Pero ao cabo de catro meses contestáronme que non se responsabilizaban do sucedido. Que podo facer?

 En primeiro lugar, é conveniente solicitar un acordo extraxudicial para o resarcimento do dano causado. De esta opción non dar resultado, a persoa afectada pode optar pola vía xudicial, aínda que se o prefire pode tramitar unha reclamación na Oficina Municipal de Información ao Consumidor do seu concello. Non obstante, se se realizou a reclamación, o aconsellable é contratar un avogado. Ao formar parte o cruceiro dunha viaxe combinada, pode dirixir a súa reclamación ou demanda contra a axencia de viaxes e tamén contra a empresa de venda por xunto do cruceiro. Suxerímoslle que continúe coas xestións, xa que, aínda que dende o punto de vista da responsabilidade das axencias de viaxes, a acción para reclamar ten un prazo de dous anos, a responsabilidade por neglixencia, do artigo 1902 do Código civil, prescribe ao ano. É conveniente que se axunten todas as probas documentais e mais os teléfonos, se dispón deles, e mais os enderezos das testemuñas.

Relacións deste contido