Recibe cartas de reclamación de pagamento dunha operadora de telefonía coa que rescindiu o contrato hai anos

Hai uns anos realicei a portabilidade do meu número de teléfono fixo dunha compañía a outra problema ningún. Pero chegáronme varias cartas reclamándome o pagamento por unhas facturas que disque non paguei. Son dunha empresa que di recibir a débeda da miña antiga operadora de telefonía e que me avisa de que todos os trámites de resolución debo aclaralos con ela. Que podo facer?

 Algúns operadores de telefonía ceden ou transmiten as débedas dos seus subscritores a outras empresas e son estas as que reclaman o pagamento. Non se trata de simples xestoras de cobramento contratadas polas compañías para a reclamación de débedas, senón de empresas que asumiron a posición do acredor primitivo e a titularidade do dereito a cobrar as facturas non pagas mediante un previo negocio ou acordo de cesión. Polo tanto, a cesión de crédito é unha figura permitida e regulada no Código Civil que recolle que todos os dereitos adquiridos en virtude dunha obriga son transmisibles. Aínda que esta cesión debe serlle comunicada ao debedor, non é necesario o seu consentimento para que sexa válida. Por iso, convén que a persoa afectada solicite unha xustificación documental da débeda e da cesión, que comprobe os conceptos reclamados, a súa data e o tempo transcorrido. Se lle solicitan o pagamento de consumos da subministración, as accións para reclamalo están sometidas a un prazo de prescrición, aínda que non todos os tribunais aplican o mesmo prazo. Algúns consideran que prescriben en cinco anos as accións para esixir os pagamentos que deban facerse por anos ou en prazos máis breves, mentres que a maioría defende que polo transcurso de tres anos prescribe a acción para esixir o pagamento do prezo das mercadorías vendidas por comerciantes a non comerciantes. É aconsellable que a persoa afectada acuda a unha Oficina de Información ao Consumidor para que lle xestionen a reclamación, soliciten a información e aclaren a súa situación.

Relacións deste contido